గజ్వేల్, వెలుగు : డెలివరీ అనంతరం తీవ్ర అస్వస్థతకు గురైన మహిళ హైదరాబాద్‌‌‌‌కు తరలిస్తుండగా మార్గమధ్యలో చనిపోయింది. ఇందుకు ప్రైవేట్‌ హాస్పిటల్‌ డాక్టర్ల నిర్లక్ష్యమే కారణమంటూ మృతురాలి బంధువులు హాస్పిటల్‌ ఎదుట ఆందోళనకు దిగారు. ఈ ఘటన గురువారం రాత్రి సిద్దిపేట జిల్లా గజ్వేల్‌‌‌‌లో జరిగింది. తూప్రాన్‌ మండలం రామాయిపల్లికి చెందిన చెందిన జక్కుల లక్ష్మణ్‌ భార్య భవాని (22) డెలివరీ కోసం గజ్వేల్‌‌‌‌లోని ఓ ప్రైవేట్‌ హాస్పిటల్‌‌‌‌లో జాయిన్‌ చేశారు.
గురువారం ఉదయం భవానికి ఆపరేషన్‌ చేయగా మగ బిడ్డ పుట్టాడు. కొద్దిసేపటికి భవానీ ఆరోగ్యం క్షీణించడంతో హైదరాబాద్ తీసుకెళ్లాలని డాక్టర్‌ సూచించారు. భవానీని బంధువులు హైదరాబాద్తరలిస్తుండగా మార్గమధ్యలో చనిపోయింది. దీంతో గజ్వేల్‌‌‌‌లోని ప్రైవేట్‌ హాస్పిటల్‌ డాక్టర్‌ నిర్లక్ష్యం కారణంగానే భవాని చనిపోయిందంటూ కుటుంబ సభ్యులు డెడ్‌‌‌‌బాడీతో హాస్పిటల్‌ ఎదుట ఆందోళనకు దిగారు. విషయం తెలుసుకున్న పోలీసులు ఎలాంటి అవాంఛనీయ ఘటనలు జరగకుండా బందోబస్తు చేపట్టారు.
