సిద్దిపేట జిల్లా చేర్యాల పట్టణంలో విషాద ఘటన చోటుచేసుకుంది. మే 13వ తేదీ సోమవారం లోక్సభ ఎన్నికల వేళ పట్టణంలోని బాలుర ఉన్నత పాఠశాలలో ఓటు వేయడానికి వచ్చిన ఓ మహిళ ఒక్కసారిగా కుప్పకూలిపోయింది. దీంతో వెంటనే పోలింగ్ సిబ్బంది.. సదరు మహిళను చికిత్స కోసం ఆస్పత్రికి తరలించారు. అయితే, అప్పటికే ఆమె మరణించినట్లు వెద్యులు తెలిపారు. గుండె పోటు రావడంతోనే మృతి చెందిందని చెప్పారు. ఈ ఘటనపై పోలీసులు కేసు నమోదు చేసి దర్యాప్తు చేస్తున్నామని వెల్లడించారు.
ఉప్పల్లోనూ ఇలాంటి ఘటనే చోటుచేసుకుంది. ఓటు వేయడానికి వచ్చిన ఓ మహిళ గుండెపోటుతో మృతి చెందింది. భరత్ నగర్ కి చెందిన విజయలక్ష్మి అనే మహిళ లోక్సభ ఎన్నికల వేళ ఓటు వేయడానికి పోలింగ్ బూత్ కు వచ్చి గుండెపోటు రావడంతో పోలింగ్ స్టేషన్ లోనే మృతి చెందింది.
