కొత్తపల్లి, వెలుగు : కొత్తపల్లి మండలం చింతకుంట గ్రామాన్ని కరీంనగర్ కార్పొరేషన్లో కలపొద్దని కోరుతూ గ్రామస్తులు, ఉపాధి కూలీలు సోమవారం చింతకుంట బ్రిడ్జి వద్ద రాస్తారోకో చేపట్టారు. ఈ సందర్భంగా గ్రామస్తులు మాట్లాడుతూ రాష్ట్ర ప్రభుత్వం ప్రజాభిప్రాయ సేకరణ చేయకుండా ఏకపక్షంగా కార్పొరేషన్లో విలీనం చేయడాన్ని తీవ్రంగా ఖండిస్తున్నామన్నారు. కార్పొరేషన్లో విలీనం చేస్తే సుమారు వెయ్యి మంది ఉపాధి హామీ కార్మికులు పనులుకోల్పోయే ప్రమాదం ఉందన్నారు.
రియల్ ఎస్టేట్ పెరిగి సామాన్యులు భూములు కొనలేని పరిస్థితి ఏర్పడుతుందన్నారు. ప్రభుత్వం తన వైఖరి మార్చుకోకపోతే ఉద్యమాన్ని మరింత తీవ్రతరం చేస్తామని హెచ్చరించారు. అనంతరం కలెక్టర్కు వినతిపత్రం అందజేశారు. కార్యక్రమంలో లీడర్లు భూక్యా తిరుపతినాయక్, రేణయ్య, రేణిగుంట రాజు, శంకరయ్య, సోమిరెడ్డి లచ్చిరెడ్డి, కరుణాకర్, నరేందర్, తిరుపతిగౌడ్, వాజిద్, 300 మంది గ్రామస్తులు పాల్గొన్నారు.
