- డాక్టర్లు, అంబులెన్స్ డ్రైవర్ల పాత్రపై ఆరా తీసిన డీహెచ్
- రిపోర్ట్ ఇవ్వాలని డీఎంహెచ్వోకు ఆదేశాలు
- పకడ్బందీగా పోలీసుల ఎంక్వైరీ
- రెండు రోజుల్లో కొలిక్కి వచ్చే అవకాశం
మంచిర్యాల, వెలుగు : మంచిర్యాల జిల్లా జైపూర్ మండలం శెట్పల్లికి చెందిన రేవెల్లి శ్రీకాంత్ (35) యాక్సిడెంట్లో గాయపడి బ్రెయిన్ డెడ్ కాగా, కొంతమంది ఆర్గాన్ డొనేషన్ పేరుతో అవయవాలను అమ్ముకున్న ఘటనను సర్కారు సీరియస్గా తీసుకుంది. ఇందులో డాక్టర్లు, అంబులెన్స్ డ్రైవర్లతో పాటు ఎవరెవరి పాత్ర ఉందన్న విషయమై ఆరా తీస్తోంది. ‘బ్రెయిన్డెడ్ పేషెంట్ అవయవాలు అమ్ముకున్నరు’ హెడ్డింగ్తో గురువారం ‘వెలుగు’లో పబ్లిష్అయిన కథనానికి డైరెక్టర్ఆఫ్హెల్త్ రవీందర్ నాయక్ స్పందించారు.
ఘటనపై రిపోర్ట్ సమర్పించాలని శుక్రవారం జిల్లా వైద్య ఆరోగ్యశాఖ అధికారి హరీశ్రాజ్ను ఆదేశించారు. దీంతో ఆ శాఖ అధికారులు హుటాహుటిన పేషెంట్ కుటుంబసభ్యులు, పోలీసులను సంప్రదించి ప్రాథమిక వివరాలు సేకరించారు. సాయంత్రం డీహెచ్కు ప్రిలిమినరీ రిపోర్టు పం పించారు. మరోవైపు ఘటనపై మంచిర్యాల పోలీసులు ఎంక్వైరీ చేస్తున్నారు. రెండు రోజుల్లో కేసు కొలిక్కి వచ్చే అవకాశం ఉన్నట్టు సమాచారం.
డాక్టర్లు, అంబులెన్స్ డ్రైవర్లే కీలకం..
మంచిర్యాలలోని ఓ ప్రైవేట్ హాస్పిటల్లో ఓటీ టెక్నీషియన్గా పనిచేస్తున్న శ్రీకాంత్ఈ నెల 6న జరిగిన యాక్సిడెంట్లో తీవ్రంగా గాయపడ్డాడు. తలకు బలమైన దెబ్బ తగలడంతో కరీంనగర్లోని ఓ ప్రైవేట్ హాస్పిటల్కు తరలించారు. డాక్టర్లు బ్రెయిన్ డెడ్ అయినట్టు చెప్పడంతో అంబులెన్స్ డ్రైవర్లు జోక్యం చేసుకొని ‘ఆర్గాన్ డొనేషన్’ ప్లాన్అమలు చేశారు. మెరుగైన వైద్యం కోసమంటూ కొందరు యశోద హాస్పిటల్కు తీసుకెళ్లాలని, మరికొందరు కామినేని హాస్పిటల్కు తరలించాలని పేషెంట్ కుటుంబసభ్యులను ఒత్తిడి చేశారు.
చివరకు కామినేని హాస్పిటల్కు తీసుకువెళ్లి రెండు రోజుల తర్వాత ఆర్గాన్ డొనేషన్ చేయించారు. తమకు రూ.3లక్షలిచ్చి వాళ్లు భారీగా దండుకున్నట్టు శ్రీకాంత్ భార్య స్వప్నపోలీసులకు ఫిర్యాదు చేసింది. ఈ వ్యవహారంలో అంబులెన్స్ డ్రైవర్లతో పాటు కొంతమంది డాక్టర్ల పాత్ర ఉన్నట్టు, రూ.లక్షలు చేతులు మారినట్టు పోలీసుల ప్రాథమిక విచారణలో తేలింది. మానవ అవయవాల అక్రమ రవాణాగా పరిగణిస్తున్న ఈ కేసులో ఇంకా ఎవరెవరి ప్రమేయం ఉందన్న కోణంలో ఎంక్వైరీ చేస్తున్నారు. రెండు రోజుల్లో కేసు కొలిక్కి వచ్చే అవకాశం ఉన్నట్టు తెలిసింది.
