సింగరేణి సంస్థ బెల్లంపల్లి పట్టణంలోని కాల్ టెక్స్ కాలనీ మీదుగా ఉన్న సింగరేణి 33 కేవీ విద్యుత్ లైన్ప్రమాదకరంగా మారింది. తీగలు కిందకు ఉండడంతో ఈ ప్రాంతంలో ఇల్లు కట్టుకునే వారు ప్రమాదాలకు గురవుతున్నారు. గతేడాది ఓ ఇల్లు నిర్మాణంలో ఉండగా కరెంట్షాక్కు గురై బాలిక వైకల్యానికి గురైంది. కొద్దిరోజుల క్రితం ఈ ప్రాంతంలో ఓ వ్యక్తి ఇల్లు నిర్మిస్తుండగా కూలి పనికి వచ్చిన వ్యక్తికి షాక్ తగిలి తీవ్రంగా గాయపడ్డాడు.
సమస్య పరిష్కరించాలని మందమర్రి, బెల్లంపల్లి ఏరియాల సింగరేణి జీఎంలకు విన్నవించినా పట్టించుకోవడంలేదని స్థానికులు వాపోతున్నారు. ఇప్పటికైనా సమస్యను పరిష్కరించాలని, లేదంటే ఉద్యమం చేపడతామని స్థానికులు హెచ్చరిస్తున్నారు.
బెల్లంపల్లి, వెలుగు
