దుబ్బాక, వెలుగు : అక్రమంగా తరలిస్తున్న 136 క్వింటాళ్ల రేషన్ బియ్యాన్ని పోలీసులు పట్టుకున్నారు. సిరిసిల్ల జిల్లా జిల్లెల్ల గ్రామానికి చెందిన పర్వతం నరేశ్ శుక్రవారం రాత్రి రేషన్ బియ్యాన్ని గూడ్స్ కంటైనర్లో సిద్దిపేట మీదుగా మెదక్ వైపు తరలిస్తున్నాడు. కంటైనర్ దుబ్బాక మండలం మర్రికుంట శివారులోకి రాగానే అదుపు తప్పి డివైడర్ను ఢీకొట్టి పక్కకు ఒరిగింది.
దీంతో ఓనర్ మరో వాహనాన్ని తీసుకొచ్చి అందులోకి రేషన్ బియ్యాన్ని లోడ్ చేస్తుండగా ప్రయాణికులు పోలీసులకు సమాచారం అందించారు. అక్కడికి చేరుకున్న పోలీసులు కంటైనర్ డోర్లు ఒపెన్ చేసి చూడగా రేషన్ బియ్యం దందా బయటికి వచ్చింది.
పోలీసులు బియ్యాన్ని స్వాధీనం చేసుకుని సివిల్ సప్లై అధికారులకు అందజేశారు. రెండు గూడ్స్ కంటైనర్లను సీజ్ చేసి, కంటైనర్ ఓనర్, డ్రైవర్లను అరెస్ట్ చేసినట్లు ఎస్ఐ గంగరాజు తెలిపారు.
