- అభివృద్ధి పనులకు శ్రీకారం
బజార్హత్నూర్, వెలుగు : ఆదిలాబాద్ జిల్లా బజార్హత్నూర్ మండలంలోని పిప్రి గ్రామానికి ఈనెల 7న డిప్యూటీ సీఎం భట్టి విక్రమార్క రానున్నట్లు ఎమ్మెల్యే వెడ్మ బొజ్జు పటేల్ తెలిపారు. ఈ సందర్భంగా సోమవారం ఆయన కాంగ్రెస్ నాయకురాలు ఆత్రం సుగుణ, బోథ్ నియోజకవర్గ పార్టీ ఇన్చార్జ్ ఆడే గజేందర్తో కలిసి సభ ఏర్పాట్లను పరిశీలించారు. అనంతరం ప్రెస్ మీట్లో ఎమ్మెల్యే మాట్లాడారు.
అసెంబ్లీ ఎన్నికల సమయంలో బట్టి విక్రమార్క పిప్రి గ్రామం నుంచి పీపుల్స్ మార్చ్ చేపట్టి ఖమ్మం జిల్లా వరకు చేశారని గుర్తుచేశారు. ఆ సమయంలో గ్రామాల్లో నెలకొన్న సమస్యలను నేరుగా తెలుసుకున్నారని ఇచ్చిన మాటకు కట్టుబడి 7వ తేదీన పిప్రిలో పలు అభివృద్ధి పనులకు శ్రీకారం చేయనున్నట్లు చెప్పారు.
పెద్ద ఎత్తున తరలివచ్చి సభను విజయవంతం చేయాలని పిలుపునిచ్చారు. ఈ కార్యక్రమంలో జిల్లా అధికార ప్రతినిధి పసుల చంటి, మాజీ జడ్పీటీసీ మల్లెపూలు నర్సయ్య, పార్టీ మండల అధ్యక్షుడ పాండురంగ్, నాయకులు దేవేందర్, విఠల్, కిషన్, ముకుందరావు తదితరులు పాల్గొన్నారు.
