మెదక్ జిల్లాలో పూర్తి కావచ్చిన భగీరథ సర్వే

• మెదక్​ కలెక్టర్ ​ప్రత్యక్ష పర్యవేక్షణ
• 97.03 శాతం సర్వే పూర్తి
• నల్లా కనెక్షన్​లేని ఇళ్ల వివరాలు నమోదు

మెదక్, వెలుగు: జిల్లాలో మిషన్​భగీరథ ఇంటింటి సర్వే పూర్తి కావచ్చింది. ప్రతీ ఇంటికి నీటి సరఫరా కోసం గత బీఆర్ఎస్​ ప్రభుత్వం మిషన్​భగీరథ పథకాన్నిచేపట్టిన సంగతి తెలిసిందే. కాగా కుటుంబాల సంఖ్య, జనాభా పెరగడంతోపాటు, పలు చోట్ల భగీరథ పథకం ద్వారా నీటి సరఫరా సరిగ్గా జరగడం లేదని, తరచూపైప్​లైన్​ లీకేజీలు ఏర్పడుతున్నాయని ఆరోపణలు వచ్చిన నేపథ్యంలో క్షేత్రస్థాయిలో భగీరథ పథకం తీరుతెన్నులు తెలుసుకునేందుకు సర్వే చేపట్టాలని ప్రభుత్వం నిర్ణయించింది.

ప్రస్తుతం గ్రామాల్లో ఎన్ని కుటుంబాలు, ఎన్నినల్లా కనెక్షన్​లు ఉన్నాయి, నీటి సరఫరా ఎలా జరుగుతోంది, ప్రతీ రోజు ఎన్ని లీటర్ల నీరు సరఫరా అవుతోంది, కొత్తగా ఎన్ని ఇళ్ల నిర్మాణం జరిగింది, అదనంగా ఎంత నీరు అవసరం అనేది తెలుసుకునేందుకు ఇంటింటి సర్వే చేస్తున్నారు. ఆయా వివరాల నమోదు కోసం ప్రత్యేకంగా మొబైల్​యాప్​రూపొందించారు. జీపీ సెక్రటరీలు, ఈజీఎస్​ఫీల్డ్​అసిస్టెంట్లు ఇంటింటికీ వెళ్లి సదరు యాప్​లో కుటుంబ సభ్యుల వివరాలు, మగవాళ్లు ఎంతమంది, ఆడవాళ్లు ఎంత మంది, కులం, ఆధార్​ కార్డ్​ నెంబర్​, మొబైల్​ఫోన్​నెంబర్​ నమోదు చేయడంతో పాటు భగీరథ నల్లా వద్ద ఇంటి యజమాని ఫొటో తీసి యాప్​ లో అప్​లోడ్​ చేస్తున్నారు. 

ఈ నెల 10న సర్వే ప్రారంభం కాగా పది రోజుల్లో పూర్తి చేయాలని ఆదేశాలు ఉన్నాయి. జిల్లాలోని 21 మండలాల పరిధిలో మొత్తం 1,60,918 కుటుంబాలు ఉండగా 21 వరకు 1,56,137  కుటుంబాల (97.03 శాతం) సర్వే పూర్తయింది. క్షేత్రస్థాయి సర్వేలో భాగంగా ఇప్పటి వరకు కొత్తగా 47,539 కుటుంబాలను గుర్తించారు. ఆర్​డబ్ల్యూఎస్​ఈఈ, డీపీవో తో పాటు కలెక్టర్​రాహుల్​రాజ్​స్వయంగా భగీరథ ఇంటింటి సర్వేను పర్యవేక్షిస్తున్నారు. పలు గ్రామాల్లో సర్వే జరుగుతున్న తీరును పరిశీలించి భగీరథ నీటి సరఫరా తీరు ఎలా ఉంది, రోజు నీటి సరఫరా ఎలా జరుగుతోంది, కుటుంబానికి సరిపడ నీరు వస్తోందా లేదా అనే విషయాలు అడిగి తెలుసుకొని మొబైల్ యాప్​లో లబ్ధిదారుల ఫొటోలతో సహా అప్​లోడ్​ చేస్తున్నారు. 

గడువు లోగా పూర్తి

జిల్లాలో కలెక్టర్​ పర్యవేక్షణలో మిషన్​ భగీరథ ఇంటింటి సర్వే స్పీడ్​గా జరుగుతోంది. పంచాయతీ సెక్రటరీలతో పాటు, ఈజీఎస్​ ఫీల్డ్​అసిస్టెంట్లకు మొబైల్ యాప్​లాగిన్​ఇచ్చి సర్వే చేయిస్తున్నాం. పది రోజుల్లో సర్వే పూర్తి చేయాలన్నది టార్గెట్. శుక్రవారం వరకు జిల్లాలో 97  శాతం సర్వే పూర్తయింది. త్వరలో 100 శాతం సర్వే టార్గెట్​పూర్తవుతుంది. గ్రామాల్లో కొత్తగా గుర్తించిన ఇళ్ల వివరాలు కూడా యాప్​ లో నమోదు చేస్తున్నాం. సర్వే పూర్తయ్యాక ప్రభుత్వానికి నివేదిక అందజేస్తాం.    

యాదయ్య,డీపీవో