కోల్బెల్ట్, వెలుగు: తెలంగాణా అటవీ అభివృద్ధి సంస్థ (టీజీఎఫ్ డీసీ) కాగజ్ నగర్ డివిజన్కు ఇంటర్నేషనల్ఫారెస్ట్ స్టీవార్డ్ కౌన్సిల్ (ఎఫ్ఎస్సీ) సర్టిఫికెట్ ప్రకటించింది. ఈ సర్టిఫికెట్ను సీఎం రేవంత్ రెడ్డి చేతుల మీదుగా సంస్థ వీసీ అండ్ ఎండీ చంద్రశేఖర్ రెడ్డి అందుకున్నారని బుధవారం టీజీఎఫ్డీసీ అధికారులు తెలిపారు. కాగజ్నగర్ డివిజన్ పరిధిలోని మంచిర్యాల, బెల్లంపల్లి, కాగజ్ నగర్ రేంజ్లలోని నీలగిరి ప్లాంటేషన్ పనుల్లో చేపడుతున్న భద్రతా ప్రమాణాలు, అందిస్తున్న నాణ్యమైన సేవలను గుర్తించి నెదర్లాండ్స్ దేశానికి చెందిన కంట్రోలర్ యూనియన్ సర్టిఫికేషన్ సంస్థ ఈ సర్టిఫికెట్ ప్రకటించినట్లు పేర్కొన్నారు.
దేశ, విదేశాల్లో ఉన్న కలప ఆధారిత సంస్థల్లో చేపడుతున్న పనులను పరిశీలించి ఎఫ్ఎస్సీ ఈ సర్టిఫికెట్ను ప్రకటిస్తుంది. ఇంటర్నేషనల్ సర్టిఫికెట్ ప్రకటించడం పట్ల టీజీఎఫ్ డీసీ చైర్మన్ పొదెం వీరయ్య, వైస్ చైర్మన్ అండ్ మేనేజింగ్ డైరెక్టర్ చంద్రశేఖర్ రెడ్డి, కాగజ్ నగర్ డివిజనల్ మేనేజర్ శ్రీశ్రావణి, మంచిర్యాల, కాగజ్ నగర్, బెల్లంపల్లి రేంజ్ల ప్లాంటేషన్ మేనేజర్లు గోగు సురేశ్ కుమార్, లక్ష్మణ్, సునీత తదితరులు కృతజ్ఞతలు
తెలిపారు.
