మంచిర్యాల, వెలుగు: మంచిర్యాల రైల్వే స్టేషన్లో సోమవారం అర్ధరాత్రి 24 కిలోల గంజాయిని జీఆర్పీ పోలీసులు పట్టుకున్నారు. రాత్రి 11 గంటల ప్రాంతంలో ఒకటో నంబర్ ప్లాట్ఫామ్పై ఎస్ఐ సుధాకర్, సిబ్బంది తనిఖీలు చేస్తుండగా మూడు బ్యాగులతో ఒక వ్యక్తి అనుమానాస్పదంగా కనిపించాడు. అతడిని చెక్ చేయగా 24 కిలోల గంజాయి లభించింది. ఒడిశా రాష్ట్రానికి చెందిన రాంచంద్ర స్వైన్ విజయవాడ రైల్వే స్టేషన్ లో ఒక వ్యక్తి వద్ద రూ.6 లక్షలకు 24 కిలోల గంజాయిని కొనుగోలు చేసి తన ఫ్రెండ్ కన్హా బాలాజీ స్వైన్ తో కలిసి నవజీవన్ ఎక్స్ప్రెస్లో విజయవాడ నుంచి సూరత్ కు తరలిస్తున్నట్లు ఒప్పుకున్నాడు.
మార్గమధ్యలో రైలులో పోలీసులను చూసి భయపడి మంచిర్యాల స్టేషన్లో దిగినట్టు చెప్పాడు. వేరే ట్రైన్ ఎక్కి సూరత్ కు వెళ్లడానికి ప్రయత్నిస్తుండగా, జీఆర్పీ పోలీసులకు చిక్కారు. రాంచంద్ర స్వైన్ను అరెస్ట్ చేసి రిమాండ్కు తరలించామని, బాలాజీ స్వైన్ పరారీలో ఉన్నాడని పోలీసులు తెలిపారు.
