కోల్బెల్ట్, వెలుగు : మంచిర్యాల జిల్లాలోని ఆర్కే-7 సింగరేణి బొగ్గు గనిలో నార్త్ సైడ్ సెక్షన్ మూసివేయాలని ఫారెస్ట్ అధికారులు శనివారం నోటీసులు జారీ చేశారు. ఫారెస్ట్ పర్మిషన్లు లేవని మైనింగ్ పనులు చేపట్టవద్దని పేర్కొన్నారు. ప్రస్తుతం ఈ గనిలో నార్త్, సౌత్ సైడ్స్లో బొగ్గు వెలికితీత పనులు సాగుతున్నాయి. నార్త్ సైడ్ లో పనులు ఎక్స్టెన్షన్ రెన్యువల్(లీజ్) కోసం 2018లోనే సింగరేణి ఫారెస్ట్ పర్మిషన్లకు దరఖాస్తు చేసుకుంది.
ఇప్పటివరకు ఎలాంటి పర్మిషన్లు రాలేదు. నార్త్ సెక్షన్ మూసివేయనుండడంతో సుమారు 500 మంది కార్మికులను శ్రీరాంపూర్ ఏరియాలోని ఆర్కే5, ఎస్సార్పీ3, ఇందారం1ఏ గనుల్లోకి డిప్యూటేషన్పై పంపేందుకు యాజమాన్యం ఏర్పాట్లు చేస్తోంది. మరోవైపు ఆర్కే-7 గనిని మూసివేయబోమని, కార్మికులు ఎలాంటి ఆందోళన చెందవద్దని శ్రీరాంపూర్ ఏరియా జీఎం సంజీవరెడ్డి తెలిపారు.
పర్మిషన్ చిన్న విషయమేనని, గని మూసివేత తప్పుడు ప్రచారమన్నారు. కాగా, ఆర్కే-7 గనిలో రోజుకు 1200 టన్నుల బొగ్గును ఉత్పత్తి చేస్తుండగా, అందులో 70 శాతం ఇక్కడి నుంచే వస్తోంది. ఆరు ఎస్డీఎల్ యంత్రాలతో బొగ్గు ఉత్పత్తి ఇక్కడ జరుగుతోంది.
