- జీవన్దాన్ ట్రస్టు ద్వారానే అవయవాల దానం
- ఎలాంటి ఆర్థిక లావాదేవీలు జరగలేదన్న పోలీసులు
- ఎంక్వైరీ జరుగుతోందన్న డీసీపీ
మంచిర్యాల, వెలుగు: మంచిర్యాల జిల్లా జైపూర్మండలం శెట్పల్లికి చెందిన రేవెళ్లి శ్రీకాంత్(35) బ్రెయిన్ డెడ్ కాగా, అతడి ఆర్గాన్స్ డొనేషన్ జీవన్దాన్ ట్రస్ట్ ద్వారానే జరిగిందని, ఎలాంటి ఆర్థిక లావాదేవీలు జరగలేదని డీసీపీ ఏ.భాస్కర్ తెలిపారు. అయితే, పేషెంట్ కుటుంబసభ్యులను తప్పుదారి పట్టించి డాక్టర్లు రెఫర్ చేసిన హాస్పిటల్స్కు కాకుండా వారికి కమీషన్లు ఇచ్చే హాస్పిటల్స్కు తరలించినందుకు ఐదుగురు అంబులెన్స్ డ్రైవర్లను అరెస్టు చేసి కోర్టులో హాజరుపర్చినట్టు తెలిపారు. సోమవారం మంచిర్యాల ఏసీపీ ఆఫీసులో ప్రెస్మీట్నిర్వహించారు.
శ్రీకాంత్ మంచిర్యాలలోని మయూరి హాస్పిటల్లో ఆపరేషన్ థియేటర్ టెక్నీషియన్. ఈ నెల 6న శెట్పల్లి దగ్గర జీపీ ట్రాక్టర్ ఢీకొనడంతో తల పగిలింది. మయూరి హాస్పిటల్కు తరలించగా కండీషన్ సీరియస్గా ఉందని డాక్టర్లు కరీంనగర్లోని భద్రకాళి హాస్పిటల్కు రెఫర్ చేశారు. శ్రీకాంత్ భార్య స్వప్న, కుటుంబసభ్యులు కరీంనగర్కు తీసుకెళ్తుండగా మంచిర్యాలలోని ఆర్బీహెచ్వీ స్కూల్ దగ్గర అంబులెన్స్ డ్రైవర్లు కిరణ్, నరేశ్, శ్రావణ్(నాని), సాయి అంబులెన్స్ను ఆపి భద్రకాళి హాస్పిటల్కు వద్దని, కెల్విన్ హాస్పిటల్కు తీసుకెళ్దామని చెప్పారు.
శ్రావణ్, నరేశ్ కూడా అదే అంబులెన్స్లో ఎక్కి వెళ్లారు. కిరణ్, సాయి కారులో ఫాలో అయ్యారు. దారిలో ఇందారం దగ్గర మరో డ్రైవర్ సాగర్ వీరితో కలిసి కెల్విన్ హాస్పిటల్కు తీసుకెళ్లారు. శ్రీకాంత్ పరిస్థితి విషమంగా ఉందని చెప్పిన డాక్టర్లు యశోద హాస్పిటల్కు రెఫర్ చేయడంతో అంబులెన్స్లో బయల్దేరారు. గజ్వేల్ దగ్గరకు చేరుకునేసరికి యాదగిరి అనే వ్యక్తి శ్రీకాంత్ భార్యకు ఫోన్ చేసి కామినేని హాస్పిటల్లో డిస్కౌంట్ ఉంటుందని చెప్పి అక్కడికి పంపించాడు.
ఈ నెల 8న డాక్టర్లు బ్రెయిన్ డెడ్ అయినట్లు నిర్ధారించి జీవన్దాన్ టస్ర్టు ద్వారా ఆర్గాన్స్ డొనేషన్ చేయాలని పేషెంట్ కుటుంబీకులను ఒప్పించగా ఏడు అవయవాలను దానం చేశారు. కెల్విన్ హాస్పిటల్లో ఉన్నప్పుడే అంబులెన్స్డ్రైవర్లు శ్రీకాంత్అవయవాలను దానం చేయాలని సూచించడం, వారు చెప్పినట్టు యశోద హాస్పిటల్కు కాకుండా కామినేని హాస్పిటల్కు తీసుకెళ్లడంతో.. కమీషన్లు రాలేదనే అక్కసుతో వారే..శ్రీకాంత్ బావమరిది రాజుకు ఫోన్ చేసి అవయవాలను దానం చేసి డబ్బులు తీసుకున్నారని తప్పుడు ప్రచారం చేశారని పోలీసులు వెల్లడించారు.
కమీషన్లకు ఆశపడి న్యూరో స్పెషలిస్ట్ ఉన్న భద్రకాళి హాస్పిటల్కు కాకుండా న్యూరో స్పెషలిస్ట్ లేని కెల్విన్ హాస్పిటల్కు తీసుకెళ్లి సరైన వైద్యం అందకుండా చేసినందుకు ఐదుగురిపై కేసు నమోదు చేసి అరెస్ట్ చేశామని తెలిపారు. ఈ కేసులో సాంకేతిక ఆధారాలు, హైదరాబాద్లో వీరికి సహకరించే వ్యక్తుల గురించి ఎంక్వైరీ చేయాల్సి ఉందని డీసీపీ తెలిపారు.
ఎన్నో అనుమానాలు!
శ్రీకాంత్ కేసులో అనేక అనుమానాలు తలెత్తుతున్నాయి. కరీంనగర్లో బ్రెయిన్ డెడ్గా నిర్ధారించకముందే అంబులెన్స్ డ్రైవర్లు ఆర్గాన్స్ డొనేషన్ చేయాలంటూ శ్రీకాంత్ భార్యపై ఎందుకు ఒత్తిడి చేశారు? వీరు యశోద హాస్పిటల్కు వెళ్తుండగా కామినేని హాస్పిటల్కు తీసుకెళ్లాలని ఫోన్ చేసిన యాదగిరి ఎవరు? అతడికి శ్రీకాంత్ను యశోదకు తీసుకెళ్తున్న విషయం ఎట్లా తెలిసింది? అనేది తెలియట్లేదు. డొనేషన్ తర్వాత తమకు రూ.3లక్షలు ఇచ్చారని, ఈ వ్యవహారంలో లక్షలు చేతులు మారాయని శ్రీకాంత్ భార్య, బావమరిది ఇదివరకే ఆరోపించారు. దీంతో సహజంగానే ఇందులో ఏదో జరిగిందనే అనుమానాలు వ్యక్తమవుతున్నాయి.
