- పుణ్యం వస్తుందని భార్యకు మాయమాటలు
- రూ. 3 లక్షలు ఇచ్చి మిగతాదంతా కొట్టేశారు
- డాక్టర్లు, అంబులెన్స్ డ్రైవర్ల పాత్ర
- ప్రాథమిక ఎంక్వైరీలో నిజమేనని తేల్చిన మంచిర్యాల పోలీసులు
- మానవ అవయవాల అక్రమ రవాణా కోణంలో విచారణ
మంచిర్యాల, వెలుగు : మంచిర్యాల జిల్లా జైపూర్మండలం శెట్పల్లికి చెందిన ఓ యువకుడు కొద్ది రోజుల కింద రోడ్డు ప్రమాదంలో గాయపడి బ్రెయిన్డెడ్కాగా, కొంతమంది వ్యక్తులు అతడి భార్యకు మాయమాటలు చెప్పి అతడి అవయవాలు అమ్ముకున్నారు. పుణ్యం వస్తుందని, హాస్పిటల్ బిల్లు కూడా లేకుండా చేస్తామని, రూ. 3 లక్షలు ఇప్పిస్తామని నమ్మించారు. ఇందులో అంబులెన్సు డ్రైవర్లు, కొందరు డాక్టర్లు కీలకపాత్ర పోషించినట్టు ఆరోపణలు వినిపిస్తున్నాయి. విషయం తెలుసుకున్న బ్రెయిన్డెడ్ అయిన యువకుడి భార్య పోలీసులకు ఫిర్యాదు చేయగా వారు దర్యాప్తు జరుపుతున్నారు.
గ్రామానికి చెందిన రేవెల్లి శ్రీకాంత్(35) మంచిర్యాలలోని ఓ ప్రైవేట్ హాస్పిటల్లో ఓటీ టెక్నీషియన్. ఈ నెల 6న డ్యూటీ తర్వాత ఇంటికి వస్తూ బైక్ యాక్సిడెంట్లో తీవ్రంగా గాయపడ్డాడు. తలకు బలమైన గాయం కావడంతో మంచిర్యాలలోని ఓ ప్రైవేట్ హాస్పిటల్కు, అక్కడి నుంచి కరీంనగర్లోని మరో దవాఖానకు తరలించారు. శ్రీకాంత్కు బ్రెయిడ్డెడ్ అయినట్టు చెప్పిన డాక్టర్లు.. హైదరాబాద్లోని యశోద హాస్పిటల్కు రెఫర్ చేశారు. అయితే మధ్యలో కొంతమంది అంబులెన్స్ డ్రైవర్లు జోక్యం చేసుకొని తాము శ్రీకాంత్ ఫ్రెండ్స్ అని చెప్పారు. యశోద హాస్పిటల్లో ట్రీట్మెంట్కు ఎక్కువ ఖర్చవుతుందని, కామినేని హాస్పిటల్లో తక్కువ ఖర్చుతోనే ట్రీట్మెంట్ చేయిస్తామని చెప్పి అక్కడికి తీసుకెళ్లారు.
చేతులు మారిన రూ. లక్షలు
ఈ నెల 8న బ్రెయిన్డెడ్ అయినట్టు చెప్పిన డాక్టర్లు, కొంతమంది అంబులెన్స్ డ్రైవర్లు శ్రీకాంత్ అవయవాలు దానం చేసేలా అతడి భార్య స్వప్నను ఒప్పించారు. మొదట ఒప్పుకోకపోయినా మాయమాటలు చెప్పి మానసికంగా సిద్ధం చేశారు. ఎన్ని రోజులు ఉంచినా డబ్బులు ఖర్చు కావడమే కానీ ప్రయోజనం ఉండదని, ట్రీట్మెంట్కు అయ్యే ఖర్చు భరించలేవని చెప్పారు. లివర్, కిడ్నీలు, లంగ్స్ గుండె, కార్నియా లాంటి అవయవాలు దానం చేస్తే మరి కొందరి జీవితాల్లో వెలుగులు నింపవచ్చని అన్నారు.
పైగా హాస్పిటల్ బిల్లులు లేకుండా చేస్తామని, రూ.3 లక్షలు కూడా ఇస్తామని చెప్పడంతో స్వప్న ఒప్పుకుంది. తర్వాత శ్రీకాంత్ నుంచి ఏడు అవయవాలను జీవన్దాన్ ట్రస్టు ద్వారా సేకరించారు. తర్వాత తన భర్త అవయవాల దానానికి సంబంధించి లక్షల రూపాయలు చేతులు మారాయని..డాక్టర్లు, అంబులెన్స్ డ్రైవర్లు బాడీ పార్ట్స్ అమ్ముకున్నారని తెలుసుకున్న శ్రీకాంత్ భార్య స్వప్న మంచిర్యాల పోలీసులకు ఫిర్యాదు చేసింది. దీంతో సీఐ బన్సీలాల్ మంగళవారం హైదరాబాద్లోని కామినేని హాస్పిటల్కు వెళ్లి విచారణ జరిపారు.
నిజంగానే లక్షల రూపాయలు చేతులు మారినట్టు ప్రాథమిక నిర్ధారణకు వచ్చారు. కుటుంబసభ్యులు, డాక్టర్లు, అంబులెన్స్ డ్రైవర్లతో పాటు జీవన్దాన్ ట్రస్ట్ ప్రతినిధుల పాత్రపై లోతుగా ఎంక్వైరీ చేస్తున్నారు. మానవ అవయవాల అక్రమ రవాణా కోణంలో విచారణ జరుపుతున్నట్టు తెలిసింది. కాగా, గతంలో ప్రైవేట్ హాస్పిటల్స్ ఇచ్చే కమీషన్లకు ఆశపడి పేషెంట్ల చావుకు కారణమైన అంబులెన్సు డ్రైవరే ఈ దందాలో కీలక సూత్రధారి అని పోలీసుల విచారణలో తేలినట్టు సమాచారం. ఇతనిపై ఇదివరకు మంచిర్యాల పోలీస్ స్టేషన్ లో కేసులున్నాయి.
