- మోదీకి ప్రజలు తగిన బుద్ధి చెప్పిన్రు
- కేసీఆర్, జగన్కూ అదే గతి పట్టింది
- రేవంత్ వైఎస్ లెక్క పరిపాలించాలె
- సీపీఐ జాతీయ కార్యవర్గ సభ్యుడు చాడ వెంకట్రెడ్డి
హుస్నాబాద్, వెలుగు : ‘మోదీ పదేండ్ల పాలన విచ్చలవిడిగా, ఏకపక్షంగా, నియంతృత్వంగా, కార్పొరేట్శక్తులకు అనుకూలంగా సాగింది. రైతులు, కార్మికులు, శ్రమజీవులకు వ్యతిరేకంగా నిర్ణయాలు తీసుకున్నడు. చార్సౌ పాంచ్ సీట్లు కావాలని ఎన్నికల్లో ప్రజల ముందుకొచ్చిండు. చార్ సౌ బీస్ పనులు చేసిన ఆయనకు సీట్లు తగ్గించి ప్రజలు తగిన బుద్ధి చెప్పిన్రు. అహంకారం, నియంతృత్వ పోకడలతో వ్యవహరించిన కేసీఆర్, జగన్కు కూడా అదే గతి పట్టింది. రేవంత్రెడ్డి పరిపాలన వాళ్లకు భిన్నంగా..వైఎస్ రాజశేఖరరెడ్డి తరహాలో సాగాలి’ అని సీపీఐ జాతీయ కార్యవర్గ సభ్యుడు చాడ వెంకట్రెడ్డి అన్నారు.
గురువారం ఆయన సిద్దిపేట జిల్లా హుస్నాబాద్లోని అనబేరి సింగిరెడ్డి అమరుల భవన్లో ఏర్పాటు చేసిన మీడియా సమావేశంలో మాట్లాడారు. దేశాన్ని కార్పొరేట్లకు తాకట్టు పెట్టిన మోదీకి ప్రజలు తగిన బుద్ధి చెప్పారన్నారు. టీడీపీ, జేడీయూ, ఇతర చిన్నచిన్న పార్టీల మద్దతుతో ఆయన పరిపాలన చేయాల్సి వస్తోందని, అవే పార్టీలు ఇండియాకూటమికి మద్దతిస్తే కాంగ్రెస్ సారథ్యంలో సర్కారు ఏర్పాటవుతుందన్నారు. వామపక్షాలు కూడా బలహీనపడుతున్నాయని, దీనిపై అంతర్మథనం జరుపుతామన్నారు.
రాష్ట్రంలో రేవంత్రెడ్డి వైఎస్ రాజశేఖరరెడ్డి లాగా ప్రజాదర్భార్ నిర్వహించాలని సూచించారు. ప్రతిరోజూ గంటపాటు ప్రజలను కలవాలన్నారు. తెలంగాణ రాష్ట్రంలో ఉద్యమకారులు, మేధావులు ప్రజాస్వామ్యాన్ని ఆకాంక్షిస్తున్నారన్నారు. కేసీఆర్ చేసిన అవినీతి, మేడిగడ్డ, విద్యుత్ కొనుగోళ్లు , ఫోన్ ట్యాపింగ్ వ్యవహారాలన్నిటినీ చట్టం చూసుకుంటుందని, ఆయనపై కక్ష సాధింపుకు దిగకుండా ప్రజలకు ఇచ్చిన హామీలను అమలుపర్చడంపై దృష్టి పెట్టాలన్నారు. పదేండ్లుగా పక్కా ఇండ్లకు నోచుకోని పేదలకు ఇండ్లు కట్టించాలన్నారు. గౌరవెల్లి ప్రాజెక్టు నిర్వాసితుల సమస్యలను పరిష్కరించాలన్నారు. ఆ పార్టీ జిల్లా అధ్యక్షుడు పవన్, రాష్ట్ర సమితి సభ్యుడు మల్లేశ్, జిల్లా కార్యవర్గ సభ్యులు వనేశ్, సంజీవరెడ్డి పాల్గొన్నారు.
