- మెదక్ లోక్ సభ ఓట్ల లెక్కింపు నర్సపూర్లో
- 7 హాళ్లు, 103 టేబుల్స్ ఏర్పాటు
మెదక్, వెలుగు: మే13న జరిగిన లోక్సభ ఎన్నికల ఓట్ల కౌంటింగ్కు కౌంట్డౌన్ షురూ అయింది. దేశ వ్యాప్తంగా ఒకే సారి ఈ నెల 4న ఓట్ల లెక్కింపు జరుగుతుంది. మెదక్ లోక్ సభ నియోజకవర్గ ఓట్ల లెక్కింపు మెదక్ జిల్లా నర్సాపూర్లో జరుగనుంది. ఈ నియోజకవర్గ పరిధిలో మొత్తం7 అసెంబ్లీ సెగ్మెంట్లు ఉండగా రెండు చోట్ల ఓట్ల లెక్కింపు జరుగనుంది. నర్సాపూర్ బీవీఆర్ఐటీ ఇంజనీరింగ్ కాలేజీలో మెదక్, నర్సాపూర్, సిద్దిపేట, గజ్వేల్, దుబ్బాక అసెంబ్లీ సెగ్మెంట్లకు సంబంధించి, ట్రైబల్ వెల్ఫేర్ జూనియర్ కాలేజీ లో సంగారెడ్డి, పటాన్చెరు అసెంబ్లీ సెగ్మెంట్ల ఓట్ల లెక్కింపు జరుగనుంది.
ఒక్కో అసెంబ్లీ సెగ్మెంట్ ఓట్ల లెక్కింపుకోసం ఒక హాల్ చొప్పున 7 హాల్లు ఏర్పాటు చేశారు. ఈవీఎంలలో నమోదైన ఓట్లను లెక్కించేందుకుగాను అన్నిచోట్ల కలిపి మొత్తం 103 టేబుల్స్అరేంజ్చేశారు. కౌంటింగ్ హాల్ లలో మొత్తం 199 సీసీ కెమెరాలు ఏర్పాటు చేశారు. కౌంటింగ్ ప్రక్రియను అబ్జర్వర్లు పర్యవేక్షించనున్నారు.
147 రౌండ్స్..
అసెంబ్లీ నియోజకవర్గాల వారీగా దుబ్బాక 19, మెదక్ 20, సిద్దిపేట 20, గజ్వేల్ 22, నర్సాపూర్ 22, సంగారెడ్డి 21, పటాన్ చెర్ 23 రౌండ్లలో ఓట్ల లెక్కింపు పూర్తి కానుంది. మొత్తం లోక్సభ నియోజకవర్గ పరిధి ఓట్ల లెక్కింపు 147 రౌండ్లలో పూర్తి కానుంది.
పోస్టల్బ్యాలెట్ కోసం 18 టేబుల్స్
పోస్టల్ బ్యాలెట్ ద్వారా 14,297 ఓట్లు పోలయ్యాయి. ఆ ఓట్ల లెక్కింపునకు ప్రత్యేకంగా ఒక హాల్, అందులో 18 టేబుల్స్ ఏర్పాటు చేశారు. పోస్టల్బ్యాలెట్ ఓట్ల లెక్కింపు రెండు రౌండ్లలో జరుగనుంది.
666 మంది సిబ్బంది
లోక్సభ నియోజకవర్గ వ్యాప్తంగా ఈవీఎంలలో నమోదైన ఓట్ల లెక్కింపు కోసం మొత్తం 564 మంది సిబ్బందిని, పోస్టల్ బ్యాలెట్ఓట్ల లెక్కింపుకోసం 102 మంది సిబ్బందిని నియమించారు. వారికి మొదటి విడత శిక్షణ పూర్తికాగా, ఈనెల 3న రెండో విడత శిక్షణ ఇవ్వనున్నారు.
