జహీరాబాద్ హస్తగతం వార్​వన్ సైడ్​

• బీజేపీ ఆశలు గల్లంతు
• కారు కనుమరుగు
• కాంగ్రెస్​ మెజార్టీ 46,188

సంగారెడ్డి,వెలుగు: జహీరాబాద్​ పార్లమెంట్​స్థానాన్ని కాంగ్రెస్​కైవసం చేసుకుంది. సమీప బీజేపీ అభ్యర్థి, సిట్టింగ్​ఎంపీ బీబీపాటిల్​పై కాంగ్రెస్​అభ్యర్థి సురేశ్​కుమార్​షెట్కార్​ 47,896 ఓట్ల మెజార్టీతో గెలుపొందారు. లోక్​సభ ఎన్నికల ఫలితాల నేపథ్యంలో మంగళవారం సంగారెడ్డి జిల్లా పటాన్​చెరు మండలం రుద్రారం గీతం యూనివర్సిటీలో ఓట్ల లెక్కింపు నిర్వహించారు. ఉదయం 8గం.లకు పోస్టల్​బ్యాలెట్​తో  మొదలైన కౌంటింగ్​ఈ సెగ్మెంట్​లోని 7 నియోజక వర్గాల వారీగా మొత్తం14 టేబుళ్లు, 145 రౌండ్ల లెక్కింపు కొనసాగింది. 

 ముందుగా లెక్కించిన పోస్టల్​ బ్యాలెట్​లో మొత్తం 6,889 ఓట్లు పోలవ్వగా ఇందులో బీజేపీకి 3,716 ఓట్లు రాగా, కాంగ్రెస్​కు 2,734 ఓట్లు, బీఆర్​ఎస్​కు కేవలం 304 ఓట్లు వచ్చాయి.  కాగా 48 ఓట్లు రిజెక్ట్​అయ్యాయి. ఇక రౌండ్ల విషయానికొస్తే మొదటి రౌండ్​ నుంచి చివరి రౌండ్​ వరకు కాంగ్రెస్​క్యాండిడేట్​సురేశ్​షెట్కార్​ ఆధిక్యం సాధించుకుంటూ వచ్చారు. కాంగ్రెస్​కు మొత్తం 5,23,919 ఓట్లు పోలవ్వగా బీజేపీకి 4,76,023 ఓట్లు, బీఆర్​ఎస్​ కు1,71,412 ఓట్లు వచ్చాయి.

 జహీరాబాద్​సెగ్మెంట్​లో తిరుగులేని పార్టీగా నిలిచిన బీఆర్ఎస్​ సిట్టింగ్​స్థానాన్ని​కోల్పోయి 3వ స్థానంతో సరిపెట్టుకోవాల్సి వచ్చింది. బీఆర్ఎస్​ సిట్టింగ్​ఎంపీగా ఉన్న బీబీపాటిల్​ఎన్నికల టైంలో ఆ పార్టీకి రాజీనామా చేసి బీజేపీలో చేరి బరిలో దిగారు. రెండు పర్యాయాలు ఎంపీగా పనిచేసిన పాటిల్ మూడోసారి గెలుపొంది హ్యాట్రిక్​ సాధించాలనే పట్టుదలతో పనిచేస్తూ వచ్చారు. ఎలాగైనా గెలుస్తామన్న బీజేపీ నేతల ఆశలు గల్లంతయ్యాయి.  బీఆర్ఎస్ అభ్యర్థి గాలి అనిల్​కుమార్​  అయిష్టంగానే బరిలో దిగినప్పటికీ పార్టీ లీడర్లు, కార్యకర్తల మద్దతు కూడగట్టుకోకపోవడం వల్లే ఓడిపోయారన్న ప్రచారం జరుగుతోంది. 

రెండోసారి హస్తం హవా..

జహీరాబాద్​ లోక్​సభ స్థానంలో కాంగ్రెస్​ రెండోసారి గెలిచి హవా చాటుకుంది.  2009లో ఏర్పడిన ఈ పార్లమెంట్​సెగ్మెంట్​లో మొదటి సారి కాంగ్రెస్​ తరపున పోటీ చేసి సురేశ్​ షెట్కార్​ గెలుపొందారు.  ఆ తర్వాత 2014, 2019 లో బీఆర్​ఎస్​ తరపున బీబీ పాటిల్​ విజయం సాధించారు. తాజాగా నాలుగో సారి జరిగిన ఎన్నికల్లో కాంగ్రెస్​ రెండో సారి గెలుపొంది పార్టీ పూర్వ వైభవాన్ని సాధించుకుంది. ఈ నేపథ్యంలో కాంగ్రెస్​ శ్రేణులు సంబరాలు జరుపుకున్నారు.