ఆదిలాబాద్ టౌన్, వెలుగు: ఆదిలాబాద్ జిల్లా కేంద్రంలోని రిమ్స్ ఆస్పత్రిలో ప్రభుత్వం డీఆర్ డీఓ ద్వారా మహిళా శక్తి పథకం మహిళా శక్తి క్యాంటీన్ను ఏర్పాటు చేయనున్నట్లు కలెక్టర్ రాజర్షి షా తెలిపారు. క్యాంటీన్ ఏర్పాటు కోసం స్థలాన్ని శుక్రవారం కలెక్టర్ పరిశీలించారు. డీఆర్ డీఓ ఆధ్వర్యంలో క్యాంటీన్ ఏర్పాటుకు ప్రణాళిక తయారు చేశామని, ఇందుకు బ్యాంక్ నుంచి ఋణం కూడా మంజూరైందని తెలిపారు. ఈ క్యాంటీన్ ప్రారంభోత్సవానికి సీఎం రేవంత్రెడ్డి త్వరలో రానున్నారని, క్యాంటీన్కు సంబంధించిన అన్ని ఏర్పాట్లను త్వరగా పూర్తిచేయాలని అధికారులను ఆదేశించారు.
అనంతరం సదరం క్యాంప్ను సందర్శించి వెయిటింగ్ లిస్ట్లో ఉంచకుండా సర్టిఫికెట్ ఇవ్వాలని సూచించారు. ఫ్రైడే.. డ్రైడే సందర్భంగా పట్టణంలోని మహాలక్ష్మివాడలోని అమ్మవారిని దర్శించుకున్నారు. డెంగ్యూ వ్యాధి నివారణ చర్యలపై నిర్వహించిన అవగాహన ర్యాలీలో పాల్గొన్నారు. ఈ కార్యక్రమంలో రిమ్స్ డైరెక్టర్ జైసింగ్ రాథోడ్, డీవైఎస్ఓ వెంకటేశ్వర్లు, అధికారులు తదితరులు పాల్గొన్నారు.
