రెవెన్యూ సమస్యలపై అవగాహన కల్పించాలి : రాహుల్ రాజ్

• నెలాఖరులోగా ధరణి పెండింగ్ అప్లికేషన్స్ పూర్తి 

రేగోడ్, వెలుగు: కోర్టు పరిధిలోకి వచ్చే రెవెన్యూ సమస్యలపై ప్రజలకు అవగాహన కల్పించాల్సిన బాధ్యత అధికారులపై ఉందని కలెక్టర్ రాహుల్ రాజ్​ అన్నారు. కుటుంబ ఆస్తి తగాదాలు, కోర్టు వ్యవహారాల్లో ఉన్న భూ సమస్యలు రెవెన్యూ ఆఫీసుల చుట్టూ తిరిగితే పరిష్కారం కావన్నారు. అలాంటి వాటిని కోర్టు తీర్పు అనంతరమే తాము పరిష్కరించగలుగుతామన్నారు. మంగళవారం మండల కేంద్రంలో కలెక్టర్​ పలు ఆఫీసులను తనిఖీ చేశారు. రేగోడు తహసీల్దార్ ఆఫీసులో భూ రికార్డులు పరిశీలించారు. అనంతరం మాట్లాడుతూ ధరణి అప్లికేషన్స్ ఈ నెలాఖరులోగా పూర్తి చేయాలనే లక్ష్యంతో జిల్లా యంత్రాంగం పనిచేస్తోందన్నారు.

ఎక్కువ సమస్యలు తహసీల్దార్​ స్థాయిలోనే పరిష్కరించేందుకు వీలుగా ప్రభుత్వం ధరణిలో మార్పులు తీసుకువచ్చిందని, మేజర్ ఇష్యూస్ ఉంటే ఆర్డీవో ద్వారా తమకు ఫిర్యాదు చేయాలన్నారు. అనంతరం కేజీబీవీని సందర్శించి స్టూడెంట్స్​తో మాట్లాడారు. స్టోర్ రూమ్, వంటశాలను పరిశీలించారు. హాస్టల్లో పూర్తిస్థాయి సిబ్బంది ఉండే విధంగా చర్యలు తీసుకోవాలని ఎస్​వో  స్వయంప్రభకు సూచించారు.

అనంతరం పీహెచ్​సీని సందర్శించి డాక్టర్ల హాజరు పట్టికను పరిశీలించారు. పేషంట్లతో సమస్యలను అడిగి తెలుసుకున్నారు. ఫార్మసీలోని మందులను చెక్​చేశారు. ఆసుపత్రికి 108 కేటాయించేందుకు వైద్య ఆరోగ్య శాఖ మంత్రి దామోదర రాజనర్సింహతో మాట్లాడతానన్నారు. ఈ సందర్భంగా పలువురు కలెక్టర్​కు తమ సమస్యలపై అర్జీలు అందజేశారు. 

విశ్వకర్మ పథకాన్ని సద్వినియోగం చేసుకోవాలి

మెదక్ టౌన్: ప్రధానమంత్రి విశ్వకర్మ పథకాన్ని వినియోగించుకోవాలని కలెక్టర్ రాహుల్ రాజ్ సూచించారు. కలెక్టర్ ఆఫీసులో జిల్లా అధికారులతో  పథకం అమలుపై సమావేశం నిర్వహించారు. ఈ సందర్భంగా కలెక్టర్ మాట్లాడుతూ..  ప్రధానమంత్రి విశ్వకర్మ పథకం గురించి పట్టణాలు, మండలాల్లో  స్వయం సహాయక బృందాలు, పట్టణాభివృద్ధి సంస్థ  రిసోర్స్​పర్సన్లు ప్రచారం చేయాలని  ఆదేశించారు. కమ్మరి,  కుమ్మరి, వడ్రంగి, మంగలి, చాకలి, వడ్డెర, అవుసలి, కంసాలి ఇలా 18 కులవృత్తుల వారు ఈ పథకానికి అర్హులవుతారన్నారు. ఈ పథకం కింద పనిముట్లకు  రూ.15 వేలు అందించడంతో పాటు  గుర్తింపు కార్డు, ధ్రువీకరణ పత్రం అందజేస్తామని వివరించారు.