- బీజేపీ, బీఆర్ఎస్ నుంచి మెదక్కు విముక్తి కల్పించాలి
- ఎంపీగా నీలం మధును లక్ష మెజార్టీతో గెలిపించాలి
- రఘునందన్ రావు, వెంకట్రామిరెడ్డిని ఓడించాలి
- నర్సాపూర్జన జాతర సభలో సీఎం రేవంత్రెడ్డి
మెదక్, నర్సాపూర్, వెలుగు: " మెదక్లోక్సభ నియోజకవర్గం ఇరవై ఐదేళ్లుగా బీజేపీ, బీఆర్ఎస్ ల చేతిలో మగ్గిపోయింది. ఈ ప్రాంతానికి విముక్తి కలిగించే అవకాశం మీ చేతిలో ఉంది. ఈ లోక్ సభ ఎన్నికల్లో మెదక్ ఎంపీగా బడుగు, బలహీన వర్గాల బిడ్డ అయిన కాంగ్రెస్ అభ్యర్థి నీలం మధును లక్ష ఓట్ల మెజార్టీతో గెలిపించాలి. కేసీఆర్, హరీశ్రావుకు గుణపాఠం చెప్పాలి " అని సీఎం రేవంత్ రెడ్డి ప్రజలకు పిలుపునిచ్చారు. లోక్ సభ ఎన్నికల ప్రచారంలో భాగంగా గురువారం నర్సాపూర్ లో జరిగిన జన జాతర సభలో ఆయన మాట్లాడారు.
మెదక్ పార్లమెంట్ నియోజకవర్గానికి దేశ చరిత్రలో గొప్ప పేరు ఉందన్నారు. 1980లో ఇందిరాగాంధీ మెదక్ లోక్ సభ ఎన్నికల్లో బరిలో దిగి అత్యధిక మెజార్టీతో గెలవడంతోపాటు ఈ దేశానికి ప్రధాన మంత్రి అయ్యారని గుర్తు చేశారు. ఆమె ఆధ్వర్యంలోనే బీడీఎల్, బీహెచ్ఈఎల్, పటాన్చెరులో పారిశ్రామిక వాడ, రామచంద్రపురంలో పెట్టుబడులు వచ్చాయన్నారు. ప్రస్తుతం మెదక్లోక్సభ స్థానంలో నీలం మధును కాంగ్రెస్ అభ్యర్థిగా ఎన్నికల బరిలో నిలిపామన్నారు. బీజేపీ నుంచి నిలబడ్డ అభ్యర్థి రఘునందన్ రావు, పీఎం నరేంద్ర మోదీ నుంచి కోట్ల రూపాయలు తీసుకువస్తానని దుబ్బాక ప్రజల చెవుల్లో పువ్వులు పెడితే మొన్నటి అసెంబ్లీ ఎన్నికల్లో ప్రజలు బండకేసి కొట్టి, ఉప్పు పాతరేశారన్నారు.
బీఆర్ఎస్ నుంచి నిలబడ్డ వెంకట్రామిరెడ్డి మల్లన్న సాగర్ , రంగనాయక సాగర్, కొండపోచమ్మ సాగర్ కోసం వేలాది ఎకరాల భూములను రైతుల నుంచి ప్రభుత్వం గుంజుకుంటుంటే వారికి సరైన నష్టపరిహారం ఇవ్వకుండా, పోలీసుల బూట్ల కింద రైతులను అణచివేశారని ఆరోపించారు. వెంకట్రామిరెడ్డి ఆల్రెడీ ఎమ్మెల్సీగా ఉన్నాడని, కేసీఆర్కు, హరీశ్ రావుకు వందల కోట్ల రూపాయలు ఇస్తున్నాడని అందుకే కరీంనగర్ నుంచి తీసుకువచ్చి మెదక్ ఎన్నికల బరిలో నిలిపారని ఆరోపించారు. మొత్తం మెదక్ జిల్లాలో పార్లమెంట్ పరిధిలో ఒక్క మగాడు దొరకలేదా అని ప్రశ్నించారు.
నిన్న నర్సాపూర్ ప్రచార సభలో కేసీఆర్..మదన్ రెడ్డిని ఏదేదో అని పోయారని, ఈ ప్రాంత ప్రజలు మిమ్మల్ని తిరస్కరించడం వల్లే మీరు ఓడిపోయారన్న సంగతి గుర్తుంచుకోవాలన్నారు. పార్లమెంట్ ఎన్నికల్లో మీ అభ్యర్థులకు డిపాజిట్లు గల్లంతవుతాయని, దానికి నర్సాపూర్ నుంచి పునాదులు పడతాయన్నారు. సభలో మంత్రులు కొండా సురేఖ, దామోదర రాజనర్సింహ, కాంగ్రెస్ అభ్యర్థి నీలం మధు, మెదక్ ఎమ్మెల్యే రోహిత్, మాజీ ఎమ్మెల్యేలు జగ్గారెడ్డి, మదన్ రెడ్డి, హన్మంతరావు, మాజీ ఎమ్మెల్సీ సత్యనారాయణ, డీసీసీబీ చైర్మన్ దేవేందర్రెడ్డి, కాంగ్రెస్ నాయకులు ఆంజనేయులు గౌడ్, రాజిరెడ్డి, రవీందర్రెడ్డి, సుహాసిని రెడ్డి, శేషసాయి రెడ్డి పాల్గొన్నారు.
