బెల్లంపల్లి రూరల్, వెలుగు : బ్యాంకులో తీసుకున్న అప్పును తిరిగి కట్టాలని ఓ రైతు ఇంటిపై బ్యాంకు అధికారులు దౌర్జన్యం చేశారు. ఇంటి తలుపును తొలగించి గొడవకు దిగారు. నెన్నెల మండల కేంద్రానికి చెందిన రైతు గట్టు శివలింగయ్య రెండెకరాల సాగు భూమి కోసం 2019లో బెల్లంపల్లి కోఆపరేటివ్బ్యాంకులో రూ.1.50 లక్షల అప్పు తీసుకున్నాడు. మూడు కిస్తీలుగా రూ.80 వేలు తిరిగి చెల్లించాడు. గతేడాది పంట నష్టాలు రావడం
కూతురి పెండ్లి చేయడంతో మిగతా డబ్బులు చెల్లించకపోయాడు. దీంతో మిగతా డబ్బు కట్టాలని బ్యాంకు అధికారులు ఆ రైతుపై ఒత్తిడి చేస్తున్నారు. మంగళవారం శివలింగయ్య ఇంటికి చేరుకున్న అధికారులు కుటుంబసభ్యులతో గొడవపడ్డారు. దీంతో వారు తలుపులు వేసుకోవడంతో వాటిని పీకి పక్కకు పెట్టి రుణం కట్టాలని ఒత్తిడి చేశారు. బ్యాంకు అధికారుల తీరుపై గ్రామస్తులు అభ్యంతరం వ్యక్తం చేశారు.
