బజార్హత్నూర్, వెలుగు: మహారాష్ట్ర సరిహద్దు మండలాల్లో నిషేధిత పిచికారీ మందులు అమ్మితే కఠిన చర్యలు తప్పవని ఆదిలాబాద్ జిల్లా వ్యవసాయ అధికారి పుల్లయ్య హెచ్చరించారు. బజార్హత్నూర్ మండల కేంద్రంలోని ఫర్టిలైజర్ షాపుల్లో మంగళవారం ఆయన ఆకస్మికంగా తనిఖీలు నిర్వహించారు. షాపుల్లోని పలు రికార్డులను పరిశీలించారు. ఈ సందర్భంగా ఆయన మాట్లాడుతూ.. ఫర్టిలైజర్ షాపుల్లో స్టాక్ బోర్డును ఎప్పటికప్పుడు రాయాలని, ఎరువులు, పిచికారీ మందులను ఎమ్మార్పీ ధరలకే అమ్మాలన్నారు.
రైతులకు కచ్చితంగా ఆన్లైన్ బిల్లు ఇవ్వాలని, అందించిన మందు వివరాలను స్టాక్ లో రాయాలన్నారు. మహారాష్ట్ర సరిహద్దు మండలాల్లో నిషేధిత పిచికారీ మందులను కొందరు బ్లాక్లో అమ్ముతున్నట్లు తెలిసిందని, అలాంటి వారిపై నిఘా ఉంచాలని మండల వ్యవసాయ అధికారులు, పోలీసులను ఆదేశించారు. మండల వ్యవసాయ అధికారి ప్రమోద్ రెడ్డి, సహకార సంఘం సీవో నారాయణ గౌడ్ తదితరులు పాల్గొన్నారు.
