బెల్లంపల్లి రూరల్, వెలుగు: మంచిర్యాల జిల్లా వేమనపల్లి గిరిజన ఆశ్రమ ఉన్నత పాఠశాలలో మంగళవారం ఏసీబీ ఆకస్మిక తనిఖీలు కలకలం సృష్టించాయి. ఆదిలాబాద్ జిల్లా ఇన్చార్జి డీఎస్పీ రమణమూర్తి ఆధ్వర్యంలో 8 గంటల పాటు అధికారులు ఆకస్మిక తనిఖీలు చేపట్టారు. పాఠశాలలో పారిశుద్ధ్య నిర్వహణ, బాత్రూంలు సరిగా లేకపోవడంపై అసంతృప్తి వ్యక్తం చేశారు. స్టూడెంట్స్ హాజరులో రిజిస్టర్లో ఉన్న విద్యార్థుల సంఖ్యకు తరగతి గదుల్లో ఉన్న విద్యార్థుల సంఖ్యకు పొంతన లేనట్లు గుర్తించారు. వారి వివరాలు హెచ్ఎం జ్ఞానేశ్వర్ను అడిగి తెలుసుకున్నారు.
270 మంది విద్యార్థులకు గానూ 130 మంది విద్యార్థులు హాజరైనట్లు హాజరు పట్టికలో పేర్కొన్నారు. కానీ 130 మంది విద్యార్థులు పాఠశాలలో లేరని, హాజరు పట్టికకు విద్యార్థుల సంఖ్యకు భారీ వ్యత్యాసం ఉన్నట్లు గుర్తించారు. స్టాక్ రిజిస్టర్ను సరుకులతో పోల్చి చూశారు. సేకరించిన సమాచారాన్ని ఉన్నతాధికారులకు నివేదిక రూపంలో పంపనున్నట్లు చెప్పారు. మెనూ ప్రకారం భోజనం పెడుతున్నారా అని విద్యార్థులను అడిగి తెలుసుకున్నారు. వారితో కలిసి భోజనం చేశారు. ఉదయం 9 గంటల నుంచి సాయంత్రం 4 గంటల వరకు కొనసాగిన తనిఖీలు జిల్లాలో హాట్టాపిక్గా మారాయి.
