దుబ్బాక, వెలుగు : సిద్దిపేట జిల్లా అక్బర్పేట భూంపల్లి మండలం చిట్టాపూర్లో రోడ్డు ప్రమాదంలో గాయపడిన వారిని కాపాడబోయిన ఓ వ్యక్తి ప్రాణాలు కోల్పోయాడు. సోమవారం రాత్రి రామాయంపేట నుంచి సిద్దిపేటకు వెళ్తున్న కారు చిట్టాపూర్లోని ఇర్కోటి రామాగౌడ్ ఇంటి ముందున్న డివైడర్ను ఢీకొని బోల్తా పడింది. అప్పుడు అక్కడే ఉన్న రామాగౌడ్, తన మనవడైన అరవింద్తతో కలిసి కారు డోర్లను తీసి అందులో పిల్లలు అమూల్య, సిరి చందనను బయటకు లాగాడు.
అప్పుడే సిద్దిపేటకు అతివేగంగా వెళ్తున్న ఆటో వీరిని ఢీకొట్టడంతో రామాగౌడ్ అక్కడికక్కడే చనిపోగా అమూల్య, సిరి చందన, అరవింద్ తీవ్రంగా గాయపడ్డారు. వీరిని స్థానికులు దుబ్బాక ఏరియా హాస్పిటల్కు తరలించారు. మృతుడి కుటుంబసభ్యుల ఫిర్యాదు మేరకు భూంపల్లి ఎస్ఐ హరీశ్ కేసు నమోదు చేసుకుని దర్యాప్తు చేస్తున్నారు.
