అలెస్సాండ్ర హేడెన్ అనే మహిళకు గిన్నిస్ రికార్డ్ ఎక్కాలనేది కోరిక. రికార్డ్ కోసం ఏం చేయాలా? అనే ఆలోచనలో ఉన్న ఆమెకు చిన్నప్పుడు అమ్మమ్మ నేర్పించిన క్రోచెట్ గుర్తొచ్చింది. క్రోచెట్ అంటే ఊలు దారంతో స్వెటర్లు వంటివి అల్లడం. హేడెన్ చిన్నప్పుడు ఇల్లంతా తిరుగుతూ అల్లరి చేసేదట. ఎలాగైనా ఆ అల్లరిని ఆపాలనుకుంది వాళ్ల అమ్మమ్మ. అందుకని కుదురుగా ఒక చోట కూర్చుని చేసే క్రోచెట్ అల్లిక నేర్పించింది. అప్పటికి హేడెన్ వయసు ఎనిమిదేండ్లు. ఇక అప్పటి నుంచి ఆమెకి క్రోచెట్ అల్లడం హాబీగా మారింది.
గిన్నిస్ రికార్డ్లకి ఎక్కడం కోసం ఏం చేయాలని ఆలోచిస్తున్న టైంలో ‘మనకు వచ్చిందే చేస్తే పోలా’ అనుకుంది. అంతే.. క్రోచెట్ అల్లడం మొదలుపెట్టింది. క్రోచెట్ అల్లాలంటే మధ్య మధ్యలో బ్రేక్స్ కంపల్సరీ. పైగా బ్రేక్ లేకుండా ఒకేచోట కూర్చుని గంటలు గంటలు పని చేయాలంటే కష్టం. మరి రికార్డ్ కొట్టాలంటే ఏ రేంజ్లో పని చేయాల్సి వస్తుందో ఊహించొచ్చు. అలాంటిది.. హేడెన్ 34 గంటల 7 నిమిషాలు క్రోచెట్ అల్లి.. గిన్నిస్ బుక్లో ఎక్కాలనే తన కలను నిజం చేసుకుంది. ఇందుకు తన భర్త చాలా సాయం చేశాడట. అంతేకాదు.. హేడెన్ కూతురు హేడెన్కి శ్నాక్స్ తినిపించడం, నీళ్లు లేదా కాఫీలు ఇవ్వడం, స్ట్రాతో ఎనర్జీ డ్రింక్స్ తాగించడం చేసిందట. ఇంతకీ అన్ని గంటలు కష్టపడి ఆమె తయారుచేసింది ఏంటంటే.. పెద్ద దుప్పటి. దాన్ని తన కూతురు వెళ్తున్న స్కూల్ ఆక్షన్లో పెట్టేందుకు ఇచ్చేసింది. అయితే ఆమె ఫ్రెండ్ ఒకరు ఆక్షన్లో రెండు వేల డాలర్లకు క్రోచెట్ దుప్పటి కొని ఆమెకే గిఫ్ట్గా ఇచ్చాడు.
