చలికి గరంగరంగా గొంతు దిగాలంటే సూప్ ఉండాల్సిందే. వెజిటబుల్, నాన్ వెజ్ సూప్.. ఇలా ఎన్నో రకాలున్నాయి. వాటిలో థ్రిల్ చేసే త్రీ రెసిపీలే ఇవి. మరింకెందుకాలస్యం.. వెంటనే ఈ రెసిపీలు ట్రై చేయండి.
గుమ్మడితో సూప్ తయారీకి కావాల్సినవి
- గుమ్మడికాయ ముక్కలు : పావు కిలో
- ఉల్లిగడ్డ : ఒకటి
- వెల్లుల్లి రెబ్బలు : మూడు
- నీళ్లు : ఒక కప్పు
- జాజికాయ పొడి : చిటికెడు
- మిక్స్డ్ హెర్బ్స్ : అర టీస్పూన్
తయారీ విధానం : ప్రెజర్ కుక్కర్లో గుమ్మడికాయ ముక్కలు, ఉల్లిగడ్డ, వెల్లుల్లి తరుగు వేయాలి. అందులో నీళ్లు పోయాలి. మూతపెట్టి పది నిమిషాలు ఉడికించాలి. తర్వాత ఆ మిశ్రమాన్ని మెత్తగా మెదపాలి. తర్వాత నూనె, ఒరెగానో, మిక్స్డ్ హెర్బ్స్, జాజికాయ పొడి, ఉప్పు వేసి కలపాలి. వాటితోపాటు కావాలంటే చక్కెరకూడా వేసుకోవచ్చు. మరికాసేపు మిశ్రమాన్ని బాగా ఉడికించాలి. చీజ్ వేసుకుని తింటే టేస్ట్ సూపర్గా ఉంటుంది.
మష్రూమ్ సూప్ తయారీకి కావాల్సినవి
- బటన్ మష్రూమ్స్ : పావు కిలో
- వెన్న : రెండు టేబుల్ స్పూన్లు
- బిర్యానీ ఆకు : ఒకటి
- ఉల్లిగడ్డ : ఒకటి
- వెల్లుల్లి రెబ్బలు : మూడు
- గోధుమపిండి : ఒక టేబుల్ స్పూన్
- మిరియాల పొడి : అర టీస్పూన్
- నీళ్లు, పాలు : ఒక్కో కప్పు
- ఉప్పు : సరిపడా
- కొత్తిమీర : కొంచెం
తయారీ విధానం: బటన్ మష్రూమ్స్ని కడిగి, కట్ చేసుకోవాలి. పాన్లో వెన్న వేడి చేసి అందులో బిర్యానీ ఆకు, ఉల్లిగడ్డ తరుగు, వెల్లుల్లి తురుము వేసి వేగించాలి. అవి వేగాక మష్రూమ్స్ తరుగు కూడా వేసి కలపాలి. పాన్లో నీరంతా ఇంకిపోయాక, గోధుమపిండి వేసి కలపాలి. మూడు నిమిషాల వరకు కలుపుతూ వేగించాలి. తర్వాత మిరియాల పొడి వేసి కలపాలి. ఆపై నీళ్లు పోసి కలపాలి. కావాలంటే వెజిటబుల్స్ లేదా మష్రూమ్ ఉడికించిన నీటిని వాడొచ్చు. పాలు కూడా పోయాలి. చివరిగా ఉప్పు వేసి కలిపి, మూత పెట్టాలి. పొంగు వచ్చేవరకు మాదిరి మంట మీద ఉడికించాలి. మిశ్రమం దగ్గర పడ్డాక మరో ఐదు నిమిషాలు ఉడికించి, కొత్తిమీర చల్లాలి.
సొరకాయతో సూప్ తయారీకి కావలసినవి
- సొరకాయ ముక్కలు : 350 గ్రాములు
- నూనె : ఒక టేబుల్ స్పూన్
- ఉల్లిగడ్డ : పావు కప్పు
- వెల్లుల్లి తరుగు : ఒక టీస్పూన్
- నీళ్లు : రెండు కప్పులు
- మిక్స్డ్ హెర్బ్స్ పౌడర్ : ఒక టీస్పూన్
- మిరియాల పొడి : అర టీస్పూన్
- ఉప్పు : సరిపడా
తయారీవిధానం : ప్రెజర్ కుక్కర్లో నూనె వేడి చేసి అందులో ఉల్లిగడ్డ, వెల్లుల్లి తరుగు వేసి వేగించాలి. అందులో సొరకాయ ముక్కలు వేసి కలపాలి. ఆపై నీళ్లు పోసి మూతపెట్టి రెండు విజిల్స్ వచ్చేవరకు లేదా పది నిమిషాలు ఉడికించాలి. ఆ తర్వాత నీటిని వడకట్టి పక్కన ఉంచాలి. ఉడికిన సొరకాయ, ఉల్లిగడ్డ, వెల్లుల్లి తరుగును మిక్సీజార్లో వేసి మెత్తగా గ్రైండ్ చేయాలి. తర్వాత అదే ప్రెజర్ కుక్కర్లో వేసి వడకట్టిన నీటిని కూడా పోయాలి. ఆ మిశ్రమంలో మిరియాల పొడి, మిక్స్డ్ హెర్బ్స్ పౌడర్, ఉప్పు వేసి కలపాలి. క్రీమ్లా కావాలనుకుంటే చీజ్ కూడా వేసుకోవచ్చు. ఈ సూప్ నేరుగా తాగడమే కాకుండా.. బ్రెడ్ టోస్ట్తో కూడా ఎంజాయ్ చేయొచ్చు.
