మెత్తని చపాతీలు, రుచికరమైన పాస్తా తయారీకి మన్నిక కలిగిన పూసా గెహూ గౌరవ్ వంగడాన్ని భారత వ్యవసాయ పరిశోధన సంస్థ ఇండో ప్రాంతీయ కేంద్ర సంచాలకుడు, ప్రధాన శాస్త్రవేత్త డాక్టర్ జంగ్ బహదూర్ సింగ్ కనుగొన్నారు. ఇటీవల ప్రధాన మంత్రి నరేంద్ర మోడీ విడుదల చేసిన 109 రకాల వంగడాల్లో పూసా గౌరవ్ ఉంది.
పూసా గౌరవ్ డురం జాతి వంగడం. ప్రపంచమంతటా పాస్లా, అంబలి, సేమ్యా తయారీకి డురం గోధుమను విరివిగా ఉపయోగిస్తున్నారు. పూసా గెహూ గౌరవ్ గోధుమ పిండి సాధారణ డురం గోధుమల కంటే ఎక్కువ నీటి పీల్చుకుంటుంది. దీంతో చపాతీలు మెత్తగా వస్తాయని జంగ్ బహదూర్ సింగ్ వివరించారు. వాతావరణ మార్పుల వల్ల ఉష్ణోగ్రత పెరిగి, సాగునీటి సదుపాయం తగ్గినా పూసా గౌరవ్ మంచి దిగుబడిని ఇస్తుంది. పరిమిత సాగునీటి సదుపాయం ఉన్నా హెక్టారుకు 30.2 క్వింటాళ్ల నుంచి 39.9 క్వింటాళ్ల వరకు దిగుబడి ఇచ్చే ఈ వంగడం దక్షిణ, మధ్య భారత ప్రాంతాలకు ఎంతో అనువైంది.
