- ప్రభుత్వ లక్ష్యం 6 లక్షల టన్నుల ధాన్యం సేకరణ
- ఇప్పటి వరకు కొనుగోలు చేసింది మాత్రం 4.25 లక్షల టన్నులే
- పూర్తి కావొస్తున్న యాసంగి వడ్ల కొనుగోలు
- జిల్లాలో 937.46 కోట్ల ధాన్యం కొన్న సర్కారు
నిజామాబాద్, వెలుగు: జిల్లాలో యాసంగి సీజన్ వడ్ల కొనుగోళ్ల టార్గెట్‌ను ఆఫీసర్లు చేరుకోలేకపోయారు. మొత్తం 14 లక్షల మెట్రిక్ టన్నుల దిగుబడిలో కనీసం 6 లక్షల టన్నులు సేకరించాలని లక్ష్యం పెట్టుకోగా.. ఇప్పటివరకు కేవలం 4.25 లక్షల టన్నుల ధాన్యాన్ని మాత్రమే కొనుగోలు చేశారు. రైతులు దొడ్డురకం వడ్లను గవర్నమెంట్కు అమ్మగా.. సన్న వడ్లను ప్రైవేటు మిల్లర్లకు అమ్మారు. రైతులకు లాభం కలిగేలా ప్రైవేటు కొనుగోళ్లు జరగడంతో సర్కారు దీన్ని ఎంకరేజ్ చేసింది. కడ్తా, తరుగు పేరుతో మిల్లర్లు మోసం చేస్తే యాక్షన్ తీసుకోవాలని అధికారులను ఆదేశించి రైతులకు అండగా నిలబడడంతో సేల్స్ కొనసాగాయి. కర్నాటక, ఆంధ్ర రాష్ట్రాల నుంచి వచ్చిన మిల్లర్లు వడ్లు కొనుగోలు చేసి తరలించారు.
రెండు సీజన్ల నుంచి బాగా డిమాండ్
స్టేట్లో వరి పంట సాగు చేసే టాప్ త్రీ జిల్లాల్లో నిజామాబాద్ ఒకటి. సాధారణ విస్తీర్ణం కంటే 150 శాతం అధిక విస్తీర్ణంలో వరి సాగు చేస్తున్నారు. గతేడాది వర్షాకాలంలో 4.20 లక్షల ఎకరాలు, యాసంగిలో 4.10 లక్షల ఎకరాల్లో వరి పంట వేశారు. క్వింటాల్ వడ్లకు ప్రభుత్వ మద్దుతు ధర 'ఏ' గ్రేడ్కు రూ.2,203, సెకండ్ గ్రేడ్కు రూ.2,183 ఉంది. పొరుగు రాష్ట్రాలైన ఆంధ్ర, కర్నాటకలో భారీ వర్షాలు, వరదలతో కిందటేడు పంటలు సరిగా పండలేదు. దీంతో అక్కడి మిల్లర్లంతా జిల్లా నుంచి కొనుగోళ్లు చేస్తున్నారు. పోయిన వానాకాలంలో సన్నరకం పచ్చి వడ్లను రూ.2,800 రేట్తో స్పాట్ పేమెంట్ ఇచ్చి సేకరించారు.
గవర్నమెంట్ పర్చేజ్ సెంటర్లకు దొడ్డురకం వడ్లు మాత్రమే రాగా.. 4 లక్షల మెట్రిక్ టన్నుల కొనుగోళ్లతో సీజన్ముగించారు. మిల్లర్లు చెల్లించిన రేట్‌ను ప్రామాణికం చేసుకుని రైతులు మొన్నటి యాసంగిలో 85 శాతం విస్తీర్ణంలో సన్నాలను సాగుచేశారు. మొత్తం 14 లక్షల దిగుబడిలో 6 లక్షల టన్నులను కొనుగోలు చేయాలని ఆఫీసర్లు ప్లాన్ చేశారు. జిల్లా వ్యాప్తంగా 480 పర్చేజ్ సెంటర్లు ఓపెన్ చేయాలని నిర్ణయించి ఏప్రిల్ మొదటివారంలో 438 సెంటర్లు షురూ చేశారు. అంతకు 20 రోజుల ముందే ప్రైవేటు మిల్లర్లు ఎంటరై దాదాపు సగం దిగుబడిని కొనేశారు.
దోపిడి లేకుండా చర్యలు
యాసంగిలో పండించిన సన్నరకం పచ్చి వడ్లకు మిల్లర్లు రూ.2,400 రేట్ముట్టజెప్పారు. దీంతో రైతులు అటే మొగ్గారు. వారికి మేలు జరుగుతున్నందున మిల్లర్ల దోపిడీ లేకుండా గవర్నమెంట్ నియంత్రణ చర్యలు చేపట్టడంతో మరింత మేలు జరిగింది. ఎంఎస్పీ కంటే రేట్ తగ్గించి ఎవరు కొనుగోలు చేయకుండా ఆఫీసర్లు పర్యవేక్షించారు. తరుగు, కడ్తాను కంట్రోల్ చేశారు. ఫలితంగా సుమారు 10 లక్షల మెట్రిక్ టన్నులు మిల్లర్లు కొనుగోలు చేశారు. గవర్నమెంట్ కాంటాలకు దొడ్డురకం వడ్లను 4.25 లక్షల టన్నులు అమ్మారు. యాసంగి కొనుగోళ్లు ఇక క్లోజ్ అయినట్లేనని ఆఫీసర్లు అంచనా వేస్తున్నారు.
బాల్కొండ సెగ్మెంట్ మినహా జిల్లాలో సెంటర్లు పది రోజుల కిందే మూసేశారు. మరో నాలుగు రోజులలో మిగితా వాటిని మూసేయనున్నారు. జిల్లాలో గవర్నమెంట్ పక్షాన రూ.937.46 కోట్ల విలువ వడ్ల కొనుగోళ్లు జరిగాయి. అందులో రూ.824.94 కోట్ల డబ్బును రైతుల బ్యాంక్ అకౌంట్లో డిపాజిట్ చేశారు. మిగితా బిల్లు చెల్లించే ఏర్పాట్లు సివిల్ సప్ల్సై ఆఫీసర్లు చేస్తున్నారు.
