- గ్రామీణ ప్రాంతాల్లో చైతన్యం చాటిన ఓటర్లు
- సొంత గ్రామాల్లో ఓటు వినియోగించుకున్న ప్రజాప్రతినిధులు
- పోలింగ్ సిబ్బందితో ఎంపీ అర్వింద్ వాగ్వాదం
నిజామాబాద్, వెలుగు : ఇందూర్ పార్లమెంట్ సెగ్మెంట్లో సోమవారం జరిగిన పోలింగ్ చెదురుమదురు ఘటనలు మినహా ప్రశాంతంగా ముగిసింది. సాయంత్రం 5 గంటల వరకు 67.96 శాతం పోలింగ్ నమోదైంది. రాత్రి 10.30 గంటలకు 71.47 శాతం పోలింగ్ నమోదైనట్లు ఎన్నికల అధికారులు తెలిపారు. మొత్తం 17,04,867 మంది ఓటర్ల కోసం 1,808 బూత్లు ఏర్పాటు చేసి ఎన్నికలు నిర్వహించారు. ఉదయం 5.30 గంటలకు పొలికల్ పార్టీ లీడర్ల సమక్షంలో మాక్ పోలింగ్ ముగించి 7 గంటల నుంచి అసలు పోలింగ్ షురూ చేశారు.
సాయంత్రం 6 గంటల దాకా పోలింగ్ సెంటర్లలోకి ఎంటరైన ఓటర్లను మాత్రమే ఓటు వేయడానికి అనుమతించారు. పొద్దున 9 గంటలకు 10.91 శాతం నమోదైన పోలింగ్ 11 గంటలకు 28.26 శాతం, మధ్యాహ్నం ఒంటిగంటకు 45.67 శాతానికి చేరింది. 3 గంటలకు 58.70 శాతంగా ఉన్న పోలింగ్ సాయంత్రం 5 గంటలకు 67.96 శాతానికి చేరుకుంది. ఫైనల్ పోలింగ్ రిపోర్టును రిటర్నింగ్ ఆఫీసర్లు ప్రిపేర్ చేస్తున్నారు. పోలింగ్మొదలైన మొదటి నాలుగు గంటలు గ్రామీణ ఓటర్లు చైతన్యం కనబర్చారు.
పల్లెల్లో అధిక పోలింగ్ రికార్డయింది. కలెక్టర్ రాజీవ్గాంధీ హన్మంతు సెంట్రల్ మానిటరింగ్ సిస్టంలో సీసీ కెమెరాల్లో పోలింగ్తంతు పరిశీలించారు. సీపీ కల్మేశ్వర్ జిల్లా అంతటా తిరిగి లా అండ్ ఆర్డర్ పర్యవేక్షించారు.
ఓటేసిన ప్రముఖులు
బీజేపీ అభ్యర్థి ధర్మపురి అర్వింద్ నగరంలోని కాకతీయ విద్యాసంస్థల క్యాంపస్లో ఏర్పాటు చేసిన బూత్లో భార్యతో కలిసి ఓటు వేయగా కాంగ్రెస్ క్యాండిడేట్ జీవన్రెడ్డి జగిత్యాల పట్టణంలోని గవర్నమెంట్ హైస్కూల్లో ఓటు హక్కు వినియోగించుకున్నారు. బీఆర్ఎస్ అభ్యర్థి బాజిరెడ్డి గోవర్ధన్ ఫ్యామిలీ మెంబర్స్తో వచ్చి రూరల్ అసెంబ్లీ సెగ్మెంట్లోని సిరికొండ మండలం రావుట్ల విలేజ్లో ఓటు వేశారు. బురఖాలు ధరించి వచ్చిన సెంటర్కు వెళ్లిన అర్వింద్ ఎలక్షన్ నిబంధనల ప్రకారం ఓటర్ ముఖాలను కన్ఫర్మ్ చేసుకున్నాకే వారిని ఓటేయడానికి అనుమతించాలి.
అలా చేయడం లేదంటూ బీజేపీ అభ్యర్థి అర్వింద్ నగరంలోని ఖిల్లా రోడ్ 220 పోలింగ్ సెంటర్కు వెళ్లి సిబ్బందితో వాగ్వాదానికి దిగారు. బురఖా లోపల ముఖాలు చూడకుండా ఓటు ఎలా వేయనిస్తున్నారని ప్రశ్నించారు. మైనారిటీ ఏరియాల్లోని పోలింగ్ సెంటర్లలో ఏజెంట్లను అలర్ట్ చేశారు. 144 సెక్షన్ అమలు విషయంలో నిర్లక్ష్యం వహిస్తున్నారని సిటీ ఏసీపీ రాజా వెంకట్రెడ్డితో వాదించారు. ఈవీఎంలు సతాయించడంతో పొద్దున విశ్వభారతి హైస్కూల్లో పోలింగ్ గంట పాటు జరగలేదు.
పోలింగ్ సెంటర్ల వద్ద ప్రచారం చేస్తున్న ఆయా పార్టీల కార్యకర్తలను పలు చోట్ల పోలీసులు లాఠీలు పట్టుకొని చెదర గొట్టారు. ఎండలు అధికంగా నమోదు కావడంతో పోలింగ్ సెంటర్లలో గట్టి ఏర్పాట్లు చేశారు. నీడ కోసం టెంట్లు, షామియానాలు, ఓఆర్ఎస్ ప్యాకెట్లను ఓటర్లకు అందుబాటులో పెట్టారు. ఫ్యాన్లు, కూలర్లు పెట్టారు.
అసెంబ్లీ సెగ్మెంట్ల వారీగా పోలింగ్
సెగ్మెంట్ ఓటర్లు పోలింగ్
ఆర్మూర్ 2,12,145 69.61%
బోధన్ 2,23,096 70.84%
నిజామాబాద్ (అర్బన్) 3,04,317 57.86%
నిజామాబాద్(రూరల్) 2,56,593 70.54%
బాల్కొండ 2,26,792 71.31%
కోరుట్ల 2,45,249 70.07%
జగిత్యాల 2,36,675 68.55%
