కామారెడ్డి జిల్లాలో వార్షిక రుణ ప్రణాళిక రెడీ : కలెక్టర్ ఆశిష్​ సంగ్వాన్​

• ప్లాన్​ ప్రకటించిన కలెక్టర్​ 
• రూ. 6,412 కోట్లు రుణ లక్ష్యం
• పంట లోన్ల విషయంలో బ్యాంకర్లు ఉదారంగా వ్యవహారించాలి

కామారెడ్డి​ ​, వెలుగు : కామారెడ్డి జిల్లాకు సంబంధించి వార్షిక రుణ ప్రణాళికను అధికారులు బుధవారం ఖరారు చేశారు. కలెక్టర్​ ఆశిష్​ సంగ్వాన్​ బ్యాంకర్లు, ఆయా శాఖల ఆఫీసర్లతో కలెక్టరేట్​ సమావేశం నిర్వహించి ప్రణాళికను రిలీజ్​ చేశారు. మొత్తం రూ. 6,412 కోట్ల రుణ ప్రణాళిక ఉండగా.. ఇందులో ప్రయార్టీ రంగాలకు రూ.5,610. 28 కోట్లు ( 87.48 శాతం), ఇతర రంగాలకు రూ.802 కోట్లు ( 12.51శాతం) కేటాయించారు. 

ప్రయార్టీ రంగాల్లో ముఖ్యంగా పంట లోన్లకు రూ.3,425. 85 కోట్లు , రూ.732 కోట్లు టర్మ్​ లోన్లు, రూ.537 .73 కోట్లు అగ్రికల్చర్​ పనిముట్లు, ట్రాక్టర్లు, వ్యవసాయ అనుబంధ సాంకేతిక రంగాలకు కేటాయించారు. సూక్ష్మ, చిన్న, మధ్య తరహా పరిశ్రమలకు రూ.700. 94 కోట్లు కేటాయించారు. విద్య, గృహా, ఇతర మౌలిక సదుపాయాలకు, పునరుత్పాదక శక్తికి రూ.213 . 38 కోట్లు ఖర్చు చేయనున్నట్లు కలెక్టర్​ పేర్కొన్నారు.

100 శాతం లక్ష్యాన్ని సాధించాలి

బ్యాంకర్లు, ఆయా శాఖల ఆఫీసర్లు కో అర్డినేషన్​తో పని చేస్తూ 100 శాతం లోన్​ లక్ష్యాన్ని సాధించాలని కలెక్టర్​ ఆశిష్​ సంగ్వాన్​ పేర్కొన్నారు. కలెక్టరేట్​లో బ్యాంకర్ల జిల్లా స్థాయి సమీక్ష లో ఆయన మాట్లాడారు. గత ఆర్థిక సంవత్సరంలో రూ.5569 కోట్లు రుణంగా ఇవ్వాలని లక్ష్యంగా కాగా, 78.60 శాతం మాత్రమే లోన్లు ఇవ్వటంపై కలెక్టర్​ అసంతృప్తి వ్యక్తం చేశారు. 100 శాతం లోన్​ టార్గెట్​ను సాధించేందుకు పని చేయాలన్నారు. అగ్రికల్చర్​ ఇన్​ఫ్రాస్ట్రక్చర్​ కింద కోల్డ్ స్టోరేజీలు, గోడౌన్స్​ నిర్మాణాలకు బ్యాంకులు లోన్లు ఇస్తున్నందున వీటి నిర్మాణానికి పెద్ద రైతులు ముందుకు వచ్చేలా ప్రొత్సహించాలని జిల్లా అగ్రికల్చర్​ ఆఫీసర్​కు సూచించారు. 

మహిళ సంఘాలకు 100 శాతం లోన్లు ఇవ్వాలన్నారు. ఎస్సీ, ఎస్టీ కార్పొరేషన్ల ద్వారా సబ్సిడీ మంజూరై, పెండింగ్​లో ఉన్న యూనిట్లను ఆలస్యం లేకుండా గ్రౌడింగ్​ చేయాలన్నారు. కిసాన్​ క్రెడిట్​కార్డు స్కీమ్​ కింద పాడి రైతులు, గొర్రెల పెంపకం దారులకు మార్టిగేజ్​ లేకుండా లోన్లు శాంక్షన్​ చేయాలన్నారు. రైతులకు రుణాలు ఇవ్వటంతో బ్యాంకర్లు ఉదారంగా వ్యవహారించాలన్నారు.

 వివిధ స్కీమ్​ల కింద వచ్చిన అప్లికేషన్లను త్వరగా పరిశీలించి గ్రౌండ్​ అయ్యేలా చూడాలన్నారు. మహిళ పారిశ్రామిక వేత్తలను ప్రొత్సహించేందుకు యూనియన్​ బ్యాంక్​ ఆఫ్​ ఇండియా నారీశక్తి పోగ్రాంను చేపట్టిందని, ఈ స్కీమ్​ కింద ప్రాసెసింగ్​ చార్జీలు లేకుండా రూ. 2 కోట్ల వరకు లోన్లు ఇవ్వవచ్చన్నారు. దీనికి ద్వారా మహిళలు ఆర్థికంగా నిలదొక్కుకోవటంతో పాటు ఉపాధి కల్పించవచ్చన్నారు. అడిషనల్ కలెక్టర్​ శ్రీనివాస్​రెడ్డి, లీడ్ బ్యాంక్​ మెనేజర్​ రెహమాన్​, ఎస్​బీఐ రీజినల్​ మెనేజర్​ శ్రీనివాస్​, కెనరా బ్యాంక్ డీఎం తోరణ్​, ఆయా బ్యాంకు ఆఫీసర్లు, ఆయా శాఖల జిల్లా ఆఫీసర్లు పాల్గొన్నారు.