నిక్కో అనే గ్రామం జపాన్లోని టొచిగి ప్రాంతంలో ఉంది. ఆధ్యాత్మిక నగరంగా పేరుగాంచిన ఈ ఊళ్లో ప్రకృతి రమణీయమైన దృశ్యాలు కళ్లను కట్టిపడేస్తాయి. చారిత్రక పుణ్యక్షేత్రాలు, ఆలయాలతో ఆహ్వానం పలికే నిక్కో యునెస్కో హెరిటేజ్ సైట్గా గుర్తించింది. మరి ఈ హెరిటేజ్ సైట్ స్పెషాలిటీ ఏంటో చూడండి.
నిక్కో... అనగానే ముందు జలపాతాలు గుర్తుకొస్తాయి. ఈ ఊళ్లో కెగన్ అనే అందమైన జలపాతం ఉంది. ఈ జలపాతం నిక్కోలోని మూడు పెద్ద జలపాతాల్లో ఒకటి. దీని ఎత్తు 97 మీటర్లు. నీళ్లు అంత పైనుంచి కిందకు దుముకుతున్న దృశ్యం చూసేందుకు రెండు కళ్లు చాలవు. ఇది ఈ ఊరికి నేచురల్ లాండ్ మార్క్. ‘కెగన్’ అనే పేరు బౌద్ధ పురాణాల్లోని కెగన్ – క్యొ (అవతమ్సక సూత్ర) మీదుగా వచ్చిందని పురాణాలు చెప్తున్నాయి. చుజెంజి సరస్సు నుంచి కాలువ ద్వారా నీళ్లు ఈ జలపాతానికి చేరుకుంటాయి. ఈ జలపాతాన్ని చూస్తూ ఆధ్యాత్మికతని అనుభూతి చెందొచ్చట.
చుజెంజి సరస్సు
ఈ సరస్సు నిక్కో నేషనల్ పార్క్లో ఉంది. ఇది 20 వేల ఏండ్ల కిందట అగ్నిపర్వతం బద్దలైనప్పుడు ఏర్పడింది. టొచిగి ప్రాంతంలోనే అతి పెద్ద సరస్సు ఇది. దీని చుట్టుకొలత 25 కిలో మీటర్లు. దీన్ని జపాన్లోనే అతి ఎత్తయిన ప్రదేశంలో ఉన్న సరస్సుగా పిలుస్తారు. ప్రస్తుతం ఈ సరస్సు ఉన్న ప్రాంతంలో అంతర్జాతీయ విజిటర్స్ కోసం వేసవి రిసార్ట్లుగా వాడుతున్నారు. ఈ సరస్సు ఒక్కో సీజన్కి ఒక్కోలా మారుతుంటుంది. ట్రెక్కింగ్, పిక్నిక్కి ఈ ప్లేస్ బాగా సూట్ అవుతుంది.
యుదకి ఫాల్స్
నిక్కోలో ఉన్న మూడు గ్రేట్ వాటర్ ఫాల్స్లో ఒకటి యుదకి. ఇది నిక్కో గ్రామానికి మధ్యలో ఉంది. దీని ఎత్తు 70 మీటర్లు. సెంజొగహర అనే ప్రాంతం నుంచి టొచిగి వరకు హైకింగ్ చేయొచ్చు. ఆ దారిలోనే ఈ జలపాతం కనిపిస్తుంది. దీనికి యునొకొ సరస్సు నుంచి నీరు ప్రవహిస్తుంది. పిక్నిక్ కోసం చాలామంది ఈ జలపాతం దగ్గరకి వెళ్తుంటారు. ఇక ఫొటోగ్రాఫర్ల క్లిక్స్కి అయితే అలుపు ఉండదు ఇక్కడ. అంత అందంగా ఉంటుంది ఈ ప్రదేశం.
అకెచిదైరా
చుజెంజి సరస్సుకి తూర్పున అకెచిదైరా అనే బ్యూటిఫుల్ ప్లేస్ ఉంది. ఇక్కడ ఆటమ్ సీజన్లో కనిపించే ఆకులు ఎంత అందంగా ఉంటాయో మాటల్లో చెప్పలేం. ఇది సముద్ర మట్టానికి దాదాపు1,437 మీటర్ల ఎత్తులో ఉంటుంది. ఇక్కడికి రోప్ వే ద్వారా వెళ్లాలంటే మూడు నిమిషాలు పడుతుంది. ఇక్కడ నుంచి చూస్తే నిక్కో లోని చుజెంజి సరస్సు, కెగన్ ఫాల్స్, మౌంట్ నాంటై వంటివి చాలా బాగా కనిపిస్తాయి. అందుకే దీన్ని ‘అకెచిదైరా అబ్జర్వేషన్ ప్లాట్ ఫాం’ అని అంటారు. వీటితోపాటు స్టీల్ టవర్ని కూడా చూడొచ్చు. అది అబ్జర్వేషన్ ప్లాట్ ఫాం నుంచి ఇరవై నిమిషాల ప్రయాణ దూరంలో ఉంటుంది.
తొషు-గు పుణ్యక్షేత్రం
నిక్కోలో తొషు–గు అనే పుణ్యక్షేత్రం ఉంది. అయితే, ఎడో పిరియడ్లో ఈయసు తొకుగవ దీన్ని ఏర్పాటు చేసింది. ఈ చరిత్రలోకి వెళ్తే.. 1616లో ఈయసు అనే వ్యక్తి చనిపోయాక దేవతగా వెలిసిందని నమ్ముతారు. విదేశీయులు కూడా ఇక్కడికి వస్తుంటారు. అయితే, ఈ ప్రదేశంలో 55 బిల్డింగ్లు, ఎనిమిది నేషనల్ ట్రెజర్స్, 34 ముఖ్యమైన కల్చరల్ ప్రాపర్టీస్ ఉన్నాయి. ఈ కాంప్లెక్స్ని1999లో యునెస్కో వరల్డ్ హెరిటేజ్ సైట్గా గుర్తించారు. అందులో నిక్కో ఆలయాలు, పుణ్యక్షేత్రాలు ఉన్నాయి.
రిన్నొ–జి టెంపుల్
ఈ గ్రామంలో నిక్కోసన్ రిన్నో–జి అనే పేరుతో ఒక ఆలయం ఉంది. దానికి1250 ఏండ్ల నాటి గొప్ప చరిత్ర ఉంది. మెయిన్ టెంపుల్లో సన్బుట్సుడొ హాల్ ఉంటుంది. అది పెద్ద చెక్కతో నిర్మించిన నిర్మాణాల్లో ఇది ఒకటి. అందులో 7.5 మీటర్ల ఎత్తులో బౌద్ధ విగ్రహాలు ఉంటాయి. విజిటర్స్ ఈ హాల్తోపాటు గొమదొ హాల్ని కూడా చూడొచ్చు. అక్కడ అదృష్ట దేవుళ్ల విగ్రహాలు ఉంటాయి. అంతేకాకుండా కల్చరల్ ప్రాపర్టీస్తోపాటు.. జపనీస్ ట్రెడిషనల్ స్టయిల్లో కట్టిన షొయొయెన్ గార్డెన్, కొలను చూడొచ్చు.
ఫుతరసన్ - జింజా ష్రైన్
కొండ మీద ఆరాధనకు కేంద్రం ఈ పుణ్యక్షేత్రం. ఇది నిక్కోలోని మూడు వరల్డ్ హెరిటేజ్ సైట్లలో పురాతనమైనది. ఇక్కడ ఎరుపు రంగు బ్రిడ్జ్ ఉంటుంది. ఇక్కడ ఆర్కిటెక్చర్, గార్డెన్స్ ఎంతో అందంగా ఉంటాయి. ఈ పుణ్యక్షేత్రానికి పెండ్లి కావాలని, తల్లి కావాలని, ప్రసవం సురక్షితంగా జరగాలని ప్రార్ధించేందుకు వస్తుంటారు.
నాన్టైసన్ పర్వతం
జపాన్లోని వంద ఫేమస్ పర్వతాల్లో ఇది ఒకటి. నిక్కో నేషనల్ పార్క్లో ఉంది. ఇక్కడ కూడా ప్రార్థనలు చేస్తారు. ఇక్కడి నుంచి చుగుషి ప్రదేశానికి నడుచుకుంటూ వెళ్లొచ్చు. అక్కడున్న రాతి మెట్లు ఎక్కి పైనున్న ఒకుమియా పుణ్యక్షేత్రానికి చేరుకోవచ్చు. ఇక్కడికి మే 5 నుంచి అక్టోబర్ మధ్య మాత్రమే అనుమతిస్తారు. ఈ కొండ ఎక్కడానికి దాదాపు నాలుగు గంటలు పడుతుంది.
సెంజొగహర
అతిపెద్ద పీఠభూమి సెంజొగహర. ఇక్కడ 350 జాతులకు పైగా మొక్కలతోపాటు అడవి పక్షులు ఉంటాయి. రామ్సర్ కన్వెన్షన్ దీని సంరక్షణ బాధ్యతలు చూసుకుంటుంది. ఇక్కడ చెక్కదారుల్లో హైకింగ్ చేస్తుంటే విరబూసిన పూలు వెల్కం చెప్తాయి. ఏపుగా పెరిగిన గడ్డి ఆరెంజ్ రంగు నుంచి ఎరుపు రంగులోకి మారుతుంది. ఇలాంటిదే ఒడషిరొగహర పీఠభూమి. దీని చుట్టూ మంగోలియన్ ఓక్ చెట్ల అడవి ఉంటుంది. ఆ దారిలో నడుస్తూ నేచర్ని ఆస్వాదించొచ్చు. అలాగే జపనీస్ వైట్ బిర్చ్ చెట్టు ఒకటి ఇక్కడ ఉంటుంది. దాన్ని ‘లేడీ ఆఫ్ ఒడషిరొగహర’ అంటారు. ఇక్కడ ఫొటోలు తీసుకోవడానికి పాపులర్ స్పాట్.
కిరిఫురి కొగెన్ హైలాండ్స్
కిరిఫురి కొగెన్ హైలాండ్స్ అకనగిసన్ అనే పర్వతం పక్కన ఉన్న పీఠభూమిలో కనిపిస్తాయి. ఇక్కడ హైకింగ్ చేయొచ్చు. ప్రతి ఏటా జూన్ అయిపోయే టైంలో 260 వేల లిల్లీ పూల అందాలను చూడొచ్చు. అలాగే1445 మెట్లు కలిగిన టెంకు కైరో లేదా కారిడార్ ఇన్ ద స్కై ఎక్కుతూ ఈ ప్రదేశాన్ని చూడొచ్చు. ఇక్కడ క్యాంప్ సైట్స్ ఉన్నాయి. వింటర్లో స్పోర్ట్స్, స్కీయింగ్, స్నో షోయింగ్ చేయొచ్చు.
అందమైన అగాధం
ఒకసారి నాన్టైసన్ పర్వతం కోతకు గురైంది. దైయగవ నది గుండా లావా ప్రవహించి అగాధం ఏర్పడింది. దాన్ని కన్మన్గఫుచి గోర్జ్ అంటారు. అక్కడ 70 రాతి ‘జిజో’ విగ్రహాల వరుస ఉంటుంది. అయితే వాటిని ఎన్నిసార్లు లెక్కపెడితే అన్ని సార్లు లెక్క మారుతుందని చెప్తారు. అంతేకాదు.. సంస్కృతంలోని కొన్ని క్యారెక్టర్స్ని కూడా అక్కడ చూడొచ్చు.
వండర్ లాండ్
17వ శతాబ్దానికి చెందిన ఎడో వండర్లాండ్ని అక్కడ చూడొచ్చు. అక్కడ ట్రెడిషనల్ ఆర్కిటెక్చర్, నింజా థియేటర్, పిల్లల కోసం గేమ్స్, యాక్టివిటీస్ ఉంటాయి. నిక్కో లోకల్ స్పెషల్ రెసిపీ యుబ లేదా టొఫు స్కిన్ రుచి చూడాల్సిందే. దీన్ని సోయాబీన్తో తయారుచేస్తారు.
సమురాయ్ మార్చ్
నిక్కోలో ఏటా రెండు రోజుల పాటు యాన్యువల్ ఫెస్టివల్ జరుగుతుంది. వాటిలో యబుసమె అనే ఆచారం హైలైట్. ప్రతి ఏడాది మే17న జరిగే ఈ ఆచారంలో గుర్రాల మీద ఎక్కి బాణాలు విసురుతూ సాహసాలు చేస్తారు. మే18న వెయ్యి మంది మగవాళ్లు ట్రెడిషనల్ సమురాయ్ వారియర్స్గా గెటప్ వేసుకుంటారు. వాళ్లంతా వీధుల్లో మార్చ్ చేస్తూ ఈయసు సమాధి వరకు వెళ్తారు.
స్నో ఫెస్టివల్
కమకుర స్నో హౌస్ ఫెస్టివల్ అనేది యునిషిగవ అనే టౌన్లో జరుగుతుంది. టొచిగి పర్వతాల కింద చిన్న చిన్న ఇగ్లూ హౌస్లు కట్టుకుని ఆ ఫెస్టివల్ చేస్తారు. ఆ హౌస్లను ‘కమకుర’ అని పిలుస్తారు. రాత్రిపూట అవి వెలుగులతో నిండి ఉంటాయి. ఆ దృశ్యం చూడముచ్చటగా ఉంటుంది. ఉదయం పూట వింటర్ స్పోర్ట్స్ జరుగుతాయి.
ఇన్ని విశేషాలున్న నిక్కో గ్రామం చేరుకోవాలంటే.. జపాన్లోని ఫుకుషిమ ఎయిర్ పోర్ట్లో దిగి అక్కడి నుంచి ట్యాక్సీల్లో వెళ్లాలి.
పూర్వం నిక్కో వెళ్లే దారిలో 50 వేల దేవదారు చెట్లు ఉండేవి. ఈ దారి వేయడానికి 20 ఏండ్లు పట్టింది. అయితే 35.41 కిలో మీటర్ల వరకు ఉన్న ఈ దారి ‘లాంగెస్ట్ ట్రీ లైన్డ్ రోడ్ ఇన్ ది వరల్డ్’గా గిన్నిస్ బుక్లో ఎక్కింది.
