టైటిల్ : శేషమ్ మైక్ - ఇల్ ఫాతిమా
డైరెక్షన్ : మను సి కుమార్
కాస్ట్ : కల్యాణి ప్రియదర్శన్, షహీన్ సిద్దిఖి, గౌతమ్ వాసుదేవ్ మేనన్, అనీష్, ప్రియా శ్రీజిత్, సుధేశ్
లాంగ్వేజ్ : మలయాళం, తెలుగు, తమిళం, కన్నడ, హిందీ
ప్లాట్ ఫాం : నెట్ ఫ్లిక్స్
ఫాతిమా(కల్యాణి ప్రియదర్శన్) చురుకైన అమ్మాయి. ఎప్పుడూ మాట్లాడుతూ ఉంటుందని ఆమెని ‘వాగుడుకాయ’ అని పిలుస్తుంటారు. ఫాతిమా తండ్రి మునీర్ (సుధేశ్), అన్నయ్య ఆసిఫ్ (అనీష్) మెకానిక్ షెడ్ నడుపుతుంటారు. తల్లి (ప్రియా శ్రీజిత్) కుటుంబాన్ని నడుపుతుంటుంది. మునీర్ పరువు ప్రతిష్టలే ప్రాణంగా భావిస్తుంటాడు. ఫాతిమాకి చిన్నప్పటినుంచీ ఫుట్బాల్ అంటే ఇష్టం.
మగపిల్లలు తనని ఆడనీయరు. దాంతో వాళ్లు ఆడుతుంటే తను కామెంట్రీ చెప్పేది. కాలేజీకి వచ్చేసరికి ఫుట్బాల్ టోర్నమెంట్లకు కామెంటేటర్గా ఫాతిమాకి మంచి పేరు వస్తుంది. దాంతో ఇంటర్నేషనల్ ఫుట్బాల్ మ్యాచ్లకు కామెంటేటర్గా వ్యవహరించాలనే కోరిక ఆమెలో బలపడి, ఆ ప్రయత్నాలు మొదలుపెడుతుంది. దాన్ని కుల పెద్దలు విమర్శిస్తారు. మునీర్ ఆమెకి పెండ్లి సంబంధాలు తెస్తుంటాడు. తన కాళ్లపై తాను నిలబడిన తరువాతనే పెండ్లి చేసుకుంటానని చెప్పి ఆమె కొచ్చి వెళ్లి తన ప్రయత్నాలు మొదలుపెడుతుంది. అప్పుడే చేయని తప్పుకి నిషేధానికి గురైన ఫుట్బాల్ ప్లేయర్ సాలొమన్ (షాహిన్ సిద్దిఖీ)తో పరిచయం అవుతుంది. ఆ తరువాత ఎన్నో అడ్డంకులు, ఆటుపోట్లు ఎదురవుతాయి. మరి ఇంతకీ ఫాతిమా తను అనుకున్న లక్ష్యాన్ని చేరుకుంటుందా?
వీరప్పన్ జీవితంలో...
టైటిల్ : కూసె మునిసామి వీరప్పన్
డైరెక్షన్ : శరత్ జోతి
కాస్ట్ : కూసె మునిస్వామి వీరప్పన్, నక్కీరన్ గోపాల్, సీమన్, ఎన్ రాం, పా పా మోహన్, సుబ్రమణ్యన్, అలెగ్జాండర్ ఐ.పి.ఎస్, రోహిణి, జీవ తంగవేల్, మోహన్ కుమార్, ధమయంత్
లాంగ్వేజి : తమిళ, తెలుగు, కన్నడ, హిందీ (ఆరు ఎపిసోడ్లు), ప్లాట్ ఫాం : జీ 5
వీరప్పన్ స్వయంగా తన గురించి, తన జీవితం గురించి చెప్పిన అంశాల ఆధారంగా తెరకెక్కిన డాక్యుమెంటరీ సిరీస్ ‘కూసె మునిసామి వీరప్పన్’. 1993, 1996 మధ్య కాలంలో వీరప్పన్ను ఇంటర్వ్యూ చేసేందుకు అడవిలోకి వెళ్లిన గోపాల్ అనే రిపోర్టర్ చేసిన వీడియోలు ఈ సిరీస్లో ఉంటాయి.
వేటగాళ్ల కుటుంబంలో ఐదుగురు పిల్లల్లో రెండో వాడు కూసె మునిసామి వీరప్పన్(శంతన కడతల వీరప్పన్). చిన్న వయసులో ఆకలిని జయించేందుకు కుటుంబ వృత్తి అయిన వేట మొదలుపెట్టాడు. ఆకలి తీర్చుకోవడం కోసం మొదలైన వేటతో కాలక్రమేణా కోట్ల రూపాయల డబ్బు సంపాదించాడు. తమిళనాడు – కర్నాటక సరిహద్దుల్లో ఉన్న అడవుల్లో కంటపడిన ప్రతి గంధపు చెట్టును నరికి, ఏనుగులను చంపి దంతాలు అమ్మేవాడు. ఈ క్రమంలో వందలమంది ప్రాణాలు తీశాడు.
మొదటి మూడు ఎపిసోడ్స్ బాల్యంలో పేదరికం, ఆకలికోసం చేసిన వేట గురించి ఉంటుంది. నాలుగో ఎపిసోడ్ను సున్నిత మనస్కులు చూడడం కొంచెం కష్టం. కొన్ని సమయాల్లో చిన్న పిల్లలను కూడా వదిలిపెట్టలేదని అతనే చెప్పిన మాటలు వింటే వెన్నులో వణుకు పుడుతుంది. ఆఖరి ఎపిసోడ్లో వీరప్పన్ను ఒక వర్గం ప్రజలు ఎలా ఆదరించారు? రాజకీయ సిద్ధాంతాలు. జయలలితమీద వ్యతిరేకత ఎందుకు? వంటి ఎన్నో విషయాలు ఉన్నాయి. మొదటి సీజన్ చూసిన వాళ్లు రెండో సీజన్ కోసం ఎదురుచూడడం మాత్రం ఖాయం.
కాశీ ప్రయాణం
టైటిల్ : ఫాలిమీ
డైరెక్షన్ : నితీష్ సహదేవ్
కాస్ట్ : బసిల్ జోసెఫ్, జగదీష్, మంజు పిళ్లై
లాంగ్వేజ్ : మలయాళం
ప్లాట్ ఫాం : డిస్నీ హాట్స్టార్
జయజయజయజానకి సినిమాతో తెలుగు ప్రేక్షకులకు ఓటీటీ ద్వారా పరిచయం అయిన జోసెఫ్ ఈ ఫాలిమీ మూవీతో వచ్చాడు.రెమా(మంజు పిళ్లై), చంద్రన్(జగదీష్) ఇద్దరు భార్యాభర్తలు. వాళ్లకి ఇద్దరు కొడుకులు. చంద్రన్ వాళ్ల నాన్నతో కలిసి అందరూ సరదాగా ఉంటారు. ప్రతీ మధ్యతరగతి కుటుంబంలో ఉండే చిన్న చిన్న గొడవల మాదిరి రెమా, చంద్రన్ల కుటుంబ జీవితం సాగుతుంటుంది. చంద్రన్ తండ్రికి కాశీకి వెళ్లాలి అని ఉంటుంది.
కాశీకి వెళ్లాలని ఇంట్లో ఎవరికీ చెప్పకుండా రైల్వేస్టేషన్కి వెళ్తుంటే మూడుసార్లు పట్టుకుంటారు. ఇబ్బందుల్లో ఉన్న ఫ్యామిలీ కోసం చంద్రన్ పెద్ద కొడుకు బసిల్ ఒక డబ్బింగ్ స్టూడియోలో ఉద్యోగం చేస్తుంటాడు. అతనికి ఎన్ని పెండ్లి సంబంధాలు వచ్చినా సెట్ కావు. మరోవైపు చంద్రన్ చిన్న కొడుకు అల్లరిచిల్లరిగా తిరుగుతూ డబ్బులు వేస్ట్ చేస్తుంటాడు. ఇదంతా ఇలా ఉంటే సహకార బ్యాంకులో అందుబాటులో ఉన్న లోన్లన్నీ తీసుకుని వాటికి వడ్డీ కూడా కట్టలేని పరిస్థితిలో చంద్రన్ కుటుంబం ఉంటుంది.
ఇలాంటి క్లిష్ట పరిస్థితుల్లో చంద్రన్ కుటుంబం కాశీకి బయల్దేరుతుంది. ఆ ప్రయాణం సక్సెస్ అయిందా? వాళ్లకి ఏవైనా ఇబ్బందులు ఎదురయ్యాయా? అనేదే మిగతా కథ. మొదట్లో నెమ్మదిగా ఉన్నట్టు అనిపించినా ఇంటర్వెల్ తర్వాత నుంచి కథలో వేగం పెరుగుతుంది. దాదాపు ప్రతి సీన్ కామెడీగా ఉంటుంది.
