టెక్నాలజీని అందిపుచ్చుకుని ఎప్పటికప్పుడు కొత్త ఆవిష్కరణలు తెస్తుంటాడు ఎలాన్ మస్క్. డ్రైవర్ లేకుండా నడిపే కారు టెస్లా వచ్చేవరకు ఊహించని విషయం. కానీ, మస్క్ తలచుకుంటే ఊహల్లో ఉన్నవాటికి రూపం పోయగలడు అని ప్రూవ్ చేశారు.
ఇప్పుడు అదే వరుసలో మరో కొత్త ఆవిష్కరణ చేశాడు. అదే.. మైక్రోచిప్ ఎన్1. ఈ చిప్ని మనిషి మెదడులో అమర్చడానికి కొన్నేండ్లుగా ప్రయోగాలు జరుగుతున్నాయి. ప్రస్తుతం ఆ ఎక్స్పరిమెంట్ ఫలించిందని చెప్పాడు మస్క్. ఇంతకీ మనిషి బుర్రలో చిప్ పెట్టడం వల్ల ఎలాంటి లాభం? అదసలు ఎలా ఉపయోగపడుతుంది?
మస్క్కు సంబంధించిన సంస్థ ‘న్యూరాలింక్’ మైక్రోచిప్ల తయారీపై ప్రయోగాలు చేస్తోంది. నాడీ సంబంధిత రోగులు, బ్రెయిన్ స్ట్రోక్ వల్ల కమ్యూనికేషన్ సామర్థ్యం కోల్పోయిన వాళ్లకు ఈ చిప్ బాగా ఉపయోగపడుతుంది! అదెలాగంటే.. గతంలో స్విట్జర్లాండ్కు చెందిన సైంటిస్ట్లు పక్షవాతం బారిన పడిన గెర్ట్ జాన్ అనే వ్యక్తిని తిరిగి మామూలు స్థితికి తెచ్చేందుకు అతని మెదడులో చిప్ పెట్టారు.
దెబ్బ తిన్న అతని మెదడు, వెన్నెముక మధ్య వైర్లెస్ కనెక్షన్ ఇచ్చారు. దాంతో మెదడు ఇచ్చే సిగ్నల్స్ను ఏఐ ద్వారా ట్రాన్స్లేట్ చేసి వెన్నెముకకు పంపుతుంది ఆ చిప్. పక్షవాతం వల్ల పన్నెండేండ్లు బెడ్ మీద ఉన్న వ్యక్తి... చిప్ పెట్టాక నడవగలిగాడు. మెడికల్గా ఇలాంటి పరిస్థితుల్లో ఉన్న వాళ్లకు మైక్రో చిప్లు తయారుచేయాలనే ఉద్దేశంతోనే ఈ ఆలోచన చేసింది న్యూరాలింక్.
ఎప్పుడు మొదలైంది?
కంప్యూటర్తో మనిషి మెదడు కనెక్ట్ అయ్యేలా చేసే ‘బ్రెయిన్ – కంప్యూటర్ ఇంటర్ ఫేస్’ (బిసిఐ) ఎక్స్పరిమెంట్స్కు అమెరికా ‘ఫుడ్ అండ్ డ్రగ్ అడ్మినిస్ట్రేషన్’ (ఎఫ్డిఏ) పోయినేడాది పర్మిషన్ ఇచ్చింది. ఇప్పటికే పందులు, కోతుల్లో న్యూరాలింక్ చిప్ను సక్సెస్ఫుల్గా టెస్ట్ చేశారు. ఈ డివైజ్ సురక్షితమైనది, నమ్మకమైనదని చెప్తున్నారు ఆ న్యూరాలింక్ సైంటిస్ట్లు. దీని సాయంతో ఒక కోతి ‘పాంగ్’ అనే వీడియోగేమ్ను కూడా ఆడింది. ప్రస్తుతం ఒక వ్యక్తి మెదడులో ఈ చిప్ అమర్చారు.
ఇలా పనిచేస్తుంది..
ఎన్1 చిప్కి సన్నటి అంటే... వెంట్రుక కంటే తక్కువ మందం కలిగిన ఎలక్ట్రోడ్లు ఉంటాయి. ఇంకా సరిగ్గా చెప్పాలంటే వెంట్రుకలో 20వ వంతు. ఈ ఎలక్ట్రోడ్లు ఎటైనా వంగుతాయి. న్యూరాన్ల నుంచి వచ్చే సిగ్నల్స్ని అవి చిప్కు పంపిస్తాయి. ఒక చిప్లోని ఎలక్ట్రోడ్లు వెయ్యి న్యూరాన్ల చర్యలను అబ్జర్వ్ చేస్తాయి. అంటే, ఈ విధంగా ఒక మనిషికి10 చిప్లు పెట్టొచ్చు.
ఒకసారి చిప్ ఇన్స్టాల్ చేశాక మెదడు నుంచి ఎలక్ట్రికల్ సిగ్నల్స్ను పంపడం, రిసీవ్ చేసుకోవడం, ప్రేరేపించడం వంటివి చేస్తుంది. ప్రమాదాల వల్ల పూర్తిగా మాట పడిపోయిన వ్యక్తులు వాళ్ల ఆలోచనల్ని ఈ చిప్ సాయంతో పంచుకోగలుగుతారు. అదెలాగంటే... ఆ వ్యక్తి మెదడులోని ఆలోచనలు చిప్ ద్వారా కంప్యూటర్ లేదా ఫోన్కు అందుతాయి. అందిన సమాచారాన్ని కంప్యూటర్ డీకోడ్ చేసి అక్షరాల రూపంలో చూపిస్తుంది. ముఖ్యంగా పక్షవాతం బారిన పడినవాళ్లు మెదడు ద్వారా సిగ్నల్స్ పంపొచ్చు.
రోబో సాయంతో సర్జరీ
ఈ చిప్ని పుర్రెలో పెట్టేందుకు ఒక సర్జరీ చేస్తారు. పుర్రె మీద చిన్న భాగాన్ని తీసి, రంధ్రం చేసి ఎన్1 డివైజ్పెడతారు. అయితే, ఈ చిప్ పెట్టేది మనుషులు కాదు. రోబో. సరైన ప్లేస్లో సరిగ్గా అమర్చేందుకు రోబోను కూడా తయారుచేసింది న్యూరాలింక్ సంస్థ. ఈ చిప్ బ్యాటరీ వైర్లెస్ పద్ధతిలో ఛార్జింగ్ అవుతుంది. అయితే ఇలాంటి ఎక్స్పరిమెంట్స్ను న్యూరాలింక్ సంస్థ ఒక్కటే కాకుండా.. మరికొన్ని కంపెనీలు కూడా చేస్తున్నాయి. ఆస్ట్రేలియాకు చెందిన ‘సింక్రాన్’ అనే సంస్థ 2022 జులైలో అమెరికాకు చెందిన ఒక వ్యక్తికి ఇలాంటి చిప్ అమర్చించింది. అయితే, న్యూరాలింక్ లాగ పుర్రె మీద కోత పెట్టలేదని ఆ కంపెనీ చెప్పింది.
