బొటాక్స్ను కండరాలకు సంబంధించిన డిజార్డర్స్, మైగ్రెయిన్స్, చెమటలను తగ్గించడానికి వైద్యంలో వాడే మెథడ్. అదే అందం విషయానికి వస్తే ముఖం చర్మం మీద ముడతలు, గీతలు తగ్గించేందుకు వాడుతున్నారు. అందం కోసం బొటాక్స్ వాడడం అనే విషయం మీద ఇప్పటికీ ఎన్నో వాదనలు నడుస్తూనే ఉన్నాయి. అయితే ముఖ చర్మాన్ని అందంగా, ఆరోగ్యంగా ఉంచుకునేందుకు బొటాక్స్ వరకు పోకుండా ఇంట్లో ఉండే కొన్ని ఇంగ్రెడియెంట్స్తోనే ట్రై చేయొచ్చు అంటున్నారు కాస్మొటిక్ ఎక్స్పర్ట్స్. వాటివల్ల ఎటువంటి సైడ్ ఎఫెక్ట్స్ లేకుండానే కోరుకున్న రిజల్ట్ పొందొచ్చు అంటున్నారు కూడా.
నేచురల్ బొటాక్స్ ఇంట్లోనే తయారుచేసుకోవచ్చు. అందుకు రెండు రకాల పద్ధతులు ఉన్నాయి. ఈ రెండు పద్ధతులకు కూడా మూడు ఇంగ్రెడియెంట్స్ చాలు. వీటి తయారీ కూడా చాలా ఈజీ.
మొదటి పద్ధతి
కావాల్సినవి...
ఒక టేబుల్ స్పూన్ కార్న్ స్టార్చ్( మొక్కజొన్న పిండి), ఒక టేబుల్ స్పూన్ సోర్ క్రీమ్(పుల్లటి మీగడ), ఐదు టేబుల్ స్పూన్ల క్యారెట్ జ్యూస్.
సోర్ క్రీమ్ తయారీ కోసం... ఒక టేబుల్ స్పూన్ నిమ్మ రసాన్ని, రెండు టీస్పూన్ల పెరుగులో వేయాలి. స్పూన్తో బాగా కలిపితే చిక్కగా అవుతుంది. దాన్ని ఒక గాజు సీసాలో వేయాలి. టిష్యూ పేపర్ని మూతలా పెట్టి రబ్బర్ బ్యాండ్ లేదా తాడుతో గట్టిగా కట్టాలి. రూమ్ టెంపరేచర్లో ఒక రోజంతా ఉంచాలి. తరువాత తాడు విప్పి, మూతగా పెట్టిన టిష్యూ పేపర్ తీసేయాలి. స్పూన్తో బాగా కలిపితే చిక్కటి సోర్ క్రీమ్ రెడీ. ఫ్రిజ్లో పెడితే ఇది పదిరోజులు పాడుకాకుండా ఉంటుంది.
బొటాక్స్ మాస్క్ తయారీ
అరగ్లాస్ నీళ్లలో కార్న్స్టార్చ్ వేసి కరిగించాలి. ఈ మిశ్రమాన్ని మరుగుతున్న నీళ్లలో పోయాలి. ఇది దాదాపు వంద మిల్లిలీటర్లు అయితే చాలు. సన్నటి మంట మీద ఈ మిశ్రమం చిక్కగా అయ్యేవరకు ఉడికించాలి. చల్లారాక తాజా క్యారెట్ రసం, సోర్ క్రీమ్ వేసి, అన్నీ కలిసేలా బాగా కలపాలి. తరువాత ముఖాన్ని శుభ్రంగా కడిగి, తయారుచేసుకున్న బొటాక్స్ మాస్క్ను ముఖం మీద పూసుకోవాలి.
అరగంటయ్యాక గోరువెచ్చని నీళ్లతో కడిగేయాలి. తరువాత మాయిశ్చరైజర్ లేదా నౌరిషింగ్ క్రీమ్ రాసుకోవాలి. ఈ బొటాక్స్ మాస్క్ను వరసగా మూడు రోజులు వాడాలి. ఒకసారి వేసుకున్నాక మిగిలిన మాస్క్ మిశ్రమాన్ని రిఫ్రిజిరేటర్లో పెట్టాలి. మూడు రోజులు నేచురల్ బొటాక్స్ ట్రీట్మెంట్ పూర్తయ్యాక చర్మం మీద ముడతలు కాస్త తగ్గినట్టు మీకే తెలుస్తుంది. చర్మం హైడ్రేట్గా ఉంటుంది. స్కిన్ డల్నెస్ తగ్గుతుంది. మృదువుగా అవుతుంది. చర్మం టైట్ అయినట్టు కూడా గమనించొచ్చు.
మాస్క్ వేసుకున్నాం సరే బొటాక్స్లా ఎలా పనిచేస్తుంది అనే అనుమానం రావడం సహజం. ఎందుకు పనిచేస్తుందో అర్థం కావాలంటే ఈ మాస్క్కు వాడిన పదార్థాల గురించి తెలుసుకోవాలి.
కార్న్ స్టార్చ్ అనేది నిర్జీవంగా ఉండే చర్మానికి జీవం పోస్తుంది. ఇందులో యాంటీ ఏజింగ్ గుణాలు చాలా ఉన్నాయి. కార్న్స్టార్చ్ చర్మం మీద ఉండే అధిక జిడ్డును పీల్చేస్తుంది. చర్మాన్ని మెరిసేలా చేయడమే కాకుండా ముఖం మీద ఒక్కో దగ్గర ఒక్కోలా ఉండే రంగును కూడా సమం చేస్తుంది. అందుకు కారణం ఇందులో ఎక్కువగా ఉండే విటమిన్ –ఎ. ఇందులోని క్యాల్షియం, ఐరన్లు కొత్త కణాలు తయారుచేస్తాయి.
సోర్ క్రీమ్లో చర్మం మీద సానుకూల ప్రభావాన్ని చూపే గుణాలు బోలెడు. అందుకు ప్రధాన కారణం ఇందులోని లాక్టిక్ యాసిడ్. ఇది డెడ్ సెల్స్ను పోగొడుతుంది. కొల్లాజెన్ ఉత్పత్తికి ఉపయోగపడుతుంది. లాక్టిక్ యాసిడ్లో చర్మం మీద తేమను నిలిపేందుకు సాయం చేసే కంటెంట్ ఉంది.
క్యారెట్ జ్యూస్ ఇది చర్మానికి చాలా రకాలుగా ఉపయోగపడుతుంది. ఇందులో ఉండే ఒక్కో విటమిన్ ఎలా పనిచేస్తుందో చూద్దాం.
విటమిన్ ఎ : యాక్నె ట్రీట్మెంట్కు చాలా బాగా పనిచేస్తుంది. యాంటీ ఆక్సిడెంట్ కూడా. ఫ్రీ రాడికల్స్ ఎక్కువగా ఉత్పత్తి కానీయదు. యాంటీ ఏజింగ్కి బెస్ట్ ఆప్షన్.
విటమిన్ సి : కొల్లాజెన్ ప్రొడక్షన్ పెంచుతుంది. దాంతో చర్మం బిగుతుగా అవుతుంది. అలాగే ముఖం మీద ఉండే మచ్చలను తొలగిస్తుంది. చర్మం ఎర్రగా మారడం, వాపు వంటివి ఉంటే తగ్గిస్తుంది.
విటమిన్ ఇ : ఈ యాంటీ ఆక్సిడెంట్ చర్మానికి అవసరమైన తేమను అందిస్తుంది. నల్లటి మచ్చలు, గీతలు ఉంటే పోగొడుతుంది.
విటమిన్ కె : ఇది కూడా యాంటీ ఆక్సిడెంట్. అచ్చం విటమిన్–ఎ లాగానే ఫ్రీ రాడికల్ ఉత్పత్తిని క్రమపరుస్తుంది.
బీటా కెరోటిన్ : పొడిబారిన లేదా మృత చర్మాన్ని తొలగిస్తుంది. ముఖం మీద తేమను క్రమపరుస్తుంది. చర్మం మీద కొత్త కణాలను తయారుచేసేందుకు బాగా సపోర్ట్ చేస్తుంది.
పొటాషియం : పొటాషియం అనేది చర్మాన్ని హైడ్రేటెడ్గా ఉంచుతుంది.
రెండో పద్ధతి
ఈ పద్ధతిని డాక్టర్ ఓజ్ తయారుచేశారు. దీన్ని చాలా స్పీడ్గా, ఈజీగా చేసుకోవచ్చు. అయితే ఈ పద్ధతిలో పైన చెప్పుకున్న పద్ధతిలాగా రిజల్ట్ వెంటనే కనిపించదు.
మాస్క్ తయారీకి కావాల్సినవి – పావు కప్పు పెరుగు, పావు అరటిపండు, ఒక టీ స్పూన్ తేనె.
తయారీ
అరటిపండును మెత్తగా నలపాలి. అందులో పెరుగు, తేనె కలపాలి. ఈ మిశ్రమాన్ని ముఖం మీద రాసుకోవాలి. పావుగంటయ్యాక ముఖాన్ని చల్లటి నీళ్లతో కడిగేయాలి. తరువాత ముఖాన్ని తుడిచేటప్పుడు తుండుతో ఎలాగంటే అలా రుద్దకుండా సున్నితంగా మెత్తటి బట్టతో తడిని అద్దాలి. ఆ తరువాత రెగ్యులర్ స్కిన్ రొటీన్ ఫాలో అవ్వడమే.
డాక్టర్ ఓజ్ చెప్పిన ఈ అరటి పండు మాస్క్ తయారీ, వాడకం చాలా తేలిక. చర్మాన్ని రిఫ్రెష్ చేసేందుకు ఇది చాలా బాగా పనిచేస్తుంది. ఈ మాస్క్ వేసుకున్నాక చర్మం చాలా క్లీన్ అయినట్టు తెలిసిపోతుంది మీకే. స్మెల్ కూడా బాగుంటుంది. ఈ మాస్క్ చర్మాన్ని శుభ్రం చేయడమే కాకుండా చర్మం మీద ఉంటే ముడతలను కూడా ట్రీట్ చేస్తుంది.
ఈ మాస్క్ ఎలా పనిచేస్తుందంటే...
పెరుగులో లాక్టిక్ యాసిడ్ ఉంటుంది. ఈ యాసిడ్ చర్మం మీద మృత కణాలను తొలగించి చర్మాన్ని మృదువుగా చేస్తుంది. చర్మం మెరుస్తూ, తేమతో, మృదువుగా తయారవుతుంది. అంతేకాదు ముందుముందు చర్మానికి ఎటువంటి ఇబ్బంది రాకుండా కాపాడుతుంది. ఇందులో టన్నుల కొద్దీ యాంటీ ఏజింగ్ గుణాలు ఉన్నాయి.
తేనె చర్మానికి తేమను ఇవ్వడమే కాకుండా మంచి క్లెన్సర్ కూడా. ఇది వాడితే చర్మం మృదువుగా అవుతుంది. మెరుస్తుంది. ముఖం మీద ఉన్న సన్నటి గీతలను, ముడతలను పోగొడుతుంది. చర్మం మీది వాపు, ఎరుపుదనం తగ్గిస్తుంది. తేనె వల్ల చర్మం పొడి బారకుండా ఉంటుంది.
అరటిపండు వాడడం వల్ల చర్మం మీద ఉండే జిడ్డు తగ్గిస్తుంది. చర్మానికి తేమను ఇస్తుంది. యాక్నెకి ఇది మంచి ట్రీట్మెంట్. నల్లటి మచ్చలను కూడా తగ్గిస్తుంది. ఇది ఆర్గానిక్ బొటాక్స్ అన్నట్టు. చర్మానికి యాంటీ ఏజింగ్ ప్రాపర్టీస్ ఇస్తుంది.
వీటిలో ఉండే విటమిన్స్ ఎలా పనిచేస్తాయంటే...
విటమిన్ ఎ : విటమిన్ చర్మాన్ని మృదువుగా చేస్తుంది. డ్యామేజ్ అయితే సరిచేస్తుంది. గీతలు, మచ్చలు తగ్గిస్తుంది.
విటమిన్ బి : అరటిపండులో ఉండే బి – విటమిన్స్ స్ట్రెస్ తగ్గించి ఫ్రీ రాడికల్ ఉత్పత్తిని ఆపేస్తుంది.
విటమిన్ సి : కొల్లాజెన్ ఉత్పత్తిలో ఇది కీలకం. ఈ విటమిన్ చర్మం మీద జిడ్డును అదుపుచేస్తుంది. ఫ్రీ రాడికల్ ప్రొడక్షన్ను తగ్గిస్తుంది.
విటమిన్ ఇ : చర్మం ఏజింగ్ను నెమ్మదింపచేస్తుంది. ఫ్రీ రాడికల్స్ ఏర్పడనీయదు. ఎండ వల్ల చర్మం దెబ్బతినకుండా కాపాడుతుంది.
అమైనో యాసిడ్స్ : కనెక్టివ్ టిష్యూస్ను బూస్ట్ చేస్తాయి. చర్మానికి ఎలాస్టిసిటీని ఇస్తుంది. అయినప్పటికీ చర్మాన్ని స్ట్రాంగ్గా ఉంచుతుంది.
లెక్టిన్ : చెడు బ్యాక్టీరియాతో పోరాడుతుంది. అందుకే ముఖం మీద మొటిమలు ఏర్పడవు.
పొటాషియం : అరటిపండులో ఉండే ముఖ్యమైన పోషకం పొటాషియం. ఇది చర్మానికి తేమను ఇస్తుంది.
జింక్ : ఈ మినరల్ యాక్నె రాకుండా అడ్డుకుంటుంది. క్రిములతో పోట్లాడుతుంది. దాంతో ముఖ చర్మం శుభ్రంగా, స్పష్టంగా ఉంటుంది.
స్కిన్ ఏజింగ్ అనేది చాలా సాధారణ విషయం. దాన్ని ఆపేందుకు ముఖం నిండా బొటాక్స్ నింపుకోవడం వల్ల కోరుకున్న ఫలితం రాకపోవచ్చు. చాలామంది బొటాక్స్ లేదా సర్జరీలు చివరి ఆప్షన్ అనుకుంటారు. కానీ స్కిన్కి యంగ్ లుక్ ఇచ్చేందుకు సింపుల్ పద్ధతులు ఉన్నాయి.
చర్మ సంరక్షణ అనేది పైపై మెరుగులతో జరిగేది కాదు. అందుకు శరీరం, బుర్ర, ఆరోగ్యం అనేవి సరిగా ఉండాలి. అప్పుడే వయసు ప్రభావం చర్మం మీద కనిపించదు. అందుకని రిస్కీ ప్రత్యామ్నాయ మార్గాలకు బదులు ఇంట్లో ఉండే మూడే మూడు ఇంగ్రెడియెంట్స్తో నేచురల్ బొటాక్స్ ఎలా తయారుచేయాలో తెలుసుకున్నారు కదా! కొంచెం టైం, మరికొంచెం ఓపిక ఉంటే చాలు... ఈ పద్ధతులు వాడితే చర్మానికి నిగారింపు తేవచ్చు.
చియా గింజలతో...
మెరిసే చర్మానికి...
కావాల్సినవి : రెండు టేబుల్ స్పూన్ల చియా గింజలు, నాలుగు టేబుల్ స్పూన్ల నీళ్లు, ఒక టేబుల్ స్పూన్ తేనె
తయారీ : చియా గింజల్ని నీళ్లలో వేసి ఒక గంట లేదా అవి జెల్ లాగా మారేవరకు నానబెట్టాలి. వాటిని బ్లెండర్లో వేసి గ్రైండ్ చేయాలి. అందులో ఒక టేబుల్ స్పూన్ తేనె కలపాలి. ముఖం శుభ్రంగా కడిగి మాస్క్ను ముఖానికి రాసుకోవాలి. పావుగంట తరువాత గోరు వెచ్చని నీళ్లతో కడిగేయాలి.
తేమకోసం...
కావాల్సినవి : రెండు టేబుల్ స్పూన్ల చియా గింజలు, రెండు టేబుల్ స్పూన్ల అలోవెరా జెల్(కలబంద గుజ్జు). కావాలనుకుంటే ఆలివ్ లేదా ఆల్మండ్ ఆయిల్ వాడొచ్చు.
తయారీ : చియా గింజలను నీళ్లలో అరగంట నానబెట్టాలి. అవి జెల్లా అవుతాయి. తరువాత ఆ జెల్ని ఒక గిన్నెలో వడకట్టాలి. అందులో అలోవెరా జెల్ కలపాలి. కావాలనుకుంటే కొన్ని చుక్కల ఆలివ్ నూనె లేదా బాదం నూనె కలుపుకోవచ్చు.
ఈ మిశ్రమాన్ని శుభ్రం చేసిన ముఖం, మెడకు వేసుకోవాలి. పావుగంట తరువాత శుభ్రంగా కడిగేయాలి. చియా గింజలతో తయారుచేసిన ఈ ఫేస్ మాస్క్ల వల్ల లాభాలు బోలెడు. చియా గింజల్లో ఉండే ఒమెగా 3 ఫ్యాటీ యాసిడ్స్ మెండుగా ఉంటాయి. వాటివల్ల చర్మానికి పోషకాలు అందుతాయి. దానివల్ల చర్మం సహజంగా నూనె ఉత్పత్తి చేస్తుంది. దానివల్ల చర్మం తేమ కోల్పోదు. వాపు, మంట వంటివి ఉండవు. ఒక్కమాటలో చెప్పాలంటే హెల్దీ స్కిన్ సొంతం అవుతుంది. అలాగే సాధారణ చర్మ సమస్యలు రాకుండా నివారిస్తుంది. చియా గింజల్లో విటమిన్ ఎఫ్ ఉంటుంది. అది చర్మ ఆరోగ్యానికి, మెరుపుకి కారణం అవుతుంది.
సహజమైన ఈ పద్ధతులు వాడితే చర్మానికి పోషణ అందివ్వడమే కాకుండా స్కిన్ ఏజింగ్గురించి కూడా పోరాడతాయి. అదికూడా ఎటువంటి రిస్క్ లేకుండా!
