కాంగ్రెస్, బీజేపీలో లోక్​సభ ఎలక్షన్ ​సందడి

• బీఆర్ఎస్​కు కానరాని క్యాండిడేట్
• పోటీకి గులాబీ లీడర్ల వెనుకడుగు 
• పార్టీయే ఖర్చు భరిస్తే ఓకే అంటూ సంకేతాలు

నిజామాబాద్, వెలుగు: జిల్లాలో కాంగ్రెస్, బీజేపీ పార్టీల్లో లోక్​సభ ఎన్నికల కోలాహలం కనిపిస్తోంది. బీజేపీ నుంచి మరోసారి పోటీ చేయనున్న ఎంపీ అర్వింద్ పూర్తిగా నియోజకవర్గంపై ఫోకస్ ​చేశారు. స్థానికంగా జరిగే పార్టీ ప్రోగ్రామ్స్​కు అటెండ్​ అవుతున్నారు. కాంగ్రెస్ ​నుంచి బరిలోకి దిగడానికి లీడర్ల మధ్య తీవ్ర పోటీ ఉంది. ఎవరికి వారే టికెట్​ ప్రయత్నాలు చేస్తున్నారు. బీఆర్ఎస్​నుంచి పోటీ చేయడానికి గులాబీ నేతలెవరూ ఇంట్రెస్ట్​గా లేనట్లు తెలుస్తోంది. హైకమాండ్​ క్యాండిడేట్​ కోసం గాలిస్తున్నట్లు తెలుస్తోంది.

డీసీసీ నుంచి ముగ్గురి పేర్లు

రాష్ట్రంలో కాంగ్రెస్​ రూలింగ్​లోకి రావడంతో పార్టీ నేతలు జోష్​లో ఉన్నారు. లోక్​సభ ఎన్నికల్లో పోటీకి సై అంటున్నారు. అభ్యర్థి ఎంపిక కోసం పార్టీ డీసీసీని సంప్రదించగా పార్టీ జిల్లా ప్రెసిడెంట్​ మానాల మోహన్​రెడ్డి, మైనార్టీ నేత తాహెర్ బిన్​హందాన్, బాల్కొండ మాజీ ఎమ్మెల్యే ఈరవత్రి అనీల్​ పేర్లను హైకమాండ్​కు పంపారు. ఈ ముగ్గురు నేతలు మొన్నటి అసెంబ్లీ ఎలక్షన్​లో టికెట్ ఆశించారు. 

లోక్​సభ నియోజకవర్గ పరిధిలో ఏడు అసెంబ్లీ సెగ్మెంట్లు ఉండగా మొన్నటి ఎన్నికల్లో ఆరుగురు ఓసీలు, ఒక మైనార్టీ నేత పోటీ చేశారు. కాబట్టి లోక్​సభ టికెట్​బీసీకి ఇవ్వాలనే వాదన ఆ సామాజిక వర్గం నుంచి వినిపిస్తోంది. ఈ క్రమంలో మాజీ ఎమ్మెల్యే ఆకుల లలిత, మాజీ మేయర్​ సంజయ్​ కూడా టికెట్​ ప్రయత్నాలు చేస్తున్నారు. బాల్కొండ నియోజకవర్గ ఇన్​చార్జ్​ ముత్యాల సునీల్ కుమార్ ​కూడా రేసులో ఉన్నారు. జిల్లాకు చెందిన సినీ నిర్మాత దిల్​రాజు పేరు కూడా ప్రముఖంగా వినిపిస్తోంది. జగిత్యాలకు చెందిన ఎమ్మెల్సీ జీవన్​రెడ్డి కూడా పోటీకి ఇంట్రెస్ట్​గా ఉన్నట్లు ప్రచారం జరుగుతోంది.

బీఆర్ఎస్​లో నిస్తేజం..

లోక్​సభ ఎన్నికలు సమీపిస్తున్న వేళ కాంగ్రెస్, బీజేపీలు ఏదో రకమైన యాక్టివిటీ చేపడుతుండగా, బీఆర్ఎస్​లో మాత్రం నిస్తేజం నెలకొంది. లోక్​సభ సెగ్మెంట్​లోని ఏడు అసెంబ్లీ నియోజకవర్గాల్లో ముగ్గురు బీఆర్ఎస్​ ఎమ్మెల్యేలే ఉన్నా గెలుపుపై నమ్మకంతో ఎంపీ ఎన్నికల్లో రంగంలోకి దిగడానికి లీడర్లెవరూ ముందుకు రావడంలేదు. గతంలో అర్వింద్ ​చేతిలో ఓడిన ఎమ్మెల్సీ కవిత కూడా వెనుకడుగు వేస్తున్నారు. మాజీ ఎమ్మెల్యేలు బాజిరెడ్డి గోవర్ధన్, బిగాల గణేశ్​గుప్తాను పోటీ చేయించాలని ప్రయత్నాలు చేస్తుండగా, ఖర్చు మొత్తం పార్టీనే భరించాలనే ప్రతిపాదన హైకమాండ్ ​ముందు పెట్టినట్లు తెలుస్తోంది. బిగాల గణేశ్​గుప్తా తమ్ముడు బిగాల మహేశ్​గుప్తాను సంప్రదించగా ఆయన పెద్దగా స్పందించలేదని తెలుస్తోంది.

ఎంపీ అర్వింద్​కు క్లియరెన్స్!

బీజేపీ నుంచి మరోసారి కాంటెస్ట్​ చేసేది తానేనన్న ధీమాతో ఎంపీ అర్వింద్​ సెగ్మెంట్​లో ఎక్కువ టైమ్​కే టాయిస్తున్నారు. నిత్యం ఆయా ప్రోగ్రామ్స్​తో ప్రజల మధ్య ఉంటున్నారు. పార్టీ క్యాడర్​ను సమన్వయం చేసుకునేందుకు కృషి చేస్తున్నారు. సరిగ్గా ఎలక్షన్​ వేళ తన అనుచరుడైన దినేశ్​కులాచారికి జిల్లా అధ్యక్ష బాధ్యతలు ఇప్పించారు. అయోధ్య రామమందిర ప్రారంభోత్సవం, ప్రధాని మోదీ క్రేజ్ పార్టీ ఓటు బ్యాంకును మరింత పెంచుతాయనే అంచనాలో ఆ పార్టీ లీడర్లు ఉన్నారు.

 ఎంపీ అర్వింద్​సైతం రామరాజ్యం ప్రస్తావన లేకుండా స్పీచ్​ ఇవ్వడం లేదు. ఆర్ఎస్ఎస్​బ్యాక్ ​గ్రౌండ్ ఉన్న అల్జాపూర్​ శ్రీనివాస్​ కూడా ఎంపీ టికెట్​ కోసం పార్టీకి బయోడేటా పంపడం చర్చనీయాంశమైంది. 40 ఏండ్ల నుంచి కాషాయ పార్టీలో ఆయా బాధ్యతలు నిర్వహించిన తనకు పోటీ ఛాన్స్​ ఇవ్వాలని కోరుతున్నారు. మాజీ ఉప రాష్ట్రపతి వెంకయ్యనాయుడితో ఆయనకు సన్నిహిత సంబంధాలు ఉన్నాయి.