- వాషింగ్టన్ పోస్ట్ సర్వేలో ఆమెకు 49 శాతం ఓట్లు
- 45% ఓట్లతో డొనాల్డ్ ట్రంప్
వాషింగ్టన్: అమెరికా అధ్యక్ష ఎన్నికల రేసులో కమలా హారిస్ కు జనం మద్దతు పెరుగుతోంది. తాజాగా వాషింగ్టన్ పోస్ట్, ఏబీసీ న్యూస్, ఐపీఎస్ఓఎస్ నిర్వహించిన పోల్ లో 49% ఓట్లతో కమల మొదటి స్థానం పొందారు. ట్రంప్ 45% ఓట్లతో వెనకబడ్డారు. అయితే, వియ్ ద పీపుల్ పార్టీకి చెందిన అభ్యర్థి రాబర్ట్ ఎఫ్. కెన్నెడీ జూనియర్ను కూడా పరిగణనలోకి తీసుకుంటే ఈ సర్వేలో కమలకు 47% ఓట్లతో ఫస్ట్ ప్లేస్ పొందారు. ట్రంప్ 44%, కెన్నడీ జూనియర్ 5% ఓట్లతో రెండు, మూడోస్థానాల్లో నిలిచారు. జులైలో నిర్వహించిన సర్వేలో ట్రంప్ 43% ఓట్లతో ముందంజలో నిలవగా.. అప్పటి డెమోక్రటిక్ అభ్యర్థి జో బైడెన్ 42%, కెన్నడీ జూనియర్ 9% ఓట్లతో తర్వాతి స్థానాల్లో నిలిచారు.
తాజా సర్వేలో కేవలం 4 పాయింట్లు మాత్రమే ట్రంప్ వెనకబడ్డప్పటికీ.. కమల హవా క్రమంగా పెరుగుతోందని ఈ పోల్లో తేలిపోయింది. కాగా, డెమోక్రటిక్ పార్టీ తరఫున అధ్యక్ష అభ్యర్థిని అధికారికంగా ఎన్నుకోవడం కోసం సోమవారం రాత్రి షికాగోలో ఆ పార్టీ జాతీయ సమావేశాలు ప్రారంభం కానున్నాయి. ఇందులోనే కమల అధికారికంగా పార్టీ అభ్యర్థిత్వానికి అంగీకారం తెలపనున్నారు. తన రన్నింగ్ మేట్ (వైస్ ప్రెసిడెంట్ అభ్యర్థి)గా మిన్నెసోటా గవర్నర్ టిమ్ వాల్జ్ను ఆమె అధికారికంగా ప్రకటించనున్నారు. ఒకవైపు డెమోక్రటిక్ పార్టీ జాతీయ సమావేశాలు జరుగుతుండగా.. మరోవైపు, ఎలక్షన్ సర్వేలో ట్రంప్ పై కమల పైచేయి సాధించడంతో ఆ పార్టీ క్యాడర్ లో ఫుల్ జోష్ నెలకొంది.
