బేజిల్ జోసెఫ్... ఈ పేరు టాలీవుడ్కి కొత్త కావొచ్చు. కానీ, మాలీవుడ్లో అతను యాక్ట్ చేసినా, డైరెక్ట్ చేసినా థియేటర్స్లో విజిల్స్ పడాల్సిందే. మిన్నళ్ మురళి’తో మెరుపు వీరుడిని సృష్టించిన క్రియేటర్. ‘జయ జయ జయ జయహే’లో నెగెటివ్ రోల్లో కామెడీ పండించిన కమెడియన్. అతను స్క్రిప్ట్ సెలక్షన్ సింపుల్గా, వెరైటీగా ఉంటుంది. ఇప్పుడు కూడా అంతే.. ఫుల్ కామెడీతో ‘ఫ్యాలిమి’ సినిమాతో ఆడియెన్స్ ముందుకొచ్చాడు. మరి అతని జర్నీ విశేషాలు తన మాటల్లోనే ...
కేరళలోని వయనాడ్లో సుల్తాన్ బతేరి మా సొంతూరు. చిన్నప్పుడు డ్రామా, క్వాయర్, స్పోర్ట్స్ ఇలా అన్ని ప్రోగ్రామ్స్లో పార్టిసిపేట్ చేసేవాడిని. హైజంప్ పోటీల్లో కూడా పాల్గొనే వాడిని. టీనేజ్లో క్రికెటర్ అవ్వాలనుకున్నా. రోజూ గ్రౌండ్కి వెళ్లి ఆడేవాడిని. కానీ, అప్పుడు దాన్నంత సీరియస్గా తీసుకోలేదు. అందరిలానే నేను కూడా ఆ వయసులో సచిన్లా అవ్వాలనుకున్నా అంతే. కల్చరల్ యాక్టివిటీస్లోనే కాదు.. చదువులో కూడా నేను గుడ్ స్టూడెంట్.
మా ఊళ్లోనే సెయింట్ జోసెఫ్ ఇంగ్లిష్ హయ్యర్ సెకండరీ స్కూల్లో చదివా. తర్వాత వయనాడ్లో కల్పెట్టా సిటీలో ఇంటర్, త్రివేండ్రంలో బీటెక్ చేశా. బీటెక్ పూర్తయ్యాక త్రివేండ్రంలోనే ఇన్ఫోసిస్ కంపెనీలో సిస్టమ్ ఇంజినీర్గా పనిచేశా. ఇంజినీరింగ్ చదివేటప్పుడు ఎలిజబెత్తో పరిచయం అయింది. ఏడేండ్లు ప్రేమలో ఉన్నాం. 2017లో పెండ్లితో ఒకటయ్యాం. మా ఇద్దరికీ తోడుగా ఇప్పుడు మాకో పాప ఉంది.
ఐటీ జాబ్ వదిలి..
ఇంజినీరింగ్ ఎంట్రన్స్ ఎగ్జామ్లో మంచి స్కోర్ రావడం వల్ల త్రివేండ్రంలోని ఇంజినీరింగ్ కాలేజీలో సీట్ వచ్చింది. అక్కడికివెళ్లాక కల్చరల్ యాక్టివిటీస్ పట్ల నాకున్న ఇంట్రెస్ట్తో ఆర్ట్స్ క్లబ్ సెక్రెటరీ అయ్యా. ఆ తర్వాత ఇన్ఫోసిస్లో ట్రైనింగ్ కోసం మైసూర్ వెళ్లా. అక్కడ జరిగిన ‘పరిచయ్’ అనే మెగా షోకి టెకీ కమ్యూనిటీలో ఉన్న ఆర్టిస్ట్లు, యాక్టర్స్, డాన్సర్స్ వచ్చారు. ఆ షోలో మెయిన్ క్యారెక్టర్ నేను చేశా. అప్పుడే షార్ట్ ఫిల్మ్ తీయాలనే ఆలోచన మొదలైంది.
ఆ తరువాత నాకు త్రివేండ్రంకి ట్రాన్స్ఫర్ అయింది. అక్కడ 2012లో ‘సిఇటి లైఫ్’లో యాక్టింగ్ చేశా. తర్వాత నేనే ‘ప్రియంవద కాతరాయనొ’ అనే షార్ట్ ఫిల్మ్ తీశా. అందులో నేను కూడా నటించా.17 నిమిషాల ఆ షార్ట్ ఫిల్మ్ని యూట్యూబ్లో అప్లోడ్ చేశా. అది ట్విస్ట్తో కూడిన లవ్ స్టోరీ. దానికి నా ఫ్రెండ్స్, కొలిగ్స్ సపోర్ట్ చేశారు. అప్పటికి నా వయసు 22 ఏండ్లు. ఇవేకాకుండా ‘ష్...’ అనే షార్ట్ ఫిల్మ్కి స్క్రిప్ట్ రైటర్, డైరెక్టర్గా పనిచేశా.
2013లో ‘పకలుకలుడె రాణి’లో యాక్టర్గా, ‘ఒరు తుండు పాదం’కి రైటర్గా చేశా. 2014లో ‘హ్యాపీ ఓనమ్’ అనే షార్ట్ ఫిల్మ్కి రైటర్గా చేశా. ఆ తర్వాత ఐటీ జాబ్ మానేసి, పూర్తిగా సినిమాలపైనే ఫోకస్ పెట్టా. నిజానికి ఐటీ జాబ్ మానేయాలనే నిర్ణయం తీసుకోవడం చాలా కష్టం. అలాగే సినిమాలంటే చర్చి కమ్యూనిటీలో కూడా వేరుగా చూస్తారు. కానీ, ఈ విషయంలో మా పేరెంట్స్ నాకు అండగా నిలిచారు.
సినిమా గురించి నేర్చుకున్నా
మలయాళం డైరెక్టర్స్... ప్రియదర్శన్, సత్యన్ అంతికద్, శ్రీనివాసన్, రఘునాథ్ పలేరి సినిమాలు నేను బాగా చూశా. 2010 టైంలో తమిళంలో బాలాజీ మోహన్, నళన్ కుమారస్వామి, కార్తిక్ సుబ్బరాజ్ల ప్రభావం ఉండేది. వాళ్ల సినిమాల చూశాకే నాకు షార్ట్ ఫిల్మ్ తీయాలనే ఆలోచన వచ్చింది. నా మొదటి సినిమా ‘కుంజిరామాయణం’ (2015) వాళ్ల ఇన్ఫ్లుయెన్స్తో తీసిందే. అలా సినిమా గ్రామర్ కొంచెం కొంచెం ఒంటబట్టించుకున్నా. కానీ, నేను సినిమాలు తీసే టైంకి వెస్టర్న్ సినిమాలను ఫాలో అవ్వడం మొదలుపెట్టా. ఫిల్మ్ మేకింగ్లో నన్ను ఇన్స్పైర్ చేసింది స్టీవెన్ స్పీల్ బర్గ్, ఎడ్గర్ రైట్, గయ్ రిచీ, చార్లీ చాప్లిన్ల సినిమాలు.
డైరెక్టర్గా నిలిపింది ఆ మూడు సినిమాలే
‘తీర’ సినిమాకి అసిస్టెంట్ డైరెక్టర్గా 2013లో వినీత్ శ్రీనివాసన్ దగ్గర పనిచేశా. డైరెక్టర్గా నా మొదటి సినిమా కుంజిరామాయణం (2015). అందులో వినీత్ శ్రీనివాసన్ హీరో. ఆ తర్వాత 2017లో టొవినో థామస్ హీరోగా ‘గోధ’ అనే సినిమా తీశా. ఆ సినిమా తర్వాత డైరెక్షన్కి చాలా గ్యాప్ వచ్చింది. 2021లో మళ్లీ టొవినో థామస్తోనే ఫిక్షన్ మూవీ చేశా. అదే ‘మిన్నళ్ మురళి’ (మెరుపు మురళి). దానికి మంచి రెస్పాన్స్ వచ్చింది. ఫస్ట్ టైం నేను గ్రాఫిక్స్ వాడి తీసిన సినిమా అది. అందులో వీఎఫెక్ట్స్కి సూపర్ విజన్ చేశా. ఫ్రేమ్ టు ఫ్రేమ్ అన్నీ దగ్గరుండి చూసుకున్నా. ఈ మూడు సినిమాలు నన్ను దర్శకుడిగా నిలబెట్టాయి.
స్పెషల్ అప్పియరెన్స్
యాక్టర్గా నా ప్రయాణం 2013లో మొదలైంది. ‘అప్ అండ్ డౌన్ : ముకలిల్ ఒరలుండు’, ‘సైలెన్స్’ అనే సినిమాల్లో గెస్ట్ రోల్లో కనిపించా. ఆ తర్వాత నా సినిమాలతోపాటు ‘హోమ్లీ మీల్స్’, ‘మాయానది’లలో గెస్ట్ అప్పియరెన్స్ ఇచ్చా. 2018లో ‘రొసాపో, పడయొట్టమ్, నిత్యహరిత నాయకన్’ లలో క్యారెక్టర్స్ చేశా. ఆ తర్వాత వరుసగా సినిమాల్లో నటించా. 2021లో ‘మిన్నళ్ మురళి’ సినిమా డైరెక్ట్ చేశా. కానీ, ఆ ఏడాది కూడా ఇదికాక ఐదు సినిమాల్లో యాక్ట్ చేశా. అయితే, తీసిన మూడు సినిమాల్లో స్పెషల్ అప్పియరెన్స్ ఇచ్చా.
నెగెటివ్ రోల్ కోసం వెయిట్ చేసి..
‘జయ జయ జయ జయహే’ ఆఫర్ వచ్చినప్పుడు చాలా ఎగ్జైట్ అయ్యా. అప్పటివరకు నెగెటివ్ రోల్ చేయలేదు. నిజానికి అలాంటి క్యారెక్టర్ కోసం నేను వెయిట్ చేశా. అలాగే కంటెంట్ బాగుంటే ఆడియెన్స్ చూస్తారు. ‘జాన్–ఇ– మ్యాన్’, ‘జయ జయ జయ జయహే’, ‘ఫాల్తూ జాన్వర్’లో అదే జరిగింది. స్క్రిప్ట్ సెలక్ట్ చేసుకునే విషయంలో నాలోని దర్శకుడు నాకు సాయం చేస్తాడు. అలాగని మంచి సినిమా చేస్తే లాభం లేదు. కాన్సెప్ట్ నుంచి థియేటర్ వరకు సినిమాని బాగా ప్రమోట్ చేయాలి. అందుకే ‘జయ..’ సినిమా కోసం రీల్ చేశాం. అది బాగా వైరల్ అయింది.
అది నా కంఫర్ట్ జోన్
‘జోజి’ సినిమాలో సీరియస్ క్యారెక్టర్ చేశా. అయితే, దానికి ముందు నేను చేసినవన్నీ కామెడీ, సపోర్టింగ్ రోల్స్. అవి నా కంఫర్ట్ జోన్. దాన్నుంచి బయటకొచ్చి ఈ రోల్ చేశా. ఆ తర్వాత ఆడియెన్స్ కూడా నన్ను అలాంటి రోల్స్లో చూడ్డానికి ఇష్టపడ్డారు. ఇమేజ్ని బ్రేక్ చేసినవాడిగా నాకు మంచిగా అనిపించింది. నేను లీడ్ రోల్లో చేసిన మొదటి సినిమా ‘జాన్ –ఇ– మ్యాన్’. అందులో కూడా నాది కామెడీ పాత్ర. ‘ఫాల్తూ జాన్వర్’ సినిమా కొస్తే అది కంప్లీట్ ఫన్నీ క్యారెక్టర్ కాదు. అది కూడా ఇమేజ్ని బ్రేక్ చేసే పాత్రే. నేను నా కంఫర్ట్జోన్లో ఉండలేను.
సూపర్ హీరో సినిమా ఎందుకంటే..
అమెరికన్లు కామిక్స్లో, సినిమాల్లో సూపర్ హీరోస్ రోల్స్ వాడారు. మన కల్చర్లో శక్తిమాన్ ఉంది. అలాగే పురాణాల్లో హనుమాన్, రామ్ సూపర్ హీరోల్లా చూస్తాం. ఎక్కడా కూడా ఆ దేశంలో పుట్టినవాళ్లు, ఇంట్లో పెరిగిన సూపర్ హీరోగాకనపడడు. నేను చిన్నప్పుడు మొదటిసారి చూసిన ఇండియన్ త్రీడీ మూవీ ‘మై డియర్ కుట్టిచేతన్’ (1984). అలాగే సూపర్ హీరోల సినిమాలు చాలా చూశాం. ‘మిన్నళ్ మురళి’ అలా ఉండకూడదు. కొత్త సూపర్ హీరో క్యారెక్టర్ పరిచయం చేయాలనుకున్నా. బడ్జెట్ లిమిట్ ఇంతవరకే అని టార్గెట్ పెట్టుకుని ఒక సూపర్ హీరో సినిమా చేయడం అనేది నిజంగా ఛాలెంజింగ్. థ్రిల్లింగ్ ఎక్స్పీరియెన్స్ కూడా. ఈ సినిమా కోసం సెట్లో ప్రాక్టికల్స్ చాలానే చేశాం.
కొవిడ్ టైంలో...
ఈ సినిమా మొదలు కాకముందే కొవిడ్ వచ్చింది. కానీ, పెద్ద బడ్జెట్ సినిమా, ఇంపార్టెంట్ పోర్షన్స్ చేయాలి. ఆ టైంలో నాకు స్ట్రెస్, టెన్షన్ విపరీతంగా పెరిగాయి. ఫస్ట్ లాక్డౌన్ తర్వాత ఎలాగో అన్ని సెగ్మెంట్స్, క్లైమాక్స్తో సహా పూర్తి చేశాం. ఇక చివరిగా మూడు రోజుల్లో పూర్తి అవుతుందనగా క్రూ మొత్తానికి కరోనా పాజిటివ్ వచ్చింది. అప్పుడు కేరళలో కేసులు పెరగడంతో రెండోసారి లాక్డౌన్ పెట్టారు. దాంతో చాలాకాలం గ్యాప్ తర్వాత మూవీని పూర్తి చేశాం.
అయితే, కరోనా టైంలో టొవినో థామస్ జుట్టు, గడ్డం పెంచాడు. కాస్త బొద్దుగా అయ్యి, మళ్లీ తగ్గాడు. ఆ టైంలో నేను అతన్ని రకరకాల గెటప్స్లో చూపించడానికి పనికొచ్చింది. అలాగే అలువ మణప్పురంలో మేం వేసిన సెట్ కాలిపోవడంతో కర్నాటకకు మార్చాం. అది మంచిదే అయింది. అక్కడ క్లైమాక్స్ కోసం అద్భుతమైన లొకేషన్ దొరికింది. స్క్రిప్ట్ రాసుకునేటప్పుడే వీఎఫెక్ట్స్ ఎక్కడ వాడాలో కూడా ప్లాన్ చేసుకున్నా.
ఎన్నో సవాళ్లు
ట్రైన్డ్ ఫైట్ మాస్టర్స్ వేరే దేశాల నుంచి వచ్చి కొరియోగ్రఫీ చేస్తున్నారు. ఆ టైంలో ప్రొటోకాల్స్ పాటిస్తూ వాళ్లు వచ్చి చేయడం అనేది కత్తి మీద సాములాంటిదే. కొన్ని సీన్స్లో జనాలు ఎక్కువగా ఉంటారు. అయినా నేను ఏ విషయంలోనూ కాంప్రమైజ్ కాలేదు. అంతేకాదు.. మొదటి భాగంలో యాక్ట్ చేసిన ఇద్దరు యాక్టర్స్ సినిమా పూర్తికాక ముందే చనిపోయారు. వాళ్ల డబ్బింగ్ పార్ట్ అలానే ఉంది. టొవినో థామస్కి యాక్సిడెంట్ అయింది. అలా ఎన్నో సవాళ్లు ఎదుర్కొన్నా. ఆ టైంలో ప్రొడ్యూసర్స్ మాత్రం మూడేండ్లు నాకు సపోర్ట్ చేస్తూనే ఉన్నారు. నిజంగా వాళ్ల నమ్మకానికి నేను ఎన్నిసార్లు థ్యాంక్స్ చెప్పినా తక్కువే” అని తన ఫిల్మ్ జర్నీ గురించి చెప్పాడు బేజిల్.
నా కల నెరవేరింది
నేను ఇప్పటివరకు చేరుకున్న మైలురాళ్లు నా కలను నెరవేర్చాయి. మొదటి సినిమా నా కలను నిజం చేసింది. రెండో సినిమా ఊహించినది ఏదైనా ఎలా జరుగుతుందో గ్రహించా. ఎందుకంటే అదంతా ప్లాన్ చేయలేదు. కానీ, నా ఎఫర్ట్స్ నేను పెట్టా. ఇప్పుడు ప్రతి సినిమా ఎంజాయ్ చేస్తున్నా. ఇండస్ట్రీలో నిలదొక్కుకోవడం ముఖ్యం. ప్రస్తుతం నేను అవకాశాల కోసం ఎదురుచూడడం కంటే ‘ఎలా బతకొచ్చు?’ అనే విషయం గురించి ఆలోచిస్తున్నా.
ఫ్యాలిమి’ ముచ్చట్లు
ఫ్యాలిమి సినిమా కూడా ఆడియెన్స్కి గుర్తుండిపోతుంది. కామెడీతో పాటు మంచి కంటెంట్ ఉన్న స్క్రిప్ట్ ఇది. షూటింగ్ టైంలో బాగా ఎంజాయ్ చేశాం. ఈ సినిమాలో సీనియర్ నటులు జగదీశ్, మంజు నటించారు. పాత్ర పట్ల వాళ్లకు ఉన్న కమిట్మెంట్కి ఫిదా అయిపోయా. చాలా కష్టతరమైన పరిస్థితుల్లో షూటింగ్ చేయాల్సి వచ్చింది. రాజస్తాన్, వారణాసి వంటి ప్రదేశాల్లో షూటింగ్ చేయాల్సి వచ్చింది. ఇంకాస్త దూరమైనా వెళ్లడానికి రెడీగా ఉన్నారు వాళ్లు. కొన్నిసార్లు వేడికి తట్టుకోలేకపోయేవాళ్లం. కానీ, వాళ్లు మాత్రం చాలా యాక్టివ్గా ఉండేవాళ్లు.
-ప్రజ్ఞ
