ఇన్స్టాగ్రామ్లో రోజుకో సరికొత్త ఫీచర్ అందుబాటులోకి వస్తోంది. ఇందులో భాగంగా ప్రస్తుతం ఇన్స్టా ప్రొఫైల్ సాంగ్ పేరుతో ఒక కొత్త ఫీచర్ వచ్చింది. ఈ ఫీచర్ ఉంటే ప్రొఫైల్లో పాటను మీ మూడ్ లేదా ఎమోషన్కు తగ్గట్టు సెట్ చేసుకోవచ్చు. ఎవరైనా మీ ప్రొఫైల్ చూస్తే ఆ పాట ప్లే అవుతుంది. వినడానికి ఆశ్చర్యంగా ఉంది కదా! దీని గురించి మరిన్ని విశేషాలు ఇవి...
ఇన్స్టాగ్రామ్లో కొత్తగా వచ్చిన ఇన్స్టా ప్రొఫైల్ సాంగ్ ఫీచర్ ఎలా పనిచేస్తుందంటే.. యూజర్లు పాట ప్లే చేయడానికి ప్లే బటన్ నొక్కాలి. ఎందుకంటే ఇందులో ఆటో ప్లే ఆప్షన్ లేదు. అయితే, ఇందులో పాటను దాదాపు 30 సెకన్లు ఉండేలా సెట్ చేసుకోవచ్చు. అది కూడా మీ మూడ్కు తగ్గట్టు పాటలను ఎంచుకోవచ్చు. ఇందుకోసం కొన్ని లైసెన్స్ డ్ సాంగ్స్ ఉంటాయి. వాటిలో నచ్చిన పాటను సెట్ చేసుకోవచ్చు. అయితే, ప్రొఫైల్ సాంగ్ సెట్ చేసుకున్నాక, ఆ పాటని మళ్లీ మీరు మార్చుకునేవరకు ప్రొఫైల్లో అలాగే ఉంటుంది.
వాట్సాప్ స్టేటస్లా ఒక్కరోజులో డిసప్పియర్ కాదు. అంటే మాన్యువల్గా మార్చుకుంటేనే పాట మారుతుంది. ఈ ఫీచర్ని వాడాలంటే ఇన్స్టాగ్రామ్ను ప్లే స్టోర్లోకి వెళ్లి అప్డేట్ చేసుకోవాలి. తర్వాత ఇన్స్టా ఓపెన్ చేసి, ప్రొఫైల్ ట్యాబ్లోకి వెళ్లాలి. అందులో ‘ఎడిట్ ప్రొఫైల్’ ఆప్షన్ సెలక్ట్ చేసుకోవాలి. తరువాత ‘యాడ్ మ్యూజిక్ టు యువర్ ప్రొఫైల్’ పై ట్యాప్ చేస్తే.. పాటల లిస్ట్ వస్తుంది. అందులో నచ్చిన పాటను సెలక్ట్ చేసుకుని, ఆ క్లిప్ రన్ టైం సెలక్ట్ చేసుకోవాలి. అయితే, ఈ ఫీచర్ ప్రస్తుతం కొందరికే అందుబాటులో ఉంది. త్వరలోనే అందరికీ అందుబాటులోకి తీసుకొస్తుందట మెటా.
