బీజేపీ సైనికుడు..మళ్లీ హర్యానా సీఎం ఇతనే.!

• వ్యతిరేకత నుంచి పార్టీని విజయతీరాలకు చేర్చిన నాయబ్ సింగ్​ సైని
• మళ్లీ హర్యానా సీఎం ఆయనే!
• ఎన్నికలకు 200 రోజులముందే ముఖ్యమంత్రిగా చాన్స్​
• తన పాలనతో మెప్పించిన సైనీ 
• అన్నివర్గాల సంక్షేమం కోసం స్కీమ్స్​.. 
• ప్రభుత్వంపై ప్రజా వ్యతిరేకతను తిప్పికొట్టిన లీడర్​గా గుర్తింపు

చండీగఢ్​:  హర్యానా అసెంబ్లీ ఎన్నికల్లో మ్యాజిక్​ ఫిగర్​ను దాటిన బీజేపీ..ఇప్పుడు సీఎం ఎవరనే విషయంపై కసరత్తు ప్రారంభించింది. రేసులో పలువురు ఉన్నప్పటికీ..ప్రస్తుత సీఎం నాయబ్ ​సింగ్​ సైనీ నేతృత్వంలోనే హ్యాట్రిక్​గవర్నమెంట్​ను ఏర్పాటు చేయనున్నట్టు తెలస్తున్నది. కాషాయ పార్టీ అధిష్టానం సైనీ వైపే మొగ్గుచూపినట్టు సమాచారం. రాష్ట్రంలో మళ్లీ విజయం సాధిస్తే సైనీ టాప్​ పోస్ట్​లోనే ఉంటారని ఎన్నికలకు ముందే బీజేపీ అధినాయకత్వం వెల్లడించింది. అయితే, కులకోణంలో సీఎం పదవిలో మార్పు చేస్తారనే ఊహాగానాలు వినిపించాయి. సైనీ ఓబీసీ వర్గానికి చెందిన నేత. హర్యానాలో జాట్​వర్గానికి చెందిన నాయకులే టాప్​ పోస్ట్​లో ఉంటూ వస్తున్నారు. ఈ నేపథ్యంలో  సీఎంగా సైనీనే కొనసాగించి.. జాటేతర ఓబీసీ లీడర్  సైనీని సీఎం చేయడం వల్లే తాము హ్యాట్రిక్​విజయం సాధించామంటూ ఆయా వర్గాలకు మెసేజ్​ పంపాలని బీజేపీ అధిష్టానం చూస్తున్నది. కాగా, హర్యానాలో బీజేపీ మ్యాజిక్​ ఫిగర్ ​దాటడంపై సీఎం సైనీ సంతోషం వ్యక్తంచేశారు. కౌంటింగ్​ ముగిసిన వెంటనే మీడియాతో మాట్లాడారు. ఇది రాష్ట్రంలోని రైతులు, మహిళలు, యువత విజయమని చెప్పారు. ‘‘ మోదీ విధానాలపై  విశ్వాసం ఉంచిన 2.8 కోట్ల మందికి కృతజ్ఞతలు. మోదీ ఆశీర్వాదంతోనే హ్యాట్రిక్​ విజయం సాధించాం” అని పేర్కొన్నారు.

అనూహ్యంగా సీఎం సీటులోకి..

సైనీని అసెంబ్లీ ఎన్నికలకు 200 రోజుల ముందే సీఎంగా బీజేపీ అధిష్టానం ఎంపిక చేసింది. అప్పటివరకూ సీఎంగా కొనసాగిన మనోహర్​లాల్​ ఖట్టర్​ను లోక్​సభ ఎన్నికల్లో పోటీ చేయించి, సైనీకి బాధ్యతలు అప్పగించింది. ఖట్టర్​ మద్దతుతో ఉండడంతోనే సైనీని ఆ సీట్లో కూర్చోబెట్టారు. సైనీ తన పదవీకాలంలో వ్యాపారులు, యువత, వెనుకబడిన వర్గాలు, ప్రభుత్వ ఉద్యోగులకు ప్రయోజనం చేకూర్చేలా పలు పథకాలను తీసుకొచ్చి, విజయవంతంగా అమలు చేశారని, ఖట్టర్​ పాలనలో సర్కారుపై ఏర్పడ్డ అధికార వ్యతిరేకతను  తన సంక్షేమ పాలనతో తిప్పికొట్టారని రాష్ట్ర బీజేపీ నాయకత్వం వెల్లడించింది.  అగ్నివీర్​ స్కీమ్  పై ప్రతిపక్షాలు చేస్తున్న ఆరోపణలను ఎదుర్కొనేలా.. అగ్నివీర్​లకు ఉపాధి, ఆంత్రప్రెన్యూర్​షిప్ అవకాశాల కోసం ‘అగ్నివీర్​ పాలసీ–2024’ ను సైనీ తీసుకొచ్చారని చెప్పారు.