ఖమ్మంలో క్రమంగా పెరుగుతున్న వినియోగం .. గంజాయికి చెక్ పెట్టలేరా?

ఇప్పటి వరకు పట్టుకున్నది చిన్న సప్లయర్స్ నే..
దందా నడిపిస్తున్న వారిని పట్టుకోవడంలో వైఫల్యం
పీడీ యాక్ట్ ఎందుకు పెట్టడం లేదని మంత్రి తుమ్మల ఫైర్

గంజాయి సప్లయ్ ను అడ్డుకోవడంలో ఎక్సైజ్ డిపార్ట్ మెంట్ సీరియస్గా ఉండాలి. స్కూళ్లు, కాలేజీల్లో ఏం జరుగుతుందో మీకు తెలియదా? గడిచిన ఏడాది కాలంలో మీరు ఏ యాక్షన్ తీసుకున్నట్టు అనిపించడం లేదు. అంటే అసలు గంజాయే రావడం లేదా? సప్లై చేసే వాళ్లు, రిటైల్, హోల్ సేల్, అమ్మేవాళ్లు ఎవరు, కొనేవాళ్లు, ఇలా చైన్ సిస్టమ్ ప్రకారం గంజాయి నడుస్తుంది. దాని బాస్ ను కొట్టేయాలి. కింగ్ పిన్ లపై పీడీ యాక్టు పెట్టే అవకాశం ఉంది కదా? ఉట్టి కేసులు పెడితే గంజాయి ఆగుతదా? ఒడిశా నుంచి ఎలా వస్తుంది, గోదావరి ఎలా దాటుతుంది, భద్రాద్రి జిల్లా సూపరింటెండెంట్ తో మాట్లాడండి.

గంజాయి, డ్రగ్స్ తో భావితరాలకు నష్టం, ఇది అన్నిటికంటే సీరియస్ ఇష్యూ. రేపొచ్చే యువతరం సర్వనాశనం అవుతుంది. ఇప్పటికే కొన్ని రాష్ట్రాల స్టోరీలు చూస్తున్నాం. మన రాష్ట్రం కూడా అలాగే కావాలా? మీరు (ఎక్సైజ్ డిపార్ట్ మెంట్), పోలీస్ జాగ్రత్తగా ఉండకపోతే వెరీ డేంజర్..” అని ఇటీవల ఖమ్మంలో జరిగిన సమీక్షా సమావేశంలో జిల్లా ఎక్సైజ్ సూపరింటెండెంట్ ను ఉద్దేశించి వ్యవసాయ శాఖ మంత్రి తుమ్మల నాగేశ్వరరావు సీరియస్ గా చేసిన వ్యాఖ్యలు. ఖమ్మం జిల్లాలో గంజాయి పరిస్థితికి ఈ కామెంట్లు అద్దం పడుతున్నాయి.

ఖమ్మం, వెలుగు : ఖమ్మం జిల్లాలో గంజాయి అక్రమ రవాణా, క్రమంగా వినియోగం పెరుగుతుండడం కలవరపెడుతోంది. కాలేజీ, స్కూల్ స్టూడెంట్స్ కు కూడా అందుబాటులో ఉండడం, తరచుగా గంజాయి మత్తులో ఏదో ఒక ఘటన జరుగుతుండడం కామన్ గా మారింది. ఇంజినీరింగ్, మెడిసిన్ విద్యార్థులే కాదు, ఇంటర్, స్కూల్ స్టూడెంట్స్ కూడా గంజాయికి బానిసలుగా మారారు. అలాంటి వారిని గుర్తించడంతో పాటు, గంజాయి వినియోగానికి చెక్ పెట్టేందుకు ఖమ్మం నగరంలో గంజాయి సేవిస్తున్న అడ్డాలుగా భావిస్తున్న వాటితో పాటు రోటరీ నగర్ ట్యాంక్, ఎస్బీఐటీ కాలేజీ పరిసరాలు, మమత మెడికల్ కళాశాల పరిసరాలు, శాంతి నగర్ పాఠశాల పరిసరాలు, చర్చి కంపౌండ్, జహీర్పురా పార్క్ పరిసరాలు, ప్రకాశ్నగర్, ఎన్టీఆర్ సర్కిల్, కొత్త బస్టాండ్, గట్టయ్య సెంటర్, సరిత క్లినిక్, సారథినగర్ దిగువ రైల్వే వంతెన, గొల్లగూడెం పరిసర ప్రాంతాల్లో గత వారం టాస్క్ ఫోర్స్ పోలీసులు తనిఖీలు నిర్వహించారు.

ఇవే కాకుండా ఖమ్మం రూరల్, ముదిగొండ, సత్తుపల్లి, పెనుబల్లి, ఇతర మండలాల్లోని పలు గ్రామాల్లోనూ గంజాయి వినియోగానికి సంబంధించిన ఆనవాళ్లు బయటపడుతున్నాయి. జిల్లాలో నాలుగు ప్రధాన జాతీయ రహదారి పనులు జరుగుతుండగా, వీటిలో పనిచేసేందుకు బీహార్, చత్తీస్ గఢ్, యూపీ, రాజస్థాన్, మధ్యప్రదేశ్ నుంచి వచ్చిన వందలాది మంది కూలీలు నెలల తరబడి ఇక్కడ ఉండడం కూడా స్థానికంగా గంజాయి వాడకం పెరిగేందుకు కారణమైంది.

సూత్రధారులను పట్టుకోలేకపోవడంపై విమర్శలు

జిల్లాలో పోలీస్ అధికారులు చెబుతున్న ప్రకారం ఈ ఏడాది ఎన్డీపీఎస్ (నార్కోటిక్ డ్రగ్స్ అండ్ సైకోట్రోపిక్ సబ్ స్టాన్సెస్) కేసుల సంఖ్య గతేడాది 41 నుంచి ఈ ఏడాWWWWది 35కి తగ్గింది. ఈ కేసుల్లో 268 నిందితులను గుర్తించగా, 238 మందిని అరెస్ట్ చేశారు. గతేడాది జిల్లాలో 872 కిలోల గంజాయినిWW పట్టుకోగా, ఈ ఏడాది 384 కేజీల గంజాయిని పట్టుకున్నారు. ఇక ఎక్సైజ్ శాఖ అధికారులు గతేడాది 123 కేసుల్లో 86 మందిని అరెస్ట్ చేసి 1,654 కేజీల గంజాయి పట్టుకున్నారు. ఈ ఏడాది నవంబర్ వరకు 84 కేసుల్లో 90 మందిని అరెస్ట్ చేయగా 792 కేజీల గంజాయిని స్వాధీనం చేసుకున్నారు. అయితే కేజీల చొప్పున గంజాయిని ఒక ప్రాంతం నుంచి మరో ప్రాంతానికి తీసుకెళ్తున్న వారిని పట్టుకుంటున్నారు తప్ప మొత్తం ఈ వ్యవహారాన్ని నడిపిస్తున్న సూత్రధారులను మాత్రం పట్టుకోలేకపోవడంపై విమర్శలు వ్యక్తమవుతున్నాయి.

ఇటీవల జిల్లాలో జరిగిన కొన్ని ఘటనలు...

జులై మూడో వారంలో ఖమ్మం రోటరీ నగర్ లో గంజాయి మత్తులో అమ్మమ్మ రాంబాయమ్మను మనవడు ఉదయ్ కుమార్ కొట్టిచంపాడు. చెడు వ్యసనాలకు బానిసైన ఉదయ్, తనకు తాగుడుకు పెన్షన్ డబ్బులు ఇవ్వలేదని అర్థరాత్రి ఈ దారుణానికి ఒడిగట్టాడు. తెల్లారి మత్తు దిగిన తర్వాత పక్కింటి వాళ్లకు అమ్మమ్మ గుండెపోటుతో చనిపోయిందని చెప్పాడు. కానీ ఉదయ్ షర్ట్ పై రక్తం మరకలు, మృతదేహంపై గాయాలు ఉండడంతో స్థానికులు అతడిని పోలీసులకు పట్టించారు.
అక్టోబర్ మొదటివారంలో పెనుబల్లి మండలంలోని పలు గ్రామాల్లో గంజాయి సేవిస్తున్న యువకులను పట్టుకొని పోలీస్ స్టేషన్ కు తరలించారు. బీసీ కాలనీ, రంగారావు బజార్, గంగాదేవిపాడు గ్రామాలతో పాటు పలుచోట్ల గంజాయి అడ్డాలుగా చేసుకొని అమ్మకాలు జరుగుతున్నట్టు పోలీసులు గుర్తించారు. యువకులను తనిఖీ చేయగా ఒక బైక్ లో 300 గ్రాముల గంజాయి దొరికింది. దీంతో పోలీసులు వారి వెనుక ఉన్న చైన్ లింక్ ను గుర్తించేందుకు ప్రయత్నిస్తున్నామని చెబుతున్నారు.
అక్టోబర్ రెండో వారంలో సత్తుపల్లిలో 20 రోజులు నిఘాపెట్టి 11 మందిని అరెస్ట్ చేశారు. వారి దగ్గర నుంచి దాదాపు 6 కేజీల గంజాయి పట్టుకున్నారు. ఏఓబీ బోర్డర్ నుంచి గంజాయి కొనుగోలు చేసి తీసుకొచ్చి సత్తుపల్లిలోని గ్రామాల్లో అమ్ముతున్నట్టు గుర్తించారు. పోలీసుల విచారణలో వీరంతా 82 మందికి గంజాయి అమ్మారని తేలగా, అందులో 11 మంది మైనర్లు ఉన్నట్టు విచారణలో తేలింది.
పెనుబల్లి మండల కేంద్రంలో బీసీ కాలనీకి పక్కనే ఉన్న ఉపయోగంలో లేని షాదిఖానా దగ్గరన, సెలవు రోజుల్లో ప్రభుత్వ జూనియర్ కాలేజ్ లో యువకులు గంజాయి తాగడానికి అడ్డాగా చేసుకున్నారు. పోలీసులు పలుమార్లు కౌన్సిలింగ్ ఇచ్చినా ఫలితం లేదు. ఈ ఏడాదిలో మూడుసార్లు పెనుబల్లి మండలం గౌరారం టోల్ ప్లాజా వద్ద ఆర్టీసీ బస్సుల్లో గంజాయి తరలిస్తుండగా సత్తుపల్లి ఎక్స్సైజ్ అధికారులు పట్టుకొని కేసులు నమోదు చేశారు.
తల్లాడ మండలంలో పలుచోట్ల గంజాయి సేవిస్తున్నట్టు అనుమానంతో కొంతమంది యువతకు పోలీసులు కౌన్సిలింగ్ ఇచ్చారు. మల్లారం రోడ్డు, వెంకటేశ్వర టెంపుల్ ఏరియా, పాయపపూర్ స్టేజ్ ఇంకా కొన్ని ప్లేసుల్లో నిఘా ఏర్పాటు చేశారు.
కారేపల్లికి చెందిన ఓ కూరగాయల వ్యాపారి కొడుకు ఆరు నెలల కింద ఖమ్మంలో గంజాయితో పట్టుబడ్డాడు. అతడిని విచారించి అరెస్టు చేసిన తర్వాత కారేపల్లికి చెందిన 10 మంది యువకులకు పోలీసులు కౌన్సిలింగ్ నిర్వహించారు.
వైరా మున్సిపాలిటీలోని బ్రాహ్మణపల్లి వార్డుకు చెందిన కొంతమంది యువకులు పొలాల్లో గంజాయి తాగుతున్నారనే ఆరోపణలు ఉన్నాయి. దీనిపై పోలీసులు విచారణ చేపట్టారు.
భద్రాచలం, చత్తీస్గఢ్ నుంచి బస్సుల్లో గంజాయిని తరలిస్తున్న యువకులను పోలీసులు అదుపులో తీసుకున్నారు. వారి నుంచి 50 కేజీల వరకు గంజాయిని స్వాధీనం చేసుకున్నారు.