కొన్ని శ్నాక్ వెరైటీలను ఇంట్లో చేసుకుని తినడం కంటే బయట కొనుక్కుని తినడమే బెటర్ అనుకుంటారు కొందరు. కానీ కొంచెం ఓపిక చేసుకుంటే కొనుక్కున్న వాటికంటే టేస్టీగా, హెల్దీగా ఇంట్లోనే వండుకోవచ్చు. అలాంటి రుచుల్లో కొన్ని వెరైటీలు మీ ముందుకు వచ్చేశాయ్.
బ్రెడ్ చికెన్ పాకెట్స్
కావలసినవి :
చికెన్ స్టఫింగ్కు...
బోన్లెస్ చికెన్ (బ్రెస్ట్) - 300 గ్రాములు
నూనె - రెండు టేబుల్ స్పూన్స్
వెల్లుల్లి తరుగు - ఒక టేబుల్ స్పూన్
ఉప్పు - ఒక టీ స్పూన్
పసుపు - అర టీస్పూన్
ఎండుమిర్చి తునకలు - ఒక టీస్పూన్
కశ్మీరి కారం - ఒక టీస్పూన్
నల్లమిరియాల పొడి - ఒక టీస్పూన్
ధనియాల పొడి - ఒక టీస్పూన్
గరం మసాలా - అర టీస్పూన్
క్యాప్సికమ్ (సన్నగా, నిలువుగా తరిగి) - ఒకటి
ఉల్లిపాయ(సన్నగా, నిలువుగా తరిగి) - ఒకటి
సోయా సాస్ - ఒక టీస్పూన్
టొమాటో (సన్నగా నిలువుగా తరిగి) - ఒకటి
పాకెట్స్ కోసం...
బ్రెడ్ స్లయిస్లు - రెండు
కోడి గుడ్లు - రెండు,
ఉప్పు - పావు టీస్పూన్
మిరియాల పొడి - పావు టీస్పూన్
నూనె - వేగించడానికి సరిపడా
సాస్ కోసం...
మయోనీస్ - నాలుగు టేబుల్ స్పూన్లు
టొమాటో కెచప్ - రెండు టేబుల్ స్పూన్లు
రెడ్ చిల్లీ సాస్ - ఒక టేబుల్ స్పూన్
మిరియాల పొడి - పావు టీస్పూన్
ఉప్పు - పావు టీస్పూన్
లెట్టూస్ - సరిపడా
తయారీ
స్టఫింగ్ చికెన్ : ఓ మాదిరి మంట మీద పాన్ వేడిచేసి రెండు టేబుల్ స్పూన్ల నూనె వేయాలి. నూనె వేడెక్కాక వెల్లుల్లి తరుగు వేసి పచ్చి వాసన పోయేవరకు అంటే 30 సెకన్లు వేగించాలి. అందులో పొడవుగా తరిగిన చికెన్ ముక్కలు వేసి ఒక నిమిషం గరిటెతో అటుఇటు కదపాలి. తరువాత ఉప్పు, పసుపు, ఎండుమిర్చి తునకలు, కశ్మీరి కారం, నల్లమిరియాల పొడి, ధనియాల పొడి, గరం మసాలా వేసి కలపాలి. ఓ మాదిరి మంటమీద రెండు నిమిషాలు వేగించి, పాన్ మీద మూతపెట్టి ఆరు నిమిషాలు ఉడికించాలి. ఆ తరువాత క్యాప్సికమ్, ఉల్లిగడ్డ తరుగు వేసి కలిపి ఒక నిమిషం ఉడికించాలి. అందులో ఒక టీస్పూన్ సోయాసాస్ వేసి కలిపాక టొమాటో తరుగు వేసి ఒకసారి గరిటెతో కలిపి, స్టవ్ ఆపేయాలి.
బ్రెడ్ పాకెట్స్ : బ్రెడ్ ముక్కలు తీసుకుని వాటి చుట్టూ ఉన్న బ్రౌన్ పార్ట్ తీసేయాలి. కట్ చేసిన బ్రెడ్ ముక్కలను ఒకదాని మీద ఒకటి పెట్టి చపాతీ కర్రతో నెమ్మదిగా నాలుగువైపులా వత్తాలి. తరువాత గుండ్రటి మూతను బ్రెడ్ మీద పెట్టి గుండ్రటి బ్రెడ్ పాకెట్స్ కట్ చేయాలి. అలా ఆరు బ్రెడ్ పాకెట్స్ తయారుచేయాలి.
వెడల్పాటి గిన్నెలో కోడి గుడ్ల సొన, ఉప్పు, మిరియాల పొడి వేసి బాగా కలిసేలా గిలక్కొట్టాలి.
తర్వాత.. బ్రెడ్ స్లయిస్ల చివర్లు కట్ చేసి పెట్టుకున్న బ్రౌన్ పార్ట్ని మిక్సీ జార్లో వేసి గ్రైండ్ చేస్తే బ్రెడ్క్రంబ్స్ రెడీ అవుతాయి.
గుండ్రంగా కట్ చేసిన బ్రెడ్ ముక్కని కోడిగుడ్డు మిశ్రమంలో ముంచాలి. కోడిగుడ్డు మిశ్రమం బ్రెడ్ అంతా బాగా అంటుకోవాలి. ఆ బ్రెడ్ ముక్కలను బ్రెడ్క్రంబ్స్లో ముంచాలి. అన్ని బ్రెడ్ పాకెట్స్కి బ్రెడ్క్రంబ్స్ కోట్ వేయడం అయ్యాక కళాయిలో నూనె వేడిచేయాలి. నూనె వేడెక్కాక మంట తగ్గించి బ్రెడ్ పాకెట్స్వేసి రెండు నుంచి మూడు నిమిషాలు వేగించాలి. వేగించేటప్పుడు వాటిమీద నెమ్మదిగా గరిటెతో వత్తాలి.
అచ్చం పూరీలు పొంగినట్టు పొంగుతాయి. రెండు వైపులా సమంగా వేగించాలి. వాటికి అంటుకున్న నూనె పోయేందుకు వాటిని చిల్లుల గిన్నెలో వేయాలి. బ్రెడ్ పాకెట్స్కు నూనె వదిలాక మయోనీస్, టొమాటో కెచప్, రెడ్ చిల్లీ సాస్, మిరియాల పొడి, ఉప్పు వేసి బాగా కలపాలి. బ్రెడ్ పాకెట్ను తీసుకుని మధ్యకు రెండు భాగాలుగా కోస్తే పాకెట్ రెడీ. ఒక్కో పాకెట్లో స్పూన్తో తయారుచేసుకున్న సాస్ కొంచెం రాయాలి. లెట్టూస్ పరిచి పైన చికెన్ ఫిల్లింగ్ పెడితే బ్రెడ్ చికెన్ పాకెట్స్ రెడీ. వీటిని టీ టైం లేదా పార్టీ స్నాక్గా చేసుకుంటే ఎంజాయ్ చేయొచ్చు.
క్లబ్ శాండ్విచ్
కావలసినవి :
చికెన్ (బోన్లెస్) - 300 గ్రాములు
ఉప్పు - కొంచెం
వెనిగర్ - ఒక టేబుల్ స్పూన్
సోయాసాస్ - మూడు టేబుల్ స్పూన్లు
నల్ల మిరియాల పొడి - ఒక టీస్పూన్
వెల్లుల్లి పేస్ట్ - కొంచెం
మయోనీస్ - ముప్పావు కప్పు
కోడి గుడ్లు - రెండు
నూనె - రెండు టేబుల్ స్పూన్లు
చిల్లీ గార్లిక్ సాస్ లేదా కెచప్, చీజ్ - తగినంత
టొమాటో (గుండ్రంగా తరిగి) - ఒకటి
కీర దోస (గుండ్రంగా తరిగి) - ఒకటి
తయారీ : ఉప్పు, వెల్లుల్లి పేస్ట్ వేసి ఉడికించిన చికెన్లో వెనిగర్, సోయాసాస్, నల్ల మిరియాల పొడి, మయోనీస్ వేయాలి. అవన్నీ బాగా కలిపి పక్కన పెట్టాలి.ఒక గిన్నెలో కోడిగుడ్ల సొన కార్చాలి. అందులో చిటికెడు ఉప్పు, నల్ల మిరియాల పొడి వేసి కలపాలి. పాన్లో నూనె వేడి చేసి కోడిగుడ్డు మిశ్రమాన్ని ఆమ్లెట్లా వేసి రెండువైపులా కాల్చాలి. తరువాత ఆమ్లెట్ను నాలుగు భాగాలుగా కట్ చేయాలి. గ్రిల్ పాన్కు నూనె రాసి, బ్రెడ్ స్లయిస్లను గ్రిల్ చేయాలి.
తరువాత మూడు బ్రెడ్ స్లయిస్లకు చుట్టూరా ఉన్న బ్రౌన్ పార్ట్ కట్ చేయాలి. ఒక బ్రెడ్ స్లయిస్ మీద మయోనీస్ పూసి, ఉడికించిన చికెన్ను సమంగా పరవాలి. ఇంకో బ్రెడ్ స్లయిస్ మీద చిల్లీ గార్లిక్ సాస్ లేదా కెచప్ పూసి, ఆమ్లెట్ ముక్క, గుండ్రంగా తరిగిన టొమాటో ముక్క, నాలుగు మూలల నాలుగు కీరా ముక్కలు పెట్టాలి. మరో బ్రెడ్ స్లయిస్ మీద మయోనీస్, చిల్లీ గార్లిక్ సాస్ వేసి సమంగా పరవాలి. చికెన్ పెట్టిన బ్రెడ్ స్లయిస్ మీద బ్రెడ్ సైజ్ చీజ్ ముక్క పెట్టి, దానిపైన టొమాటో, కీర పెట్టిన బ్రెడ్ స్లయిస్ వెల్లకిలా ఉంచాలి. దానిమీద మయోనీస్, చిల్లీ గార్లిక్ సాస్ రాసిన బ్రెడ్ స్లయిస్ను బోర్లించాలి. ఆ తరువాత బ్రెడ్ను శాండ్విచ్ షేప్లో కట్ చేస్తే రెస్టారెంట్ స్టయిల్ క్లబ్ శాండ్విచ్ రెడీ.
పొటాటో ట్విస్టర్ సమోసా
కావలసినవి :
ఆలుగడ్డ (మీడియం సైజ్)- ఐదు
క్యారెట్ తరుగు - రెండు టేబుల్ స్పూన్లు
క్యాప్సికమ్ తరుగు - రెండు టేబుల్ స్పూన్లు
కొత్తిమీర తరుగు- ఒక టేబుల్ స్పూన్
పచ్చిమిర్చి తరుగు - ఒకటి లేదా రెండు
ఉప్పు - ఒక టీస్పూన్ లేదా రుచికి తగినంత
ధనియాల పొడి - ఒక టేబుల్ స్పూన్
పసుపు - అర టీస్పూన్
జీలకర్ర పొడి - ఒక టీస్పూన్
కారం - ఒక టీస్పూన్
కార్న్ ఫ్లోర్ - రెండు టేబుల్ స్పూన్లు
మైదా - రెండు కప్పులు
ఉప్పు - అర టీస్పూన్ లేదా రుచికి సరిపడా
జీలకర్ర - అర టీస్పూన్
నెయ్యి - రెండు టేబుల్ స్పూన్లు
నీళ్లు - పిండి ముద్ద కలిపేందుకు సరిపడా
నూనె - వేగించేందుకు సరిపడా
చికెన్ పౌడర్ - ఒక టీస్పూన్ (ఆప్షనల్)
తయారీ : ఒక గిన్నెలో మైదా, నెయ్యి, జీలకర్ర, ఉప్పు వేసి సరిపడా నీళ్లుపోసి ముద్ద చేయాలి. క్లాత్ వేసి అర గంట నానబెట్టాలి. ఆలుగడ్డను తురిమి ఒకగిన్నెలో వేయాలి. అందులో క్యారెట్, క్యాప్సికమ్ తరుగు వేయాలి. ఉప్పు, మిగతా మసాలాలు, కొత్తిమీర తరుగు కూడా వేసి కలపాలి.నానబెట్టిన పిండిని రెండు సమ భాగాలుగా చేయాలి. వాటిని చపాతీల్లా వత్తాలి. తరువాత ఒక సమోసా బేస్ మీద తయారుచేసుకున్న ఆలుగడ్డ మసాలా మిశ్రమం పరవాలి. దాని మీద రెండో సమోసా బేస్తో మూయాలి. చపాతీ కర్రతో నెమ్మదిగా అవి రెండూ అతుక్కుపోయేలా వత్తాలి. తరువాత కత్తితో పదును ఉన్న వైపు కాకుండా మరోవైపు నుంచి పైనుంచి కింద పొర వరకు సమంగా కట్ అయ్యేలా సమోసా బేస్ పైనుంచి కిందకు నిలువుగా రెండు అర్ధభాగాలుగా కట్ చేయాలి. తరువాత ఒక్కో దాన్ని అడ్డంగా ఆరు ముక్కలుగా కట్ చేయాలి.
తరువాత ఒక్కో ర్యాప్ రెండు చివర్లు పట్టుకుని నెమ్మదిగా ట్విస్ట్ చేయాలి. అది డిజైన్లా వస్తుంది. అన్నీ ఇలా చేసుకున్నాక వేడి నూనెలో వేసి వేగించాలి. సర్వింగ్ ప్లేట్లో సమోసా ట్విస్టర్లను అందంగా అమర్చి సాస్ లేదా చట్నీతో తింటే నోట్లో రుచి కూడా వంపులు తిరుగుతూ పలకరిస్తుంది.
బేక్డ్ పకోడి
కావలసినవి :
క్యారెట్ (పెద్దది) - ఒకటి, ఆలుగడ్డ (చిన్నది) - ఒకటి
అల్లం ముక్క - చిన్నది, సముద్రపు ఉప్పు
ఆనియన్ పౌడర్ - ఒక్కో టీస్పూన్, నల్ల మిరియాల పొడి - కొంచెం, జీలకర్ర - అర టీస్పూన్, గరం మసాలా - ఒక టీ స్పూన్, కొత్తిమీర తరుగు - కొంచెం
శనగపిండి - ముప్పావు కప్పు
తయారీ ; క్యారెట్, ఆలుగడ్డల పొట్టు తీసి తురమాలి. అవి పక్కా ఆర్గానిక్వి అయితే పొట్టు తీయకుండానే తురమొచ్చు. అల్లం తురమాలి. శనగపిండి తప్ప మిగతా అన్ని పదార్థాలను ఒక గిన్నెలో వేయాలి. తరువాత వాటి మీద శనగపిండిని ఉండలు లేకుండా జల్లించి చేతితో అవన్నీ బాగా కలిసిపోయేలా కలపాలి.బేకింగ్ ట్రే మీద పర్చ్మంట్ పేపర్ పరిచి, శనగపిండి మిశ్రమాన్ని కొంచెంకొంచెంగా వాటి మీద పెట్టాలి.
పాటీస్లా కావాలనుకుంటే ఆ ఉండల్ని కొద్దిగా వత్తితే సరిపోతుంది. ఒవెన్ను 25 నిమిషాలు (200 నుంచి 240 సెంటిగ్రేడ్ వరకు) హీట్ చేయాలి. అన్ని ఒవెన్లు ఒకేలా ఉండవు. అందుకని మీ ఒవెన్కు ఏ టెంపరేచర్ సెట్ అవుతుందో చూసుకుని అంతే పెట్టుకోవాలి. తరువాత ఒవెన్లో బేకింగ్ ట్రే పెట్టాలి. బేక్డ్ పకోడీ టేస్టీగా రావాలంటే గుర్తుంచుకోవాల్సింది పకోడీ మాడకుండా చూసుకోవాలి. అదెలా తెలుస్తుందంటే పకోడీ చివర్లు క్రిస్పీగా అయ్యేవరకు ఉంచితే చాలు. వీఈటిని స్టార్టర్, శ్నాక్లా తినేయొచ్చు.
