కూసుమంచి, వెలుగు: పార్టీ ఏదైనా కమ్యూనిస్టుల మద్దతు లేకుండా ఖమ్మం జిల్లాలో గెలవడం అసాధ్యమని సీపీఎం రాష్ట్ర కార్యదర్శి తమ్మినేని వీరభద్రం అన్నారు. శనివారం తిరుమలాయపాలెం మండలంలో పిండిప్రోలు, హైదర్సాయిపేట, దమ్మాయిగూడెం, కూసుమంచి మండలంలో గైగోళ్లపల్లి, పోచారం, ముత్యాలగూడెం, చేగోమ్మ, నేలపట్ల, మల్లాయిగూడెంలో ఇటీవల మృతిచెందిన పలువురిని ఆయన పరామర్శించారు. అనంతరం దమ్మాయిగూడెంలో జరిగిన సీపీఎం ముఖ్య కార్యకర్తల సమావేశంలో ఆయన మాట్లాడారు. బీఆర్ఎస్తో పొత్తు ఉన్నప్పటికీ ప్రజా సమస్యలపైన పోరాటాలు చేస్తామన్నారు. బీజేపీకి వ్యతిరేకంగా వచ్చే ప్రతి ఒక్కరితో కలిసి పని చేస్తామని, ఎన్నిక సమయానికి పొత్తులపై క్లారిటీ వస్తుందన్నారు. పొత్తులు కుదరకపోతే ఒంటరిగానే పోటీ చేస్తామన్నారు.
