టెన్షన్లు, ఒత్తిడి, వాతావరణ కాలుష్యం వంటి వాటి వల్ల క్యాన్సర్లు పెరుగుతున్నాయి. ముఖ్యంగా డైట్ సరిగా లేక కూడా క్యాన్సర్లు వస్తాయి. మహిళల్లో ప్రొటీన్, ఇమ్యూనిటీ తగ్గడం వల్ల క్యాన్సర్ కారకాలు పెరుగుతున్నాయి. దీనికి తోడు క్యాన్సర్ ఉందని కనిపెట్టడం ఆలస్యం అవుతోంది. ఈ మధ్యకాలంలో మహిళలు కూడా ఆల్కహాల్ తీసుకోవడం పెరిగింది. అన్హెల్దీ డైట్, ప్రాసెస్డ్ ఫుడ్, లైఫ్ స్టయిల్ డిజార్డర్స్, ఓవర్ వెయిట్, ఒబెసిటీ, డయాబెటిస్, హైపర్ టెన్షన్ ఇవన్నీ క్యాన్సర్ రిస్క్ ఫ్యాక్టర్స్. రసాయన ఉత్పత్తులు వాడడం, పండ్లు, కూరగాయలు తక్కువగా తినడం కూడా క్యాన్సర్కు వెల్కం చెప్పినట్టు అవుతున్నాయి. అదే మగవాళ్లలో చూస్తే పొగ తాగడం, ఆల్కహాల్ తీసుకోవడం వల్ల క్యాన్సర్లు వస్తున్నాయి. పూర్వం ఇలాంటివన్నీ లేవు కాబట్టి క్యాన్సర్ అనేది ఎక్కడో ఒకచోట కనిపించేది.
కానీ, ఇప్పుడు క్యాన్సర్ చాలా కామన్ అయిపోయింది. అడ్వాన్స్డ్ ట్రీట్మెంట్ వస్తున్నా. అందుకు సమానంగా కేసులు కూడా పెరుగుతున్నాయి. వేసవి కాలంలో ఎండ ఎక్కువ ఉండడం వల్ల యూవీ రేస్కి ఎక్స్పోజ్ అయ్యే ఛాన్స్ పెరుగుతుంది. ఈ సీజన్లో ఎక్కువగా దొరికేది మామిడి. ఇందులో విటమిన్ ఎ, యాంటీ ఆక్సిడెంట్లు ఉంటాయి. అలాగే ఆరెంజ్, పుచ్చకాయలు తినాలి. పండ్లను ఎక్కువగా తినే సీజన్ ఇదే. వానాకాలం, చలికాలాల్లో పండ్లు ఎక్కువగా తినాలనిపించదు. కాబట్టి వేసవిలో దొరికే పండ్లన్నీ తినడం ఆరోగ్యానికి మంచిది. మొత్తంమీద చెప్పొచ్చేదేంటంటే... తినే తిండితోనే క్యాన్సర్కి అడ్డుకట్ట వేయొచ్చు. అలాగే స్క్రీనింగ్ టెస్ట్లు చేయించుకునేం దుకు జంకకూడదు. ఎర్లీ స్టేజ్లో డయాగ్నసిస్ చేసుకోవడం చాలా ముఖ్యం.
క్యాన్సర్ ట్రీట్మెంట్ తీసుకునేవాళ్లు పచ్చి ఆహారం తినకూడదు. అలాగే ప్రాసెస్డ్, దుమ్ము, ధూళి పడుతూ ఆరు బయట అమ్ముతున్న పదార్థాలు తినొద్దు. మాంసాహారం తినకూడదు. ఎందుకంటే ట్రీట్మెంట్లో భాగంగా కీమో, రేడియేషన్ ఇస్తుంటారు. దానివల్ల వాళ్లు బలహీనంగా అవుతారు. అందుకని ఎక్కువగా జొన్నలు, మెంతులు, రాజ్మా వంటి ప్లాంట్ బేస్డ్ ఫుడ్ తినాలి. వీటిలో ప్రొటీన్ ఎక్కువగా ఉంటుంది.
ట్రీట్మెంట్ తీసుకుంటున్న వాళ్లకు ఈ ఫుడ్ చాలా అవసరం. ట్రీట్మెంట్ జరిగేటప్పుడే కాదు ఆ తర్వాత కూడా డైట్ విషయంలో జాగ్రత్తగా ఉండాలి. లేదంటే శరీరం వీక్గా ఉండి క్యాన్సర్ సెల్స్ మళ్లీ పెరిగే ఛాన్స్ ఉంటుంది. చాలామంది ఇదే పొరపాటు చేస్తుంటారు. క్యాన్సర్ ట్రీట్మెంట్ తరువాత నార్మల్ డైట్కి వచ్చేస్తారు. దానివల్ల మళ్లీ తిరగబెట్టే అవకాశం ఉంది. అలాకాకుండా... మంచి ఫుడ్ తిని, ఎక్సర్సైజ్ చేస్తూ, చుట్టూ ఉన్న వాతావరణం హెల్దీగా ఉంచుకుంటే క్యాన్సర్ బారిన పడకుండా ఉండొచ్చు.
డా.సుజాత స్టీఫెన్ చీఫ్ న్యూట్రిషనిస్ట్
యశోద హాస్పిటల్స్, హైదరాబాద్
