లింగంపేట, వెలుగు: మండలంలోని మెంగారంలో శుక్రవారం వైద్యశిబిరం ఏర్పాటు చేశారు. గ్రామస్తుడు అన్నం రాజు డెంగ్యూ వ్యాధితో మృతి చెందడంతో మృతుడి ఇంటికి పీహెచ్సీ వైద్యురాలు హిమబిందు వెళ్లి ప్రైవేట్ఆసుపత్రిలో చికిత్స పొందిన రిపోర్ట్లను పరిశీలించారు. అనంతరం గ్రామానికి చెందిన 45 మందికి శిబిరంలో వైద్య పరీక్షలు నిర్వహించారు.
వీరిలో జ్వర నిర్ధారణ జరిగిన ఐదుగురికి మందులను పంపిణీ చేశారు. ఈ సందర్భంగా డాక్టర్ హిమబిందు మాట్లాడుతూ డెంగ్యూవ్యాధితో మృతిచెందిన అన్నం రాజు మెడికల్ రిపోర్ట్లను జిల్లా వైద్యాధికారికి పంపిస్తామన్నారు. గ్రామస్తులు సీజనల్ వ్యాధుల పట్ల అప్రమత్తంగా ఉండాలని, జ్వరం వచ్చిన వెంటనే ప్రభుత్వ ఆసుపత్రికి వెళ్లాలని, అలాగే ఇండ్ల పరిసరాలను పరిశుభ్రంగా ఉంచుకోవాలని సూచించారు. కార్యక్రమంలో సీహెచ్ఓ రమేశ్, సూపర్వైజర్లు ఫరీదా, యాదగిరి, చంద్రకళ, ఏఎన్ఎం రాజమణి, ఆశ కార్యకర్త రాజేశ్వరి పాల్గొన్నారు.
