- నాలుగు నెలల నుంచి రూ.200 తగ్గని అల్లం, వెల్లుల్లి
- రోజురోజుకూ పెరుగుతున్న కూరగాయల ధరలు
నిజామాబాద్, వెలుగు : జిల్లాలో కూరగాయల రేట్లు రోజు రోజుకూ పెరుగుతున్నాయి. టమాట ధర కిలో రూ.100కు చేరింది. పచ్చిమిర్చి కిలో రూ.120 ఉంది. బీర, బెండ, దొండ, వంకాయ, క్యారెట్ కిలో ధర రూ.120కు చేరింది. పాలకూర, తోటకూర, పుంటికూర, గంగవాయిలి, తెల్లగర్జల కూర వేటిని తాకినా.. కిలో రూ.100కు తక్కువలేవు. ఎక్కువ ధర ఉండడంతో కొత్తిమీరను ప్రజలు కొనడం మానేశారు. కిలో అల్లం, వెల్లుల్లి రేట్ రూ.200లకు తగ్గడం లేదు. మొన్నటి దాకా కిలో రూ.20 పలికిన ఉల్లిగడ్డలు ఇప్పుడు రూ.50కి చేరాయి.
అడిగే వారులేరనే ధీమాతో సిండికేట్ వ్యాపారులు ఇష్టరీతిన వ్యవహరిస్తున్నారు. జిల్లా కేంద్రంలోని జరిగే మార్కెట్ కు స్థానికులు, శివారు గ్రామాల ప్రజలు వస్తుంటారు. ఈ మార్కెట్ రేట్లే జిల్లా అంతటా ప్రభావం చూపుతాయి. జిల్లా కేంద్రంతోపాటు, శివారులో ఉన్న వంద దాకా హోటల్స్, కర్రీపాయింట్స్ నిర్వాహకులు గంజ్, జుమేరాత్ బజార్ నుంచి కూరగాయలు కొంటారు. నిన్నటి వరకూ నాలుగు కూరలు వడ్డించిన హోటళ్లనిర్వాహకులు ఇప్పుడు రెండుకు తగ్గించేశారు. మరోవైపు జిల్లాలో కూరగాయల సాగు నామమాత్రంగా ఉంది.
అరెకరం కంటే తక్కువ భూమి ఉన్న గిరిజనులు కూరగాయలు పండిస్తున్నారు. బోధన్ మండలంలోని హున్సా, ఎడపల్లిలోని వడ్డేపల్లి, జైతాపూర్, అంబం గ్రామాల్లో కూరగాయలు సాగవుతున్నాయి. జిల్లాలో మొత్తం కూరగాయల సాగు వందెకరాలు కూడా లేదు. దీంతో వ్యాపారులు ఆంధ్ర నుంచి కూరగాయలను తెప్పించి, స్థానిక మార్కెట్లో ఇష్టమొచ్చిన ధరకు అమ్ముతున్నారు. నగరంలోని గౌతమ్ నగర్, పులాంగ్ చౌరస్తాలతో పాటు, నాందేవ్ వాడలోని రైతు షెడ్పై అధికారులు దృష్టి సారిస్తే.. కూరగాయల ధరలు అందుబాటులో ఉంటాయని ప్రజలు కోరుతున్నారు.
ధరలు ఎక్కువ ఉన్నాయి
అదుపులోని కూరగాయల రేట్లు ఎక్కువగా ఉన్నాయి. రూ.200 వారానికి సరిపడా కూరగాయలు కొనేవాళ్లం. ఇప్పుడు రూ.700 సరిపోవడంలేదు. ఏం చేయాలో అర్థం అయితలే.
- లలిత, గృహిణి
