ప్రైవేటు కాలేజీల్లో ఫీజుల దోపిడీ

• రెండింతలు వసూలు చేస్తున్నా పట్టించుకోని ఆఫీసర్లు

వనపర్తి, వెలుగు: వనపర్తి జిల్లాలోని ప్రైవేట్​ కాలేజీల్లో ఫీజుల పేరుతో విద్యార్థులను దోచుకుంటున్నారు. ఇష్టం వచ్చినట్లు ఫీజులు వసూలు చేస్తుండడంతో ఇంటర్​​స్టూడెంట్లు ఆందోళనకు గురవుతున్నారు. ప్రైవేట్​ కాలేజీల్లో మేనేజ్​మెంట్లు నిర్ణయించిన ఫీజులు చెల్లించేందుకు ఇబ్బంది పడుతున్నారు. ఈ విషయం ఆఫీసర్లకు తెలిసినా పట్టించుకోవడం లేదని విద్యార్థులు, పేరెంట్స్​ ఆవేదన వ్యక్తం చేస్తున్నారు.

ఇష్టం వచ్చిన ఫీజులు..

ఇంటర్​​ఫస్ట్​ ఇయర్, సెకండ్​​ఇయర్​ స్టూడెంట్లకు పరీక్ష ఫీజు రూ.520 ఉంటే, ప్రైవేట్​ కాలేజీల మేనేజ్​మెంట్లు ఒక్కో కాలేజీలో ఒక్కో విధంగా వసూలు చేస్తున్నాయి. రూ.750 నుంచి రూ.వెయ్యి తీసుకుంటున్నాయి. ఇదేమంటే చలానా కట్టేందుకు ఒక మనిషిని ఏర్పాటు చేయాలని, తమకు ఖర్చు అవుతుందంటూ పొంతన లేని సమాధానాలు చెబుతున్నారు. వనపర్తిలోనే ప్రైవేట్​ కాలేజీలు ఎక్కువగా ఉన్నాయి. 

ఈ కాలేజీల్లో జిల్లాతో పాటు నాగర్​కర్నూల్, జోగులాంబ గద్వాల జిల్లాల స్టూడెంట్లు చదువుతున్నారు. ఆర్టీసీ బస్టాండ్​ సమీపంలోని కాలేజీల్లో విద్యార్థుల సంఖ్య వెయ్యికి పైగా ఉండగా, ఒక్కో కాలేజీలో రూ.వెయ్యి నుంచి రూ.1,500 చొప్పున స్టూడెంట్లు ఉన్నారు. అలా ఒక్కో స్టూడెంటు నుంచి రూ.300 చొప్పున అదనంగా వసూలు చేసినా కాలేజీ మేనేజ్​మెంట్లకు వచ్చే అదనపు ఆదాయం ఎంతో అర్థం చేసుకోవచ్చు. 

ఫీజు కోసం ఒత్తిడి.. 

పరీక్షల సమయంలో ప్రైవేట్​ కాలేజీల మేనేజ్​మెంట్లు ట్యూషన్​ ఫీజు కోసం విద్యార్థులను పీడిస్తున్నాయి. ఫీజు మొత్తం కడితేనే ఎగ్జామ్​ ఫీజు తీసుకుంటామని తెగేసి చెబుతున్నాయి. అలా నందిహిల్స్​లోని ఓ పేరున్న కాలేజీలో ఫీజు తీసుకోని విద్యార్థులు 30 మంది దాకా ఉన్నారు.

 మిగతా కాలేజీల్లోనూ ఇలాంటి పరిస్థితే ఉంది. అడ్మిషన్ల సమయంలో యాజమాన్యాలు తాము ఎలాంటి ఇబ్బంది పెట్టమని చెప్పి, పరీక్షల సమయంలో మాత్రం కఠినంగా మాట్లాడుతున్నారని విద్యార్థులు వాపోతున్నారు. ట్యూషన్​ ఫీజు చెల్లించాల్సిందేనని పట్టుబట్టడంతో పేరెంట్స్​ ఇబ్బంది పడాల్సి వస్తోంది. ట్యూషన్​ ఫీజు కట్టకపోతే ఏడాది నష్టపోతామని పిల్లలు చెబుతుండడంతో అప్పులు చేసి మరీ ఫీజు చెల్లించేందుకు సిద్ధం అవుతున్నారు.

సీరియస్​గా చెప్పాం..

ప్రైవేట్​ కాలేజీల్లో పూర్తి స్థాయిలో విద్యార్థులు పరీక్ష ఫీజులు చెల్లించడం లేదన్న విషయం నా దృష్టికి వచ్చింది. కంప్లైంట్​ వచ్చిన కాలేజీలకు సీరియస్​గా చెప్పాం. ట్యూషన్​ ఫీజుతో సంబంధం లేకుండా బోర్డు నిర్దేశించిన ప్రకారం పరీక్ష ఫీజు కట్టించుకోవాలని చెప్పాం. ఇంకా సతాయిస్తుంటే వారిపై చర్యలు తీసుకుంటాం.–అంజయ్య, డీఐఈవో

స్కాలర్​షిప్​అప్లికేషన్లకూ అంతే..

ప్రైవేట్​ కాలేజీల్లో చదివే విద్యార్థులు స్కాలర్​షిప్​ కోసం దరఖాస్తు చేసుకోడానికి కూడా మేనేజ్​మెంట్లు డబుల్​ చార్జీలను వసూలు చేస్తున్నాయి. మీసేవ, ఇతర ఇంటర్నెట్​ సెంటర్లలో తక్కువ తీసుకుంటున్నారని అంటే, ఎస్సీ, ఎస్టీ, బీసీ, మైనారిటీ వెల్ఫేర్​ ఆఫీసుల్లో సార్లకు డబ్బులు ఇస్తేనే స్కాలర్​షిస్​ వస్తుందని, అందుకే ఎక్కువ తీసుకుంటున్నామని చెబుతున్నారని విద్యార్థులు వాపోతున్నారు. 

ఇంటర్నెట్​ సెంటర్లలో స్కాలర్​షిప్  దరఖాస్తు చేసుకోడానికి రూ.120 తీసుకుంటే, కాలేజీల్లో ఒక్కో స్టూడెంట్ నుంచి రూ.300 వసూలు చేస్తున్నారు. ఇంటర్నెట్​ సెంటర్లలో దరఖాస్తు చేసుకుంటామంటే.. బోనాఫైడ్​ సర్టిఫికెట్​ ఇవ్వకుండా వేధిస్తున్నారని వాపోతున్నారు.