కర్నాటకలోని బాగల్కోట జిల్లా, గుళేదగుడ్డ.. ఇంతకుముందు ఈ ఊరిలో ఏ వీధికెళ్లినా ఖున్తో రంగురంగుల బట్టలు నేస్తూ కనిపించేవాళ్లు అంతా. కానీ, కాలంతో పాటు వేల ఏండ్ల చరిత్ర ఉన్న ఆ కళ కనిపించకుండా పోయింది. ఆ ఊరి వాళ్లు దాని ఊసే మర్చిపోయారు. అయితే ఆ ఫ్యాబ్రిక్తో అల్లుకున్న తన చిన్ననాటి గుర్తుల్ని అంత తేలిగ్గా మర్చిపోలేక పోయింది జానవి కులకర్ణి. ఆ ట్రెడిషనల్ ఫ్యాబ్రిక్ని మళ్లీ జనాల్లోకి తీసుకురావాలనుకుంది. ఫ్యాషన్ మార్కెట్లో దాన్నొక బ్రాండ్గా మార్చాలనుకుంది. ఇప్పుడు యు.ఎస్., యు.కె., సింగపూర్, ఆస్ట్రేలియా, జర్మనీ.. లాంటి దేశాలకి ఖున్తో చేసిన డ్రెస్లు, జువెలరీ, డెకరేషన్ ఐటమ్స్ పంపిస్తోంది.
కాటన్, కాటన్ సిల్క్తో కలిపి నేసిన ఫ్యాబ్రిక్ ఖున్. దీన్నే ‘ఖానా’ అని కూడా పిలుస్తారు. ఎనిమిదవ శతాబ్దంలో చాళుక్యులు ఈ ఫ్యాబ్రిక్తో నేసిన బట్టలు వేసుకున్నారట. ఆ తర్వాత ఈ మెటీరియల్తో చేసిన బ్లౌజులు కర్నాటక, మహారాష్ట్రలో బాగా పాపులర్ అయ్యాయి. ముఖ్యంగా కర్నాటకలోని గుళేదగుడ్డ, ధార్వాడ్లో ఈ కుట్టునే వృత్తిగా మార్చుకున్నారు చాలామంది. అందుకే ఈ ఫ్యాబ్రిక్కి గుళేదగుడ్డ, ధార్వాడ్ ఖున్ అని పేరుంది. ఆ ప్రాంతంలోనే పుట్టి, పెరిగిన జానవికి చిన్నప్పట్నించీ ఈ ఫ్యాబ్రిక్ మీద తెలియని ఇష్టం ఏర్పడింది.
ఇష్టం మరింత పెరిగింది
జానవి తల్లితో పాటు, ఇరుగు పొరుగు ఇండ్లలోని ఆడవాళ్లు.. ఖున్ ఫ్యాబ్రిక్తో బ్లౌజులు, డోర్ మ్యాట్లు, డెకరేషన్ ఐటమ్స్ తయారుచేసేవాళ్లు. అవన్నీ చూసి నాలుగో తరగతి నుంచే..తన బొమ్మలకి డ్రెస్లు కుట్టింది జానవి. పెరిగి, పెద్దవుతున్న కొద్దీ కుట్లు, అల్లికల గురించి ఇంకా తెలుసుకోవాలనుకుంది. ఆ ఆలోచనతోనే ముంబైలోని ఎస్ఎస్డిటి యూనివర్సిటీలో 1999లో టెక్స్టైల్స్ కోర్సు పూర్తి చేసింది. యూనివర్సిటీలో గోల్డ్మెడల్ సాధించి ఒక ఎక్స్పోర్ట్ కంపెనీ హౌస్లో ఉద్యోగానికి చేరింది. దాని తర్వాత ఒక ఫర్నిచర్ బ్రాండ్కి పనిచేసింది. ఆ తర్వాత పెండ్లి, బిడ్డలతో బెంగళూరులో బిజీగా ఉన్నా.. ఏదో తెలియని వెలితి వెంటాడిందామెని.
మళ్లీ తీసుకురావాలని
నాలుగువేల ఏండ్ల చరిత్ర ఉన్న ఖున్ ఫ్యాబ్రిక్ మార్కెట్లో కనిపించకపోవడం బాధపెట్టిందామెని. బెనారస్, కలంకారి, మైసూర్ సిల్క్, ఫ్యాబ్రిక్స్తో సమానంగా ఖున్కి ప్రపంచవ్యాప్తంగా గుర్తింపు తేవాలనుకుంది. ఆ ఆలోచనకి భర్త ఆనంద్ కూడా అండగా నిలిచాడు. దాంతో 2012 లో కాలేనాలే బ్రాండ్ని మొదలుపెట్టింది. గుళేదగుడ్డ, ధార్వాడ్లో వీవర్స్ నుంచి ఖున్ ఫ్యాబ్రిక్ని సేకరించింది. సంవత్సరం పాటు దిండు కవర్లు, బ్లౌజులు కుట్టింది. తనపై తనకి నమ్మకం వచ్చాక వీవర్స్ని కలిసింది.
ఖున్ బ్లౌజులు ఎప్పట్నించో ఉన్నవేకానీ, అందరికీ రీచ్ కావాలంటే డిఫరెంట్గా ట్రై చేయాలనుకుంది జానవి. ఖున్తో చీరలు, దుపట్టాలు, డోర్ మ్యాట్స్, స్టోల్స్, జువెలరీ, డెకరేషన్ ఐటమ్స్, ఐపాడ్ కవర్స్, బ్యాగ్స్ తయారుచేయాలనుకుంది. ఈ ఆలోచనతో వీవర్స్ని కలిస్తే 31 అంగుళాల పొడవు, ఆరు అంగుళాల అంచు ఉండే ఖున్ ఫ్యాబ్రిక్తో ఇవన్నీ కష్టమన్నారు. పైగా చీరలు నేసేందుకు వీలయ్యే మగ్గాలు కూడా లేవు వాళ్లదగ్గర . దాంతో మగ్గాల సైజు పెంచడానికి వాళ్లని ఒప్పించేందుకు చాలా కష్టపడింది జానవి. ప్రొడక్ట్స్ రిజెక్ట్ అయినా వెనక్కి తగ్గలేదామె.. తనని తాను బెటర్ చేసుకుంటూ మరింత ముందుకెళ్లింది. ఇప్పుడు కోట్లలో టర్నోవర్ సంపాదించింది.
“ఇద్దరు పిల్లల బాధ్యతతో ఇదంతా చేయడం చాలాసార్లు కష్టం అనిపించింది. కానీ, నా విజన్పై నాకున్న నమ్మకం, వీవర్స్ స్కిల్స్పై ఉన్న భరోసా నన్ను ఇక్కడి వరకు తీసుకొచ్చింది. ఇప్పుడు ఖున్ ప్రొడక్ట్స్కి ప్రపంచవ్యాప్తంగా డిమాండ్ ఉంది. నన్ను చూసి మా చుట్టుపక్కల ఊళ్లలోని వీవర్స్ కూడా మళ్లీ మగ్గం ఎక్కుతున్నారు ’’అంటోంది జానవి.
