పటాన్చెరు, వెలుగు: సొసైటీ ఫర్సంగారెడ్డి సెక్యూరిటీ కౌన్సిల్((ఎస్ఎస్ఎస్సీ) ఆధ్వర్యంలో చేపడుతున్న భద్రతా కార్యక్రమాల్లో భాగంగా పటాన్చెరు పరిధిలోని పాశమైలారం పారిశ్రామిక ప్రాంతంలో కొత్తగా ఏర్పాటు చేసిన ట్రాఫిక్ సిగ్నల్స్ను గురువారం ఎస్పీ రూపేశ్ ప్రారంభించారు. ఈ సందర్భంగా ఆయన మాట్లాడుతూ.. పాశమైలారం ఇండస్ట్రియల్ ఏరియాలో అధిక ట్రాఫిక్ రద్దీ కారణంగా ప్రజలు ఇబ్బందులు ఎదుర్కుంటున్నారని, ఆ సమస్యను అధిగమించేందుకు కొత్తగా ట్రాఫిక్ సిగ్నల్స్ను ఏర్పాటు చేసినట్లు తెలిపారు.
వాహనదారులు ట్రాఫిక్ నియమాలు పాటించి, సురక్షిత ప్రయాణం చేయాలని సూచించారు. ట్రాఫిక్ సిగ్నల్స్ జంప్ చేస్తే సీసీ కెమెరాల ద్వారా గుర్తించి ఫైన్ విధిస్తామని తెలిపారు. అన్ని పరిశ్రమల యాజమాన్యాలు ఎస్ఎస్ఎస్సీ లో సొసైటీలో మెంబర్ గా చేరాలని సూచించారు. కార్యక్రమంలో డీఎస్పీ రవీందర్ రెడ్డి, ఎస్ఎస్ఎస్సీ జనరల్ సెక్రెటరీ సత్యనారాయణ, పలు కంపెనీలకు చెందిన పారిశ్రామిక వేత్తలు, సబ్-డివిజన్ ఇన్ స్పెక్టర్లు లాలు నాయక్, నాగరాజు, స్వామి గౌడ్ పాల్గొన్నారు.
