లాభాల బాటలో రిలయన్స్

న్యూఢిల్లీ: రిలయన్స్ ఇండస్ట్రీస్ ఈ ఏడాది జూన్​తో ముగిసిన మొదటి క్వార్టర్​లో రూ.17,955 కోట్ల లాభం సంపాదించింది. పోయిన ఏడాది ఇదే క్వార్టర్లో వచ్చిన లాభం రూ.12,273 కోట్లతో పోలిస్తే ఇది 46 శాతం ఎక్కువ.  ఈసారి రిలయన్స్​కు రూ. 24,311 కోట్ల లాభం వస్తుందన్న ఎనలిస్టుల  అంచనాలు నిజం కాలేదు. పోయిన ఏడాది ఇదే క్వార్టర్లో రూ.1,44,372 కోట్లుగా ఉన్న ఆదాయం ఈ క్వార్టర్లో 54.54 శాతం పెరిగి రూ.2,23,113 కోట్లకు చేరుకుంది.  కన్సాలిడేటెడ్​ ఎబిటా  45.80 శాతం పెరిగి రూ.40,179 కోట్లకు చేరింది. నగదు లాభం 46.2 శాతం పెరిగి రూ.31,916 కోట్లకు ఎగిసింది. మార్జిన్ 17.3 శాతంగా ఉంది.  పోల్ ప్రొజెక్షన్  కంటే ఇది 17 శాతం తక్కువ. నెగెటివ్​ వాతావరణంలోనూ ఓ2 సీ వ్యాపారం ఈ క్వార్టర్ అత్యధిక ఆదాయాన్ని పొందిందని కంపెనీ తెలిపింది.

ఆదాయాల పరంగా రిలయన్స్ రిటైల్‌‌కు ఇదే అత్యుత్తమ క్వార్టర్​ అని,  సంవత్సరానికి 51.9 శాతం గ్రోత్​తో రూ.58,554 కోట్లుగా ఉందని పేర్కొంది.  జియో ప్లాట్‌‌ఫారమ్‌‌లకూ ఆదాయ పరంగా ఈ క్వార్టర్ ఉత్తమమైనదని, ఈ విభాగం నుంచి వచ్చే ఆదాయం 23.6 శాతం పెరిగి రూ. 27,527 కోట్లకు చేరిందని రిలయన్స్​ తెలిపింది. జియో ప్లాట్‌‌ఫారమ్‌‌ల నికర లాభం 24.1 శాతం పెరిగి రూ. 4,530 కోట్లకు చేరుకుంది. అమ్మకాల విలువ 23.6 శాతం పెరిగి రూ. 27,527 కోట్లకు చేరుకుంది. ఏడాది లెక్కన ఇబిటా మార్జిన్ 176 బేసిస్​ పాయింట్లు పెరిగి 48.7 శాతానికి చేరింది. కనెక్టివిటీ వ్యాపారంలో ఒక్కో యూజర్​ నుంచి సగటు ఆదాయం (ఏఆర్​పీయూ) పెరుగుదల కారణంగా నిర్వహణ ఖర్చులను భరించడం సులువుగా మారింది. ఏఆర్​పీయూ ఏడాది ప్రాతిపదికన 27 శాతం పెరిగి నెలకు రూ. 175.70 లకు చేరింది. సీక్వెన్షియల్​గా ఇది 4.8 శాతం పెరిగింది. చైర్మన్  మేనేజింగ్ డైరెక్టర్ ముఖేష్ అంబానీ ఈ సందర్భంగా మాట్లాడుతూ, యుద్ధం, రాజకీయ సమస్యల వల్ల ఇంధన మార్కెట్లలో చాలా మార్పులు వచ్చాయని చెప్పారు. ధరలు తగ్గాయని,  సంప్రదాయ ట్రేడ్​ ఫ్లోలకు ఇబ్బందులు ఏర్పడ్డాయని ముఖేష్​ అంబానీ పేర్కొన్నారు.