జైపూర్: జ్వరం, జలుబుతో బాధపడుతున్న 7 నెలల పసికందుకు నయం చేస్తానని చెప్పి ఇనుప రాడ్డుతో వాత పెట్టాడో తాంత్రికుడు. రాజస్థాన్లోని భిల్వారా జిల్లాలో జరిగిందీ దారుణం. మధ్యప్రదేశ్లోని నెమంచ్కు చెందిన శంభు భీల్.. భిల్వారాలోని దాదాబరి కాలనీలో భార్య, ఏడు నెలల కొడుకుతో కలిసి ఉంటున్నాడు. కొద్ది రోజులుగా ఆ పసివాడు జలుబు, జ్వరంతో బాధపడుతున్నాడు. శంభు భార్య గురువారం ఓ మతపరమైన కార్యక్రమానికి వెళ్లగా దగ్గర్లో ఉన్న తాంత్రికుడి దగ్గరకు కొడుకును తీసుకెళ్తే జబ్బు నయం చేస్తాడని చెప్పారు. దీంతో కొడుకును తీసుకొని తల్లి ఆ తాంత్రికుడి దగ్గరకు వెళ్లింది. అయితే, ఆ తాంత్రికుడు బాబుకు నయం చేస్తానంటూ కాల్చిన ఇనుప రాడ్డుతో వాత పెట్టాడు. దీంతో ఆ పసివాడి ఆరోగ్య పరిస్థితి విషమించింది. వెంటనే బాబును గాంధీ ఆస్పత్రికి తరలించారు. పోలీసులు శుక్రవారం కేసు నమోదు చేసుకొని తాంత్రికుడి కోసం గాలిస్తున్నారు.
వేడి చైనుతో మహిళను కొట్టి..
గుజరాత్లోని ద్వారక జిల్లా అరంభడ గ్రామానికి చెందిన రమిల సోలంకి(25) తన భర్త వలతో కలిసి బుధవారం ఒఖమధి గ్రామానికి వెళ్లింది. అక్కడ సడెన్గా రమిల వణకడం ప్రారంభించింది. దగ్గర్లో ఉన్న భూత వైద్యుడు రమేశ్ సోలంకి దగ్గరకు తీసుకెళ్లగా.. నయంచేస్తానంటూ వేడి వేడి ఇనుప చైనుతో ఇష్టం వచ్చినట్టు కొట్టాడు. ఆ దెబ్బలకు ఆమె మృతిచెందింది.
