సీలింగ్​ ఫ్యాన్ల ధరలు జంప్​

• ఇక స్టార్​ లేబులింగ్​ తప్పనిసరి
• పెంపు 20 శాతం వరకు?

న్యూఢిల్లీ: బ్యూరో ఆఫ్​ ఎనర్జీ ఎఫీషియన్స్​(బీఈఈ)  రూల్స్ ​మారుతున్నందున సీలింగ్​ ఫ్యాన్ల ధరలు 8–20 శాతం వరకు పెరగనున్నాయి. ఈ నెల నుంచి ఫ్యాన్లకు స్టార్ లేబులింగ్ తప్పనిసరి. ఒక ఫ్యాన్​ఆదా చేసే కరెంటును బట్టి 1–5 మధ్య స్టార్ ​లేబుల్ ఇస్తారు. 1 -స్టార్ రేటెడ్ ఫ్యాన్‌‌‌‌లు కనీసం 30 శాతం,  5- స్టార్ రేటింగ్ ఉన్న ఫ్యాన్లు 50 శాతానికి పైగా కరెంటును ఆదా చేస్తాయి. హావెల్స్, ఓరియంట్, ఎలక్ట్రిక్,  ఉషా ఇంటర్నేషనల్ వంటి ప్రముఖ తయారీదారులు ఈ నిర్ణయాన్ని స్వాగతించాయి. అయితే  5 -స్టార్ రేటెడ్ ఫ్యాన్ల తయారీ కోసం  మోటార్లు, ఎలక్ట్రానిక్ కాంపోనెంట్‌‌లను దిగుమతి చేసుకోవాలి. కాబట్టి తమ ఖర్చు 5 నుంచి 20 శాతం వరకు పెరుగుతుందని ఆందోళన చెందుతున్నాయి. కొత్త ఆదేశాల ప్రకారం, తయారీదారులు తమ ఫ్యాన్లపై స్టార్ రేటింగ్‌‌లను ప్రదర్శించడం తప్పనిసరి. స్టార్ రేటింగ్ సర్వీసు వాల్యూపై ఆధారపడి ఉంటుంది (నిమిషానికి ఫ్యాన్​గాలి డెలివరీని క్యూబిక్ మీటర్లలో శక్తి వినియోగంతో (వాట్లలో) భాగిస్తారు). ఓరియంట్ ఎలక్ట్రిక్ ఎండీ & సీఈఓ రాకేష్ ఖన్నా ఈ విషయమై మాట్లాడుతూ ఫ్యాన్ల మార్కెట్‌కు ఇది భారీ మార్పని అన్నారు. ఇక నుంచి కస్టమర్లు చాలా తక్కువ శక్తిని వినియోగించే నాణ్యమైన సీలింగ్​ ఫ్యాన్లను పొందుతారని కామెంట్​ చేశారు. అయినప్పటికీ, స్టార్ రేటింగ్ లేని ఫ్యాన్లను కొత్త పద్ధతికి మారడానికి తయారీదారులు అదనపు ఖర్చులను భరిస్తారు కాబట్టి  ధరల పెరుగుదల  7-–8 శాతం వరకు ఉంటుందని వివరించారు. 

కరెంటు బిల్లులో 20 శాతం

సగటు భారతీయ కుటుంబం వినియోగించే విద్యుత్తులో సీలింగ్ ఫ్యాన్ల వాటా 20 శాతం ఉంటుంది. ఈ స్టార్ -రేటెడ్ ఫ్యాన్లు అంతిమంగా వినియోగదారునికి ప్రయోజనం చేకూర్చడంతోపాటు కరెంట్‌ను ఆదా చేస్తాయి.  ఉషా ఇంటర్నేషనల్ సీఈఓ దినేష్ ఛబ్రా మాట్లాడుతూ, స్టార్ లేబులింగ్ 1-స్టార్ రేటెడ్ ఫ్యాన్లు 30 శాతం వరకు, 5-స్టార్ రేటెడ్ ఫ్యాన్లు 50 శాతానికి పైగా కరెంటును ఆదా చేస్తాయని అన్నారు.  తమ1-స్టార్ రేటెడ్ ఫ్యాన్ల ధరలు 5–-7 శాతం వరకు, 5-స్టార్ రేటెడ్ ఫ్యాన్ల ధరలు 20 శాతం వరకు పెరుగుతాయని వివరించారు. ఫ్యాన్ల ధర ఉత్పత్తి,  ప్రస్తుత డిజైన్, స్టార్ రేటింగ్ (1 నుంచి 5)  పనితీరు (ఎయిర్ డెలివరీ)పై ఆధారపడి ఉంటుందని ఛబ్రా చెప్పుకొచ్చారు.